Zualko COVID-19 zawtnak in Hakha ah Pathian riantuan pakhat a nunnak a liam

Falam peng, Sim Dihai khuami Rev. Evan Biak Lian Sum (Kum-47) cu nihin June 21, zinglei suimilaam 9:00, Hakha Sii-inn ah COVID-19 zawtnak in a nunnak a liam tiah kan theih.

Rev. Evan Biak Lian Sung hi Revival Baptist Church ah a tuan lio mi a si i, a nupi le a fale pathum a kaltak hna tiah kan theih.The Hakha Times

Adang relthan:Thaizing ah cun ni ceu dawh te a tlang te ko lai.Carson le Laura Lai tlang ah thawngṭhabia an rak chim lio ah khan biar aa kaih liomi Lai mi nih Laura a sui ha zoh duh ah a kam an rak keu ti a si. An lo hma a zoh tik ah Laura a lung a rak dong.

“Ka ṭa Carson aw, hi mi hna sin ah thawngṭhabia sung cu kan chim kho hnga maw” tiah a mitthli he a rak hram. “Ka dawt Hadin (Laura) aw ṭap len ti hlah law, thaizing ah niceu dawh te kan ca ah a tlang te ko lai” tiin Carson nih a rak hnemh tiah hla zong an rak phuah kha.

Carson bia bang, Lai ram ah niceu dawh te a rak tlang tak tak. Thil an hun i dawh deuh. “Nunnak thaw kan chuah chung poh cu ruahchannak a um” timi Socrates bia kha Laura nih a tak in a rak tem.

Kawl ralkap ruang ah innlo a zamtaakmi ka innpa ṭhing pakhat he kan i chawn. A ngaih a chia. A tha a chia. “Zei dik kan lawh te lai e” a ti. Mah tappi khor te ah thlaphang lo tein zing zan khua a sami ka innpa ṭhing nih hin Kawlram ralkap ruang ah khuapi tein zam lai ding hi mang chia hmanh ah a rak man bal lai lo dah. Kumkhua upat lei tu ah hi thil ton cu a ngaih chiat le a tha chiat hi a mawh hrim hrim lo.

Hlan ah khan cun ramchung ralzaam kong chim tik ah Karen le Kachin lawng nih biapi in an rak tuar.

1949 kum ah Karen Miphun Kilvennak Phu cu an rak dirh. Kawlram cozah an rak tuk hna. Rangoon cozah tiah ro ling tiang in Rangoon hrawng te lawng hi cozah kut ah a rak taang. Kawlram ralkap nih Karen tapung kha an rak nam ṭhan ve hna. Karen khuate 300 (khua za thum) hrawng an rak khangh. A himmi khua dang pawl zong ah hin ralzaam in an rak khat an ti.

Min Aung Hlaing nih khua a hun sual. Karen tapung nih Kawlram ralkap an kah ve hna. Kawlram ralkap nih Karen khua mi umnak hmun hma cheukhat cu raltuknak vanlawng in an kah hna. Minung 10,000 (thong hra) leng cu khua an zaam taak. Mi cheu cu Thailand ram tiang an zaam i umnak an ngeih lo ruang ah caw inn ah an i dor.

2011 kum in a rak i thok ṭhanmi Kachin ram chung raltuknak ruang ah Kachin ramkulh le Shan ramkulh chaklei hrawng ah ramchung ralzaam umnak hmun 173 an ser i minung 107,000 an i dor. Kum 10 a rau cang nain nihin ni tiang ah inn le lo an hlam kho rih hna lo. An lungfahnak mitthli a luang tawn ve ko nain an lung tu cu a dong lo.

Min Aung Hlaing nih khua a hun sual hnu cun kan Chin ram chung lila ah ralzaam dirhmun kan hun ton ve cang. Mindat nih an ton hmasa. A chang ah Senthang peng hrawng. Cu hnu ah Khualhring tlang, a bik in Mualkai, Ṭihbual le Tlang Khua.

Zei can a rauh lai theih a si rih lo. Kan ruah leng in a rau kho. Kan ruah nak tuan deuh zong ah Min Aung Hlaing hi a ngal kho ko.

Lungretheih lo le ngaihchiat lo awk a ṭha hrim hrim lo. Asinain, “kan lung belte rawk hin hlah seh”:

“Thaizing ahcun niceu dawh te a tlang te ko lai!”(Saya Hrang Hlei nih a facebook ah a ṭialning ahcun, “Hika ah hin zeitindah ka nun chung khua ka sak khawh lai” tiah Laura a hram. “Cu ti cun bia chim hlah. Thaizing ah cun thil an hun i dawh deuh te ko lai” tiah Carson nih a rak leh ti a si. Ca bia le hla bia hi an biafang cu an i khat lo nain an sullam cu an i dang lo tiah ka ruah.)A Ruang 15/06/2021

Be the first to comment

Leave a Reply

Your email address will not be published.


*