Zeitin ngaihchiatnak le lungfahnak kan zorter lai?

Na taksa hma na khoih peng ahcun zeitik hmanh ah a dam kho lai lo. A puang chin thluahmah lai i a donghnak ahcun na nunnak ca tiang zong ttih a nung kho. Mah bantukin thinlung hma zong a si. Na ngaihchiatnak/lungfahnak lawngte na ruah ahcun a zual chin lengmang lai i a donghnak ahcun na nunnak ca tiang ttih a nung kho.

Philh awk a ttha ve lomi pakhat bel cu mah hi a si; Na ngaihchiatnak le lungfahnak hi ruat lo tein um i zuam. ti hi a chim cu fawi bak, nain a tuah cu fawi ve lomi a si. Kan ruah lo zong ah a caan cun amah tein a ra i mitthli he a kan chiah tawn. Nain hi kan ngaihchiatnak le lungfahnak hi a ratnak lam a dawn khotu thil kan kawl i kan tuah ahcun, kan cung i a rian ttuan khawhnak thazaang a zor deuh hrimhrim ve timi bel el awk a ttha lomi a si. Sicun zeidah kan tuah kun lai?

A har bakmi thil pakhat cu kan ngaihchiat le lungfah caan ah kan tthutnak hmun in thawh i hawikom he um tti asilole a nuammi thil tuah ding kawl khi a si. Asinain mah nakin a har deuh rihmi cu ngaihchiat bu le lungfah buin nifatin mah lawngin caan hman kha a si. Nain mi tampi nih cun a fawi deuhmi siloin a har deuhmi hi kan i thim i, innkhan chungah ngaihchiatnak le lungfahnak kha i nenhter in caan kan hmang lengmang. Hihi ttih a nunnak pakhat cu lungrawh zawtnak (depression) ngeih sual a fawi tuk.

Catial thiam minthang a simi Haemin Sunim nih cun; Na lungfah caan ah na hawikom ttha hna he caan hmang tti. Rawl ei tti uh. Movie theater ah nangmah lawngin kal, asilole na hawile he. Nihchuak movie zoh. Na lungthin ah bia a chim ngaimi hla tampi in ngai. Cu i na tthat deuh hlei lo ahcun khualtlawng, asilole na rak kal duh tuknak hmun ah va kal, tiah a ti. Sicun Haemin Sunim nih a chim duh takmi hi zeidah a si?

Haemin Sunim nih a chim duhmi cu kan thluak nih ngaihchiatnak le lungfahnak kan tonmi lawngte a ruah nakhnga lo, tuahmi kan ngeih a herh ti kha a si. Thluak lei thiamsang hna nih an hmuhchuahmi cu minung kan thluak nih hin thil pahnih khi caan caan khat ah a ruat tti kho lo, ti a si. Pakhat a ruah chung poah cu a dang pakhat kha a ruat kho lo. Cucaah tuahmi thil kan ngeih tikah kha kan tuahmi ah khan kan lungthin le ruahnak kan chiah i, cu nih cun kan lungfahnak le ngaihchiatnak hun ruahnak kha a donh. Tahchunnak ah:

Hawile he movie kan zoh asilole nuamhnak i kan kal tikah kha kan tuahmi thil ah khan kan ruahnak le lungthin kan chiah i, kan ngaihchiatnak le lungfahnak kha kan lungthin le ruahnak ah a um ding tlukin a um kho lo. A fawinak in kan chim sicun kan philh. Hihi a tthatnak cu kan chunglei fahnak hi caan a rauh deuh cun amah tein a dammi a si i, mah a dam hlan ah khan a fahnak kan tuar tuk nakhnga lo tuahmi kan ngeih a herhnak cu a si. Cuti lo cun nichiar lungthin fahnak he khua kan sa lai.

A caan ahcun zeihmanh tuah loin kanmah te lawngin kan um a herh caan zong hi a um ko, nain caan sautuk zeihmanh tuah loin kan um i, innkhan ah kan i erh peng ahcun, kan ngaihchiatnak le lungfahnak kha rawl kan pek a si. A tthang chin lengmang lai i a donghnak ahcun kan caah phurh khawh lo tiang a rit kho. Cucaah tuahmi ngei hna usih. A thawkka ahcun a har ko lai. A fawi lai lo. Nain nifatin ngaihchiatnak le lungfahnak he tthut kha a har deuhmi a si hlei ah kan caah ttih a nungmi zong a si fawn. Cucaah tho hna usihlaw cawlcang hna usih. Harnak kong ah siloin nuamhnak tu ah kan thluak hi cawlcanghter deuh hna usih.

Cherhchan:Haemin Sunim. (2018). The Things You Can See Only When You Slow Down – How to be calm in a busy world. USA; Penguin Book. Credit Roro Fambawl

Be the first to comment

Leave a Reply

Your email address will not be published.


*