Zantim khuamang ah Bible sianginn siangngakchia zong ralkap nih an luh hnawh hna

Nihin March 14,2021 zinglei suimilam 2:00 ah Kachin ram khuahlipi Myitkyina Bible sianginn pakhat KTCS ah ralkap pawl an phan.

Anmah nih cun Ehh-sa-zin kan check lai tiah an ti nain sianginn chung an luh hnu ah siangngakchia min cazin an zohfel dih. An Bag hme tetetiang in an check piak dih hna.Caan sau ngai an um hnu an kir than. Siangngakchia min list le zeimaw cazin pawl zong an I kalpi ti si.Credit-Tluang Ceu Thang

Adang relthan:Dai Tein Um Cu Sualnak Thazaang Pek A Si Pathian he kan i pehtlaihnak ahcun dai tein a hmai ah kan kun, kan um, kan khuk kan i bil awk a si. Kanmah nih Pathian bia kan ruah tuk ahcun Amah nih bia a kan ruahnak aw kan thei sual lai lo. Pathian he bia kan i ruah hnu ahcun dawtnak ruangah dai tein i tthutpi ding a si lo, love in action timi titsa ah a can awk a si. Vawlei cungpi nih mifim tiah an upatmi Albert Einstein nih a rak chimmi cu “Vawlei hi umnak ding ah ttih a nung ngaimi hmun a si, cu ti ttih a nunnak cu a chung ummi misual hna ruangah a si lo, asinain tthatlonak a si tiah a hngal i a hmu ko mi minung hna nih zeihmanh an tuah lo ruang tu ah a si:

The world is a dangerous place to live, not because of the people who are evil, but because of the people who don’t do anything about it,” tiah roling bia a kan chiah taak. Chinmi sinah thawngttha a phak kum 100 tlin (centenary, 1899-1999) puai lio ah Laimi kan pa Rev. Dr. Stephen Hre Kio nih phung a rak chimmi cu “Adam dai tein a rak um kha sual a si,” a rak ti.

Evi nih ei lo ding tiah Pathian nih a thlauhmi thingthei a ttawh kha Adam nih a hnatlak pi lo ding a si, a kham awk a si. Sualnak kha sual a si tiah sual phawt ngam lo kha mibu nun le vawlei kan hrawh a si. Misual kha kan pomhlawm hna i kan cawnpiak hna i an sual an i phuhrunnak chungin luatnak lam kan kawlpi hna ding hi khrihfa mi kan rian lian ngan bik pakhat a si. Satah nih zeitluk hmanh in sualnak kha kan lak ah vorh len hmanh sehlaw misual mi vialte kan i ven thiam, kan i bawmh hna i Thiang Thlarau kut chungah kan khumh ve hna ahcun sualnak cu kan tei khawh ko lai. Hmuh ko ttung, hngalh ko ttung i dai te in rak um khawh tu kha khuaruahhar in sualnak rap i kan rak i foih kha a si.

Atu lio ttihnak le mitthli he mizapi kan um lio caan ah lente hoi hna rak i celh khawh, nuamhnak in caan rak hman khawh ve kha cu kan sining, kan nun thlalang kan i bih zohzok a herh ko lai. Thilri i khon caan a si lo. Nun samh caan, pek caan, nun hrawmh caan a si. Mah le inn cio ah, chungkhar pumh thlacamnak kan ngeih tik ah, zeidah dinnak, daihnak le dawtnak hi a si ti kha Baibal chirhchan in kan i cawnpiak caan a si. Bawi Jesuh bia “Vawlei pi hi hei ngei ko law, na nunnak a sungh ttung ah cun cucu santlai lo a si,” tiah a kan cawnpiakmi hi nunnak in kan hrilhfiah a herh. Na miphun, na khrihfabu kha nai lawmhnak ngan bik i na chiah khawh ve lo i, na khua, na chungkhar na philh ahcun Salm 137nih bia an ceih ve sual ko lai. Dai tein um caan a si lo. Dawtnak cu dai tein a tthu kho lo, tthatnak tuahnak ah a cawlcang; din lonak kha a doh ngam, mizaw a thlop ngam fawn, daihnak kha a hriam ttha bik ah aa hman i misual a hlawm. Tleicia Albert Einstein bia le Carson bawinu mitthli nih dai tein kan um ahcun an kan mawhchiat sual lai.Credit-Lal Pek Lian

Be the first to comment

Leave a Reply

Your email address will not be published.


*