Wai Mo Naing an tlaih caah ralkap lei nih Monywe cu kan tei cang ti phun in an ruah

Thawnnak hi pumrua ah a rak si lo.Tulio mipi nih uar taktakmi hna cu Mandalay mino hruaitu Teza San le Monywe mino hruaitu Wai Mo Naing an si. Hi hna pahnih hi ralkap zong nih an tih bak hna. An pumrua aa dawh in a tha lem lo. Nain an rak thawng tuk.

Nizan ah Monywe mino an hruaitu Wai Mo Naing cu reporttu an um ruang ah motor cycle in sandah an piah lio ah misual palik le ralkap lei nih motor in an pah i an tlaih.

Monywe mipi nih zahan zan ah meibul van in Wai Mon Naing thlah uh zeihmanh harnak pe hlah uh. Nungdam te nan thlah lo cun nan tuar lai tiah an ti ve.

Wai Mo Naing an tlaih caah ralkap lei nih Monywe cu kan tei cang ti phun in an ruah. A ruang cu an hruaitu lubik a si.

Si nain nipi an thachia hlei lo. An raktha chin. Hi kong ah Mandalay hruaitu Dr Teza San nih cun ralkap nih thei dih uh Wai Mo Naing nan tlaih. Nain amah bantuk mino tampi a rauh hlan ah an chuak than lai.

Zeicahtiah hi ralkap dohnak hi Teza San le Wai Mo Naing ta a si lo kanmah thawkmi zong a si lo tiah a chim ve.

Chim duh mi cu Mandalay le Monwye mino hna an thawnnak khi an pumrua that ruang le milu an tam caah a rak si lo. An thinlung tu ah a rak si deuh.

Ralkap nih an mipum cu an tlaih khawh hna an thah khawh hna nain an zumhnak le ralthatnak thinlung kha a tlau kho lomi a si. Cu zumhnak le ralthatnak nih mipi nun ah hmunhma a lak cang.

Cucaah kan thawnnak hi milu tam le tlawm le pumrua that le der ah si hlah seh thinlung tu ah siseh. Nihin KIA an thawnnak khi an hriamnam that ca si lem lo an thinlung a rak si. Kawl ralkap nih an tei khawh hna lo nak a ruang tak cu an thinlung a si deuh. Credit-Tluang Ceu Thanh

Be the first to comment

Leave a Reply

Your email address will not be published.


*