Vawlei cung ah ro a ling bik, a ngan bik le a hlawk bik ram zuarnak

AD1803 December ni(20) ah France ram a simi Louisiana cu US cozah sin ah phunning tein hlannak cu US khua New Orland ah hlunghlai tak in an tuah.

Meng (miles) singriat leng (828000) a kaumi Louisiana ram cu cu lio France siangpahrang Napoleon nih US president Thomas Jefferson sin ah US tangka nuai (15) in a rak zuar. Tuchan US dollar manning in tuak ah cun kha lio a rak cawkmi cu mengkhat ah fangkhat tling lo mi  tangka per (50) perkhat  – cents tluk man deng in US nih a rak ngah khawh cu a si .

Louisiana leikulh cu kehlei ah Rockey tlang, orlei ah Mississippi tiva, chaklei ah Canada ram le thlanglei ah Mexico riliralkulh tiang a va kaumi a si. Mah ramkaupi cu tulio US ram tlangkulh (15) hrawng ah an ithen i zalennak an hmuh hnu US rampi cu a let lethnih in a ngan chinchin cang. Cu an rak zuar lio cun Louisiana ram kaupi hin  kokek ram ngeitu tak a si lo mi milu thong (60,000) te lawng an rak um rih.

Kum zaabu (17) thawkka hrawng in France pawl nih Mississippi tiva hrawn hrawng ah ram kauh an rak thawk. Louisiana timi min kong ah France paraltha le ram kawltu Robert  Cavelion De La Salle nih 1682 ah Kanu lawng in a rak tum i a hmuhmi cu a si. Cu hnu  an ram  France siangpahrang le ramngeitu  Loui(14) sin ah a rak pek caah Louisiana tin kawhauh thawk a si. Kum zaabu (18) a lai hrawng cun tu US rampi tam deuh cu France pawl kuttang ah a rak um.

1762 i kokek ram ngeitu Red indian pawl he kahdohnak a dih hnu ah Louisiana cu France nih Spain kut ah a rak hlan balmi a si. Cu lio ah cun US pawl hi US ram i chaklei in  orlei hrawng tiva hrawn hrawnghrang ah khua an rak sa cang i anmah caah zaalong tein tiva chung ah chawhlehnak nawl  a hau i rili lei tiang zaalong tein chuah khawhnak nawl an herh kha US mizaapi  nih cun an ifiang cang.

Spain nih a rak pen lio hna hi Mississippi tiva cung zaalong tein chawh khawhnak nawl le New Orland rili thiltumhnak cun zaalong tein ichawhnak nawl an pek ko hna. Napoleon nih Spain pawl a vun nam khawh deuh than cang hna ruang ah 1802 ah Spain nih Louisiana cu France kut ah an hlan than hoi hna. Mississippi tiva hrawn hrawng ah an lal hnu France cu Europe lei ah a buai deuh rih i US lei a rak nawr tuk rih loin caan khatkhat cun New Orland thiltumhnak le tonhmun kan hmang kho ti lai lo timi le US chaklei in orlei ah a ummi kan caah Rili lei ah zaalong tein kan chuak kho te lai lo timi cu US president Thomas Jefferson nih cun a rak hmuh cia khawh i a rak tuak khawh dih cia cang.

Cucu kong ceih ding cun France ram lei ramleng vuankyi a si mi Living Stone cu 1803 ah France ram ah a va tlah. New Orland thilthumhnak le tonhmun lawng si loin a si khawh cun Mississippi tiva chaklei hrawn tiang US tangka nuai (10) in cawk ding ah an va kal cu a si. Ram cawkzuarnak a tluang i an hlawhtlinnak ding caah amah i a hnuzul James Monroe a hnu ah President a si mi zong a tlah chih.

France pawl he an iruah tik cun an ruah bal lo ning p’in  tangka nuai (5)  (a dihlak nuai (15) nan kan chap  khawh cun New Orland le Mississippi tiva hrawn tiang lawng si loin  Louisiana ram dihlak in kan in pek dih hna lai an rak ti hna. Cu tik ah an ilauter nain an thinlung chung in cun an ilawm tuk cang saveh kah pah in nengpi a tlimi khi a va hliam chap bantuk khi a si ko cang.

Mah cucu Jefferson sin ah thawng thanh than ding a si nain caan zong a um ti lo( kha lio ah thirhri tuknak a chuak rih lo) .Cu hlei ah mi va tlah hna sehlaw an sin a rak phak than hlan ah Napoleon a lung aa thlen than sual i an biakam a let than cun loh bak a si ko lai timi kha a kal mi hna nih cun an tuaktan khawh ve colh. Cu caah anmah nawl bak in cawkzuarnak cu minsen an thuh i an cawk diam ko.

Louisiana France nih a rak zuarnak a ruang cu 1802 in America lei a ram le a dangdang lam hlapi i a ummi a ram pawl cu a ngeih ve deuh hna i biatak in umpi hna. Napoleon nih a hnuzul  ralbawi zik) pakhat cu Heti i buainak a tuahtu pawl hriamtlai pawl cu a va dohter hna nain an hlawh a cham i an kir than. Cu caah a hlat i a ummi Colony pawl pen peng khawh ding ah cun  harsatnak tampi a um cang tin Napoleon nih a hun ifiang.

Europe kulh chung hel in a dohnak ah hriamhrei man budget a kai chin i rampi budget a hung rocar i a vun  zawr chinchin cang. Cu an ram a harsa taktak lio le a kapkap in an zawrchuk lio  cun a raltak a simi le a  innpa a simi England cu doh a hau hoi rih caah ral hriamhrei le minung thazaang thawnder ding caah tangka tam taktak a herh lio pi cu a si.Mah khakha US president Thomas Jefferson nih an rak hmuh cia khawh i a rak tuaktan khawh cia fawn.

Mah Louisiana ram kaupi an cawk hnu cun Hlutdaw milai tampi nih US phung he aa kalh tin an hna an tlakpi loin nain Thomas Jefferson nih a nawl ngeihnak hmang in phunning he aa rem ding le hnatlakpi khawh ding in a rak tuah khawh. Louisiana ram man hi a fawite mi a lo ko nain US ram ca cun cu lio cun biatak harsa ngai in an rak tuan hnu ceo ah a chuak khawh fang te a si. Europe bank kip ah an iherkual i tangka an cawi i an cham, cun cu an cawk hnu in kum(20) tiang an cham hnu lawng ah a dih.Thomas Jefferson a tuan chung ah US ram caah ro pakhat a vuih ta hna i tuanbia ah a tang beh

Cu bantuk cun khua thukpi in a ruat kho mi le a tuaktan thiam mi hruaitu  nih cun zei te hmanh si rih hlah hmanh sehlaw a hnu techinfapar chan ah a sunglawi bik le man a ngei te lai timi an tuak khawh cia i micheu tu nih cun chikhat an harsatnak ruang ah a man a sung te hna ding tiang zong kha ruah phaan loin an rak zuar diam ve ko.
Betchap: Alaska le Hawaii zong khi US ram a rak si rua lo a hlan cun. By- Kyaw Min Aung lehmi a si.Laaknak Ceuhmun Thang FB

Be the first to comment

Leave a Reply

Your email address will not be published.


*