USDP Le NLD Nih An Hmurkaa In A Chuakmi Bia Kha An Philh Lo Ahcun

2020 Myanmar Rampi thimnak ah coalition cozah a chuah lo zongah, USDP le NLD ah pakhat chingchang nih cozah an tlaih ahcun State cio ah Pyine Palai tambik ngeimi / Hluttaw ah palai tambik an duhmi kha CM ah an thim awk a si te lai.

Tahchunhnak ah Chin State ah CNLD nih palai tambik an ngah ahcun CNLD nih an duhmi kha CM ah an thim awk a si. Phundang cun  Hluttaw nih nominate a tuahmi  kha CM ah an thim awk a si. Hihi phunghram ning cun a si lo nain phunghram nih a kham hlei lo. Cucaah a cung i ka chimbang USDP le NLD ah pakhat chingchang nih cozah an tlaih ahcun a si khomi le a si awk a simi, a si fawn.

A ruang ; 261 cu USDP Cozah chan ah NLD nih remh an duh i USDP nih an cohlang lo. NLD Cozah chan ah USDP nih remh an duh i NLD nih an cohlang ve hoi lo. Nain an cohlan lonak a ruang an chimmi cu aa khat veve. USDP nih remh an duh lio ah tihin an chim. Tlangram ah Tlangmi nih Cozah an serkhawh nakhnga le Democracy dik tak a chuah khawh nakhnga Palai tambik ngei mi nih cozah ser awk a si an ti. Phundang cun Tlangmi kan dawt hna caah remh a herh tinak khi a va sawh.

Cun NLD nih remh an duh lonak cu tihin an chim ve. Tlangmi kan dawt hna caah 261 kan remh duh lonak a si an ti ve. 261 kan remh ahcun 25% ralkap + USDP nih cozah an tlaihmi a fawituk lai i tlangmi nih zei tik hmanh ah cozah an ser kho ti lai lo ti kan phan caah kan remh duh lo an ti. Ramkhel ahcun hi biafang hi voter pawl zeirel lo a va sawh. Voter pawl zeirel lo kha cu um rih ko seh.

USDP le NLD nih 261 remh duh le duh lo kongah Tlangcungmi a daw ngai bantukin an chim veve ko nain a takah cun anmah miaknak caah a si veve ko. Kanmak miaknak ti kha chimawk an that lo caah tlangcungmi kha siorawl ah an kan hman veve bia khi a si. Khah! Siorawl kong zong cu um rih ko sehlaw.

USDP/ NLD nih rampi huap in cozah ser kho hna aikun. 261 remhnak le remh lonak kongah an rak chimmi bia kha an lungthin in an ruah i an chimmi a si lo hmanh ah an hmurkaa in a chuakmi an bia a si cang caah tlangram ahcun palai tambik ngeimi party kha cozah an serter awk hrimhrim a si lai. Cu long a silo USDP siseh NLD nih siseh Democracy le Federal kong an aupi veve. A dikmi Democracy zong an aupi veve ko caah an aupi mi an zulh le zulh lo cu thimnak a dih lai i tlangram ah zeitin dah cozah an ser timi nih a fianter te lai.

Note: Hihi 2008 phunghram ning cu a si lo nain phunghram nih a dawn fawn lo caah Union ah cozah a tlaimi paoh nih an tuah khawhmi a si.Credit-Aceu-Salai Sang Ceu Lian

Be the first to comment

Leave a Reply

Your email address will not be published.


*