US ram cu phungning tein Khrihfa ram a si ti fehternak a um lo.

Curuang ahcun cozah phunghrampi zong mi zapi ca a ttha ding in an suai ko lai, Khrihfa calawng ruat in an suai lai lo. Khrihfa kan caah a biapi bikmi cu kanmah felte le zumh awktlak tein kan um kha a biapimi a si ko. Hi vawlei caah tlangcung i tlakmi khua bantuk le ceunak bantuk kan si kha a biapi ko. Kan pawngkam ah an duh ahcun nu le nu, pa le pa zong i um ko hna seh kanmah kan fale kha an i umh ve lo ding in kan cawnpiak hna kha a biapi mi a si ko. An duh le nau zong i phiat ko hna seh kanmah le kan fale kha kan i phiat lo a biapi ko i i phiat lo ding in kan i cawnpiak ding a si ko. Khrihfa cu kan innpa le mi vialte caah zohchunh awk tlak le tette ttha kan si kha a biapimi cu a si ko.

Nu le nu, pa le pa umh nan duh lo ahcun na innpa mirang le miphun dang hna kha i umh lo ding in va cawnpiak ko hna u. Laipawl cu mirang pawl hna nih nan innpawng um le innpa si zong an duh lo kha aw, khrihfa ttha kan si nan i ti nan. Nan innpa ca hmanh ah tette ttha le khrihfa ttha nan si kho lo cu. Mahlio ah US cozah  phunghrampi suaimi kong hna ah nan va buai lengmang i Trump sungh ruang hna ah nan lung a rawk tuk cu. Na chungkhar le na miphun le na khua cahmanh ah buai deuh law a ttha deuh lai. Khrihfa ttha na si khawh lonak ruang ah le Pathian ram caah na tuan khawh lomi ruang hmanh ah na lung va rawk deuh law san a tlai deuh hnga.

Nan fanu le nan fapa kha, an nu hawi le an pa hawi he an i duh lonak ding cawnpiak hna law a ttha deuh lai. Laimi lak zongah nu le nu a uarmi an um pah len cang ti si ko kha. Mah bang hna kha Trump a ttanh tukmi Lai chungkhar an si ko lai cu. Marka 10:9 chungah kan hmuhmi cu “Pathian nih a fonhmi hna cu minung nih tthen awk a si lo, tiah a ti.” Nu le va i tthen lo ding tiah Bible hmun tampi ah a kan cawnpiak ko nan US um Laimi nuva a tthenmi kan tamtuk cang hi aw. Mah bang hna hi fakpi in ruat deuh ding kan si.

US ram ah Khrihfa karh u sih, zor hlah u sih ti nan duh ahcun nan innpawng i zum lotu pawl kha Pathian thawngttha va chim hna u. Va cawnpiak hna u. Pastor rian lawng a si lo. US ramah Mormon Khrihfa bu le Jehovah Witness Khrihfa bu hi a karh rangbik an si. Aruang cu mi innkip ah an va leng hna i Khrihfa biaknak an va cawnpiak hna, Bawi Zisuh kong an va chimh hna. Khrihfa ttha le a feltukmi le a piangthar tukmi kan si nan i ti ahcun mah ti khan va tuah ve u.

Na rianttuannak i na hawile ramdang pawl kha nu le nu, pa le pa umh a tthat lonak zong va cawnpiak ko hna. Cozah thiltuahmi dohlawng tthawng ding si lo. Cozah caah pakhat hmanh kan tuah kho lo. Cozah caah thlacam ko cucu na rianttha bik a si ko. Obama nih nu le nu, pa le pa umh a onh hlan in a ummi an tamtuk cang. Zaangfak an si, kan minung hawi an si ve, right an nei ve, Pathian muikeng an si ve a ti ruangah a onhmi a si ko lai.

Mah minung hawi dirhmun a ruahpiak hna caah a si ko. A duh lomi, a pom lomi Khrihfa nih cun an zul hlei lo, an pom hlei lo, an i um hlei lo. Paul nih a chimmi cu “Hi vawlei kalning hin kal ve lengmang ti hlah u” (Rom 12:2) ati bang kanmah kha felte le zumh awktlak tein Khrihfa kan sinak ah kan um kha a biapimi a si ko. Ka pehtthan te lai.Credit-Van Tum

Be the first to comment

Leave a Reply

Your email address will not be published.


*