US ka rak phanh ka le Cozah bawmhnak

US ka phanh ka ah Cozah nih bawmhnak an ka pek mi ka rak khirh than hna.US phanh ka ah hin Cozah nih thla 4 chung hi cu  tha tein mi zei paoh bawmhnak pek a si. Inn chungkhar sining le dirhmun nih a neih cio i a kum tampi zong bawmhnak pek mi an um ve. US kan phanh ka hrawng rian a rak har ning Minung 20 /30 tiin rian kawl ah kan rak kal tawn.

US ka rak phanh ka ah zung nih bawmhnak an ka pek mi ka rak khirh than hna i an khua ruah a rak har ngai ngai. Thla 3 chung bawmhnak an ka pek thla 4 nak bawmhnak an ka pek ah rian ka tuan i rian ka nei cang, cu caah zung nih bawmhnak an ka pek mi i lak ti loin ka rak khirh than hna.

Kan zung ah Rev, Ngun Awi fanu Monica Mawte khi a rak tuan i cu hlan cu kan i thei bal lo Kan zung ah a tuan zong ka rak thei bal ve lo. Bawmhnak an ka pek cia mi ka khirh than hna hnu lawng ah kan i thei.

Monica nih phone a rak ka chawnh i bawmhnak pek cia mi na kan pek than cu kan zung riantuan mi vialte an khua ruah a har dih cu caah ton le hmuh bia ruah an in duh zung ah rak ra a ka ti. Nan zung le ka um nak khua a hlat ngai i ka ra kho lai lo, bawmhnak nan ka pek mi kan khirh than nak hna a ruang cu rian ka tuan cang i bawmhnak i lak lengmang kha a tha lo ka ti caah a si a tiah ka leh.

Cu zong ahcun Mirang kan zung riantuan mi pawl nih an duh lo i ton le hmuh i bia ruah kan in duh nangmah bantuk Minung kan hmu bal rih hna lo zung ah rak ra an ka ti than.

Ka hawi le ka sawm hna i zung ahcun an rak ka kal pi bia an ka hal mi cu zei ruang ah bawmhnak kan in pek cia mi hi na kan khirh than tiah an ka hal. Ka leh mi hna cu kei cu rian ka tuan cang cu caah bawmhnak hi i lak lengmang hi a tha ah ka ruat lo. Kan mah bantuk mi har bawmh a hau mi an tampi ko tiah ka rak ti hna. Kan zung riantuan mi pawl an khua ruah a har dih kan zung riantuan mi an dihlak te nih nangmah bantuk hi kan hmu bal hna lo an ka ti an dihlak zung riantuan mi nih bia an rak ka hal i bia an rak ka ruah len.

Cu lio ahcun ka farnu nih cei lak tein a rak ka phawmh len ve, kan hawi zeitindah bawmhnak kan hmuh khawh lai tiah an i zuam ah nang bawmhnak pek cia mi khirh than hna cu na fim ter a rak ka ti. Ka leh mi cu fim ter le hruh ter a si lo, bawmhnak ti mi hi fawi tein ruah le i lak ding a si lo. Kan hawi Minung nih rethei le zaang ba ngai in an tuan mi a si. Cun kan mah lawng hi bawmh a hau mi kan si lo, Vawlei Cung ah bawmh a hau mi Minung an tam tuk ka rak ti.

Rian ka tuan tlawmpal ah IMO ah leiba ka cham dih hnu ah US ka phanh khawh nak le ka phanh hnu ah zong ah tuanvo a ka la tu hna( Lutheran Immigration and Refugee Service ) nih bawmhnak an rak ka hal ve.

Vawlei Cung ah nangmah bantuk in harnak a tong mi le a har mi an tampi cu hna caah na sian tawk rak bawm ve hna ti a si. Rian ka tuan ka a si caah zei hmenh neih mi zong ka rak nei lo, a si nain khua ka ruah mi cu kan nih zong midang nih a kan bawmhnak thawng in hi ka hmun le Ram hi kan phan ve, kan si khawh tawk cun kan bawmh ve hna ding a si ko ka rak ti. ( Lutheran Immigration and Refugees Service) pawl cu $200 ka rak kuat ve hna. Cu lio ahcun $1,000 hmenh ka rak nei lo.

Minung hi kan mah ca lawng taktak a ruat mi kan si ko ahcun sertu Pathian zong hi kan zum taktak hnga maw ka ti. Cu lawng si loin kan sining i philh hrim hrim hi khrihfa nun he cun a kalh zungzal mi a si.

America ram kan phanh tik ah zei ti lam in dah ka phanh zei ruang set ah dah ka phanh a ho bawmhnak le zawn ruahnak thawng in dah ka phanh.

Kan phanh nak kum 10/15 a si cang zong ah kan hnu lei ah i mer tak in kan sining zoh than le cuanh than hi kan mah rian a si, Midang rian a si lo.Credit-Salai Ceu

Be the first to comment

Leave a Reply

Your email address will not be published.


*