US cozah le mipi sinah kan au khawhtawk

Laimi (Chinmi) hi khuaruahhar cu kan si ve ko, keimah telh in mu. USA kan phaknak kum 15 hmanh a tling set rih lo zapi cu. US ah Laimi hi 55,000 hrawng kan um hei ti ko u sih. Mah vialte lakah boih la (degree) a neimi hi 1,000 hmanh kan tling men lai lo ka ti. Mahcu kan si ko nan US minung million 328.2 cu kan duh poah in hruai kan timh ve ko hna, kan duhpoah in uk kan timh manh ko hna. US cozah le president nih an suaimi policy le ruahnak dang zong hehtiah kan soisel len ve ko. Mikip nih zalong tein biachim khawhnak nawl kan nei ti khi kan i lak khawh bikmi cu a si ko rua ka ti.

Kan theih ngaingaimi hi teh zeitluk khi dah a va si hnga ti ka ruat tawn. Kanmah duh poah in US cozah cu kalter kan duh i kal seh ti zong kan duh. US khua fate pakhat khi hei kan ukter hna seh law zeihme kan lawh hnga ka ti. Khrihfa cu kan umnak ram caah zeitluk in dah santlaihnak ka tuah khawh lai ti le zeitluk indah ka tthathnem khawh lai titu kan ruat deuh ding a si. Mahtluk in Khrihfa ttha i kan i ruat ko ahcun ziah Laitlang te zongah khan kan rak um ziar ko hnga lo ti hna ka ruat.

US ah Laimi hi milu million 1 hrawng hna hei um u sih law, kum 70/80 hrawng hna hei um chinchap u sih law zeikhi hme kan lawh hnga ka ti. Atu le atu US cozah hi sandah kan piah hnawh lengmang lai dah ka ti ko, kan duh loning in phunghrampi an suai le an kan uk can poah ah mu. Minak miphun nak in kan zual deuh lai ka ti. Kum 15 hrawng kan um hmanh ah mahtluk in kan phunzai va si kaw. Minak miphun te hna cu US ramah kum 350 leng an um cang. An buai zong ah buaiphu an si. Sal i an tuahto ning hna le thleidannak faktuk an rak tuarmi te hna kan thei lo, kan rel lo, kan tuakpiak hna lo. Nang le kei nizan naite i a phanmi hmanh mahtluk i kan phunzai le kan buai hi mu.

Keicu sianginn ka kai lioah ka ti khawh tawk tein mirang ka hawi le le ka sayate sinah hehtiah ka chim tawnmi le ka ttial tawnmi hna cu:

1.Zarhpi ni cu a thiang i Bawipa Pathian thangtthatnak ni ah hman ding a si bang US ah dawr le company vialte khar dih ding a si i rian zong ttuan lo ding a si tiah ka ttial lengmang tawn. Kan hawipa mirangpa nih a ka lehmi cu Van, zarhpi ni dawr khar le riantuan lo ding le company khar dih ding cu a si kho lai lo. Cunak cun kan member cio hi zarhpi ni ah thilcaw hlah u ti hna u sih law a ttha deuh lai a ka ti.

2.US cozah nih phungning loin a lutmi le US minung sinak a nei lomi poah riantuannak nawl a pek lomi hi a dik lo, a hman lomi a si. Kan Bible cawnpiaknak he zong a tlak lo ka ti hna. Aruang cu kan Bible nih rian fakpi ttuan ding a kan fial/a kan cawnpiak. A ttuan lomi cu ei hlah seh titiang a ti. Cucaahcun zei bantuk minung a si hmanh ah US ram chung i a um cang komi cu rianttuannak nawl a pek dih hna awk asi ka ti ttheu.

3.Khrihfa bu nih phungning loin a lutmi le rianttuannak nawl a nei lomi hna hi hehtiah rian a kawlpiak hna i a si khawh chung in a bawmh hna awk a si ka ti tawn. Rian zong an kawlpiak hna i an pek hna awk a si ka ti tawn. Cheukhat Khrihfa bu cu a tuahmi zong an um ve ko. A tamdeuh cu an tuah lo ti khawh a si. Khrihfa bu nih cun phungning in a lutmi le phungning loin a lutmi a thleidan hna awk a si lo ka ti ttheu. Bawmh kha a rian a si ko ka ti.

4.Homeless (inn le lo a nei lomi) pawl hi US cozah nih a ti khawh tawk in a bawmh hna awk asi ka ti tawn. Inn zong a sakpiak hna awk a si ka ti tawn. Silole ei le din, le rian zong a tuakpiak hna awk si ka ti tawn. US ah inn le lo nei loin a vakmi hi ting 5 leng nawn an si.

5.Nan pitar le nan putar pawl hi pitar putar umnak inn ah chia hna hlah u. Aruang cu an zumhnak Khrihfa biaknak hi an tufa hna sinah peknak le chimhnak caan an nei lai lo ka ti hna. Timote zong a pi sinin Khrihfa cawnpiak tthattha a lak ka ti hna.
6. Pumh nan daithlang tuk. Kannih Chin state ahcun hngakchia he upa he pitar putar he biakinn ah kan i pum dih ka ti hna.

US cozah suaimi phunghrampi kong i kan buai len nak in kan ti khawh tawk teah buai u sih law a ttha deuh lai i san zong a tlai deuh lai. Kan pawngkam ah remhding le chimding a tamtuk. US cozah nih kan aunak aw a theih lo dingmi kong hna ah hehtiah kan buai ve cu. The White House (innrangpi) zong email kuat khawh a siko. Na duh lonak cu innrangpi zongah email kua ko. Keicu Obama kha voi tampi ka kuat hnuah voihnih ka email kuatmi a ka leh. Trump zong voi tampi ka kuat nan a ka let lo. Kan siarem lomi le a ttha lo i kan hmuhmi cu kan pawngkam i mirang pawl sintal ah chim ve ding a si ko. Keizong sianginn ka kai lioah hehtiah ka hawi le mirang pawl le ka sayate sinah ka ttial lengmang i ka chim lengmang ve ko.Credit-Van Tum

Be the first to comment

Leave a Reply

Your email address will not be published.


*