Update news Hakha Ralkap sakhaan ah Hluttaw Speaker Pu Zo Bawi tel in Minung 4 hren an si rih, Minister Housing in February 4 ah chuak dih u, an ti hna

Hakha Rungtlang Ralkap Sakhaan (266) ah Hluttaw Speaker Pu Zo Bawi, Hluttaw Vice Chairman Pu Tic Thang, Sipin le Electric Minister Pu Soe Htet le La-Wa-Ka Minister Pu Phwe Arr cu February 3, zinglei 9:00 tiang hren an si rih i a dang zong atu Minister Housing (Vuanci inyar) in February 4 ah chuak dih u, an ti hna, tiah kan theih.Chin Ramkulh Chief Minister Salai Lian Luai tu cu February 2 ah an thlah than cang, tiah kan theih.

Hi kong ah Hakha Ralkap lutlai (Beuharhmu) U Thant Zin Oo nih, “Zeitik tiang hren ding le thlah than ding an si cu kan hngal kho ve lo,” tiah The Hakha Times ah a chim.

Minister Pu Sui Thio nih, “Keimah, Minister Pu Pau Lun Min Thang, Minister Pu Vui Kaw, Minister Pu Mang Hen Dal cu an kan thlah ko. An sakhaan an kan hren lio ah rawl tha tein an kan pek ko. Kan thitum-kai tiang in an kan zohfel ko. Ministers 4 hi an kan thlah. Minister Pu Phwe Arr belte hi an hren rih ko rua, an thlah ti thawng ka thei lo. Anmah ralkap nih an kan ti ning ahcun, February 4 khi nan umnak inn in chuak dih cang u. Khual tlawng hlah u. Chungkhar he hmun khatte ah um ko u, an kan ti,” tiah The Hakha Times ah a chim.

Ralkap nih February 1, zing ah kum khat chung nawlngeihnak an laak. “Kum khat hnu ah thimnak kan tuah than lai i a tei mi party sin ah nawlngeihnak kan pek te hna lai,” tiah an thanh. Atu hi Chin Ramkulh Cozah in tuanvo ngeitu upa minung 4 zong Rungtlang Ralkap sakhaan ah hren an si rih, tiah kan theih. biakilh: Share le reference pe loin copy-paste sawhsawh kan siang lo.
Credit-Tha Hakha Tims

Be the first to comment

Leave a Reply

Your email address will not be published.


*