Zeizawng vialte thap in nangmah le Miphun le ram ca ah a ngeihmi dihlak thaptu CDF/CNA pa khi zeitindah na ruahtawn i na hmuhtawn!

CDF / CNA le Christmas.Kan hngah hlangmi X’mas cu a nai chin lengmang; thinlung ruahnak le mikip kan  sining kan nun ning kan khuasakning ai thleng,  thilthar ruahnak thar he khua kan sa  hna, a sinan CDF ram dawtu pasaltha, zapi nih kan hmurka lawng in tuan awk ah kan ruahmi rian ai hmaithlaktu hriamtlai hna cu lilennak in an khat!

Mah le khua peng le tlang, ram te ah X’mas  kan nih vialte kan hman khawhnak hnga, kum dang voi dangah angki thar le thilthuam thar he a hmang ve tawntu kan mino CDF le CNA cheukhat cu an tlaih ballo mi mei alh a chuak khomi hriam i tlaih in ralhmun ah an um cuahmah ko rih lai.  Minung sinak nuamh duhnak lawng in khuaruah ve ko ahcun hriamchiah ta in mah le semnak khua te cio ah X’mas hna cu hman ve a fawi te.

Nain ram dawtnak thinlung biatak tein a ngeimi ca ahcun a harsa taktak,  keimah tello in cun ka hawi le nunnak pakhat a liam kho, keimah tello ruangah ka hawi le minung tampi ai tello kho an si ve! A ruang cu hi minung tlawmte ram dawtu hi cu kan i dawt a hau, kan i zawnruah i pakhat le pakhat thazaang kan i pek a hau fawn.

Ka chungkhar, ka khua ka inn lo ka dawtmi, ka nu le ka pa u le nau ka kaltaknak a ruang cu ka sian ruang ka dawt hna lo ruang, khua ka ruah lo ruang ka pianthar lo ruang Pathian ka theih lo ruang a si lo, ka minung hawi vialte nih an tuan duhlo mi le tuankhawh lo mi rian kha mizapi caah tuan ka duh ca ah le ram ka dawttuk ca ah a si ko.  Abraham nih tefa tampi a ngeihnak lai a khua Ur khua cu a chuahtak bantuk in kan Miphun tefa kan karh i a ngandamnak lai kei ka chuahnak hi a si ve ko.

Dawtmi u nau hna faktaktak in khuaruat tuah hna usih!  Nihin Kan chuahtakmi Tita,Thantlang khuapi hna a kan hngahpiaktu kan Paraltha rual konglam hna kan lungah a chuak bal maw?  A kingmi a rehmi khuapi hlun ah X’mas khamhtu chuahni sunglawi an hman ding hna khi na ruat maw?  Pathian na thangthat khawhnak ding ah le Nuam te le lawmtein chungkhar tling in tirawl nan i hrawm khawhnakding, Bawipa chuahni nan don khawhnakding ah an kilvengtu kong hi na ruat bal maw?

Cu an vengtu Nangmah khua ai awhtu,Na chungkhar caah nunnak thaptu  Duty ciahmi Raltumi hriamtlaimi pa cu a ho dah si!  Nangmah le chungkhar zawn ah ruat hmanh!  Tuzing tuzaan ah hin na fanu na fapa Bawipa chuahni zingah tirawl na hrawmpi khawh lo dingdir hmun ah i chia ta law; nangmah ai awhpiaktu Paraltha hna an chungkhar kong na ruat kho maw? Mitthli luan lo awk a tha lo hih!  Na thluachuah na hrawmh hna lai lo maw nangmah ai awhtu Paraltha hna chungkhar cu an ca ah Bawipa sin bawmhhalpiak hna na philh caan hna um maw?

Bawipa Biak – inn ah kalding in Thilthuam thar he na kal khawhnakding a hrampi na philh maw? Nangmah thilthuam thar he Bawipa na thangthat khawhnaklai, a ngeihchun nunnak pakhat te rezap ngei lo an thappiaktu CDF/CNA pa cu hriamnam le Ralkap Uniform te he Kuan le zenlak ah heh tiah thlanti he a hramkiar mar lai, cu pa konglam te cu na philh maw?  Na ai awh tu fanu  fapa te kha Khamhtu chuah nizing ah khin  a hringtu a nu/pa /u lenau hna nih zeitluk in an sin  um ding in an hlam ve lai?

CDF/CNA Pa i Ralhmun meithal i tlaihpah in khin teh a khuaruahning ding, a thiungruahnak khoi ka a phaknakding teh na purhpiak kho maw?  Zeizawng vialte thap in nangmah le Miphun le ram ca ah a ngeihmi dihlak thaptu CDF/CNA pa khi  zeitindah na ruahtawn i na hmuhtawn!   CDF/ CNA an i pumpeknak hi cuhlan ah nai fian lo hmanh ah Tutan X’Mas tal in cun i fiang!  Mifanu Fapa an dirhmun mi inn chungkhar an dirhmun ding cio zawng ruat usih! Hmurka nak in zeipoh hi tuahsernak a biapi!

Kei cu Ka Ralkap hawi, ka mino hawi, ka riantuanti hawi, ralhmun ah X’mas an hman lio ah mah le khua cio ah siarem ko in X’mas hman ah tlun diam le um diam ko cu ka thisen nih a ngamh lai lo. Ram ca ah kan i pumpek ahcun ram le kan minung hawi nih a kan herh cemlio ah kan i hlam awk a si ko tiin ka hmuh.  A hlei in mino kum 16 in 30 kar tete ka mino hawihna hriamnam he Bawipa chuahni an hman lio ah daidup vok le siasa rak ei i mah ca lawng khua ruah in cawlcangh cu ka ngamh lo. Bawipa nih kan thinlung a theih ko!  Kan thinlung chungtu ah X’mas cu kan hman lai i kan kut kan ke kan ka ahcun Hriam le kuan zen he midang an himnak lai mitthli khuaruahnak vak he Naute Jesuh chuahcu kan don te ko lai.By : Salai DK

Be the first to comment

Leave a Reply

Your email address will not be published.


*