Yangon a dai cang, khuapi tampi an đại cang, jet vanlawng cu kan tei kho lai lo, tiah Kawl he Lai he an au zong ah I donhter ding a si lo.

lungchuak dohthlenak_le_teinak
Soviet Russia nih zapei hum khat hmanh a tling lomi a innpa Finland cu ramri an i hrawmnak hmun zeimawzat kha Russia ram hmun dang he i thlen ding in a rak hal. Finland ramri he ai naih tukmi Russia khuapi pakhat a si mi Leningrad (atu St. Petersburg) humhimnak caah tiah a rak ti.

Hi lioah Russia mipi hi million 300 renglo an rak si i Finland cu million 3 hrawng lawng an rak si. Ralkap thazaang tiah le a let tam tuk in an rak i thlau tikah Finland nih al ngam dingah Russia nih an rak i ruah lem lo. Nain an i ruahning an rak khel hna. Finland nih a ram zung khat sungh hmanh a rak i tim lo.

Tikah, a thin a phawh i Russia nih Finland cu a ralkap tamlak he a rak luh hnawh. 1939 November dih ah a rak si. Vur tlak lio, a kih saling a si caah The Winter War ti zong ah an kawh.

Thla thum chung an i tuk hnu ah an rak i ngol. Russia nih tlak cil in a cil lai tiah an rak ruah nain Finland nih ruahlo ning leng in a rak kham khawh. A thì le ai hliam Finland ralkap thong 80 hrawng an si. Russia lei in sing li hrawng a thi le ai hliam an rak phần.

Ral a rak dih ah Russia nih a rak halmi ram nakin tam deuhpi a laak pin ah ram thlennawn zong a rak um lo. A thimi minung ah Russia a let tampi in an rak tam. Finland nih a ram zeimawzat a rak sung ve.

Ral a dih hnu ah Finland nih Russia a rak dironh kha a hau hme maw? Rak dironh lo in Russia nih a halmi kha al loin ram rak i thleng hna seh law a hlawk deuh hnga lo maw? A dironh ruang ah a ram tam deuh a sungh pinah Russia nih ram a thlen lo tikah Finland caah cun sungh li le sungh nga a si ko lo hme maw, tiah biahalnak tete a chuak tawn.

A tlang an kawmnak cu a rak dironh mi kha a hlawk ko, ti a si. Rak dironh hlah seh law ngol hngal loin hna a rak hnawh peng lai, an ti. Ramri kong ah an hlawk lo, nain, rim lak in Russia an rak tuah ruang ah an ram ah daihnak mang an rak man kho.

Hi nih a langhter mi cu miphun fa le ngan deuh i doh tikah teinak timi khi phun tampi in a um kho. Acozah thlak lawng kha teinak a rak si lem lo. Duh paoh in ti awk an tha lo, timi theihter zong kha teinak phun khat a rak si tawn ko.

Yangon a dai cang, khuapi tampi an đại cang, jet vanlawng cu kan tei kho lai lo, tiah Kawl he Lai he an au zong ah I donhter ding a si lo. Chinram ah kan ralkap hna an tthawng, mipi nih an dirkamh hna, timi khi a biapi mi a si.

MAL tlak le tlak lo cu Kawl pawl cung ah ai hngat.

Kan temtuar ko lai. Nain Finland le Russia ral bang, Kawl nih Chin mi hna hi duh paoh in ti awk an ttha lo timi an fiannak a si ahcun kan caah teinak nganpi ti awk a ttha te ko lai.Crd.Mang Hram Kung

Be the first to comment

Leave a Reply

Your email address will not be published.


*