Voikhat cu a kum upa pah cangmi nungak pakhat le a tar pah ve cangmi tlangval pakhat khual tlawnnak lampi ah an i tong,

Voikhat cu a kum upa pah cangmi nungak pakhat le a tar pah ve cangmi tlangval pakhat khual tlawnnak lampi ah an i tong, an khual lam aa khah caah lampi thluangthluan bia an i ruah ciammam cu an lungthin a rak i khat tuk, an i kom thiam ngai te.

Zanlei mui lai ah khua pakhat an va phan, vanchiat ah mah khua cu khual an rak tam tuk i riahnak hotel vialte mi an rak khat dih cang. An kawl lengmang i riahnak a lawngmi pakhat te an va hmuh. Asinain mah zong cu khan tampi a lawng ve ti lo, khan pakhat te lawng bak a um ve cang. Hotel ngeitu nih cun khan khat te lawng a lawng i nan duh si le khan khat ah it ti uh tiah a ti hna. Thim ding lam dang hlei an ngeih lo caah nungak nu le tlangval pa cu aa theih bal lomi an si ko nain, hmun khat ih ti ding cun khan cu an hlan.

Khan khat ah an it tti ko nain an karlak ah chantling pakhat te an dan i taksa i tong lo tein an it. Zan khuadei cu pakhat a cawl paoh ah zeidah tuah hnik aa timh hnga ti an i ngiat nak ah i hngilh lo tein zan khua an dei, nain zeihmanh an cang lo.

A thaizing zingka cun an khual lam aa khah rih caah kalti dingin an i thawhthan. Lam cu an kal i tiva pakhat an phan. Vanchiat ah tiva hlei hmete an rak donhmi cu ti nih a rak fenh caah kalnak a um ti lo. Thing ka lak lai i ka donh lai ti ah le lak ding thing hrimhrim an pawngkam ah a um fawn lo. Varal lei tu ahkhin thing a saumi pawl kha tlangval pa nih cun a hei hmuh.

Tlangval pa nih cun pa can cuh in nungak nu te cu tiva hi ka per lai i khat lei varal ka phak tu in thing ka phah lai i na rak ra te lai tiah a ti. Tlangval pa cu tiva khor per dingah cun biatak tein aa tim, a angki aa phawih, a bawngbi aa bil thluahmah. Mah lio ahcun nungak nu nih bia pakhat te a chim. Cu bia pakhat te ruang bak ah cun tlangval pa cu tiva khor per ding aa timhmi zong a ngol, i ngang ko in a thu diam.

Nungak nu nih a chimmi bia te cu nem tein a chimmi si ko nain a fak tak ve, “Zahan zan kan karlak a ummi chantling hmete hmanh na per khawh lomi, tiva khor pi cu zeitin dah na per khawh lai i,” tiah a ti diam ko.Nawl Hre

Be the first to comment

Leave a Reply

Your email address will not be published.


*