Va a ngei kho lomi Lengțul pakhat cu ruah lopi in fa a pawi.

Part 1.Va a ngei kho lomi Lengțul pakhat cu ruah lopi in fa a pawi. A voikhat fa pawi a si lawng si loin lakfa pawi a si caah a ning a zak i a paw kha a thuh peng. Nain thla nga a vun si cun thuhpheh awk a tha ti lo. “Aho fa hme a pawi hnga? Anih fa khi a si hnga maw? Mah pa fa khi a si ko lai” tiah a phunphun in an khuami le a hmutu paoh nih a kong an ceih cang. A si, lakfa pawi cu hmai a hngal lo tuk hrim cu mu.

Asinain fa a pawi kha a ningzak pah ko hmanhseh law a lung chung te cun aa lawm tuk ko. Zeicatiah fa a pawi cu amah nih timh ciammam tein a pawimi a si caah. Zeicadah timh ciammam cun lakfa cu a pawi ne?

Atu ah ka nu hi a zawtfah ah siseh, a eidin kongah siseh, a khuasaknak le zeizong te kong in keimah nih ka zohkhenh i ka cawm bantuk hin ka upat, ka tar tikah zohkhentu fa ka ngeih hrimhrim a herh ti a fian caah a si. Ka cutzat hlan ahcun ka nu nih a ka cawm, a sifah santlai lo buin fale caah a țha bik a tuah khomi kha a ka tuahpiak peng. A fale caah mi do a cawi, mi tang a kun. Ka fale caah fangkhat hnih tal a țhathnem lai tiah mi lo thlawhpiak in siseh, mi thil sukpiak in le a tuah khomi le a thiammi paoh nautat lo tein a tuah.

Amah thazang nih a tlinh ti lomi ah a unau nih an rak bawmh, an rak dirkamh tawn caah mi hmaiah mualpho ngaingai cun khua a kan sakpi lo. Nu nukhat le pa pakhat chuahpi a uanu hmanh si hna sehlaw bawmh hau in um lengmang kha ka nu zong nih an hmai a khap ve tawn hna lo. Ka nu cu a sifah santlai lo zongah fanu keimah a ka ngeih hi a vanțhatnak a si. Ka cuza cang, ka nu zohkhenh le cawm cu ka rian a si.

Asinain keimah ka hung upat, ka thazang a vun der i rian ka tuan kho ti lo tikah ahodah a ka zohkhenh lai, aho nih dah a ka cawm lai? Atu ah kum 40 ka tling deng cang. Va ngei loin fapawi ningzahnak le nihsawhnak vialte cu ka tuar ngam hrim a hau. Atu fa ngei kho ka si lioah fa pakhat tal cu ka ngeih hrimhrim a hau tiah biakhiahnak a tuah.

A thla a tling i fanu duhnung te mui a vun hmuh ni cu a pawi chung i kongceih, thangchiat, ningzah le thlanglamhnak vialte a philh dih cang. Aa lawm tuk hringhran. Ka chunmang cu a takin a tling cang. Hi ka fanu hi ka nunnak a si tiah a phunphun in aa lawmhnak cu a chim. Fanu fapa ngeih tik i kan nu le an i lawmhnak reru khi zeihmanh nih a tluk hrimhrim lo. A fanu te he cun…… Ka peh than te lai. Crd-Biak Mawng

Be the first to comment

Leave a Reply

Your email address will not be published.


*