US um mi Laipa nih a nupi a velh lengmang

Cakuat ka don hoi. US um mi Laipa nih a nupi a velh lengmang. Velh sawhsawh hmanh si loin a thi chuak lak tiang a velh tawn rua. An nu nau a pawi lio zongah a velh i a thi a luang. A nau a rawk maw zeidah a cang ti a thei rih lo.

Mah cu zei tin dah kan tuah ah a ṭhat lai tiah ruahnak an ka hal i ka leh mi hna cu, a kal tak ah a ṭha bik ka ti. A kal tak duh lo le palik chonh i thongthlak ding a si ko ka hei ti.

Mah belte an nu nih khan nu le va i ṭhen kha sual tukah a ruah, palik chonh te hna kha ziachiat tuk ah a ruah cun an pa loin US ram i khuasak kha ka sining nih a phan lo tiah a ruah i a in peng ko.

Velh a tong peng mi nih luat a duh ahcun a mah nih hmasa bik ah a lung a khiah a hau. Luat ka duh taktak maw, velh peng hi ka celh lai maw timi a tuak dih cikcek hnuah bia a khiah a hau.

Bia a khiah dih hnuah a lengah mi bawm kho tu hna sinah a chim le a phuan a hau.

US ram te hna i taksa fak le thinlung fak in kan vale kan i velh ter peng rih ko hna ahcun a ai kho deuh ti lo. A veltu cu a palh cia an si zungzal caah sual phawt len khi ka huam ti lo.Crd-Lainu Dawtu Ar Bor

Hakha Peng Ah Ngafuan Ruh An Khap, A Rutmi Tangka Kyats Sing Tam Ngai Dan An Tat Hna

Chin ramkulh, Senthang peng ah October thla chung ngafuan ruh an khap, a rutmi cu tangka tam ngai dan an tat hna, tiah theih a si.

Senthang peng khuate upa pakhat nih, “October thla cu nga an tit lio a si pinah an keuh i a runrun in nga an fuan thla a si. Cucaah kum fatin ngafuan ruh kan khap tawn. Chimh a ngai lomi hna nih a thli tein ngafuan a rutmi zong cu an um ve. Asinain a ruttu kan hngalh hna ah cun dan kan tat hna,” tiah The Chin Post ah a chim.

Nga an fuan thla ah cun ṭuanvo kan i phaw i ngafuan a rutmi an um le um lo tiva in kan bawh hna, kan ngiat hna. A bik in October thla chung hi kan khap, facang hleh a zaat November zarhhnihnak hrawng ah hin ngatlaih kan onh ṭhan te lai, tiah senthang peng khuami pakhat nih a chim.

Nga an fuan thla ah khuami lawng si loin khualdang mi zong nih Bawinu tiva ah ngatlaih a ngah lo i, ngatlaitu le ngafuan a ruttu an hngalh hna ahcun tangka kyats sing 1-3 tiang dan an tat hna caah a liam duh lomi an um ahcun CDF sinah khua upa nih an phuan hna i, CDF nih ṭuanvo an lak hna, tiah theih a si.