Update::Falam No.1 Sianginn Pawng Kahdohnak Ah SAC ralkap 3 An Thi Tiah CNA Nih Chim

Chin ramkulh Falam khua No. 1 sianginn pawng ah a ummi SAC ralkap pawl cu, CNA nih kan kah hna caah SAC lei in 3 an thi, tiah CNA chimphuannak nawlngeitu Salai Htet Ni nih a chim.

January 18 zanlei sml 3:00 hrawngah No.1 sianginn ah umhmun a khuarmi SAC ralkap cu CNA nih an kah hna caah 3 an thi i, 1 hliamhma fak ngai a pu, CNA leiin a thimi le aa hliammi kan um lo, tiah Salai Htet Ni nih cun a chim.

Kaphnih kar kahdohnak a chuak i siangngakchia nu pakhat cu a phei ah meithal kuan nih a khen pinah sangchung mi 30 hrawng zong SAC ralkap nih an tak tlaih hna.

January 18 zanlei sml 3:00 hrawngah Falam khua chung um SAC ralkap pawl cu, CNA nih an kah hna caah palik 1 a thi i 4 hliamhma an pu. Cu kong he pehtlai in Chin National Organization(CNO) nih a tanglei bantukin cathanh an chuah.

Cu kahdohnak kong ah CNO/CNDF nih kanmah he pehtlaihnak zeihmanh kan ngei lo. Falam khua chung kahdohnak a si caah Falam peng he aa pehtlaimi hriamtlai theihternak an kan tuah lomi hi CJDC nih zulh phung sermi an buar, tiah CNO nih cun an langhter.

Falam peng chungah CNO/CNDF nih nawlpeknak a silole ceihkhannak um loin kahdohnak an tuahmi cu kan cohlang hrimhrim lo. Hi hnuah atu bantukin theihternak an kan tuah lo i kahdohnak an tuah rih ahcun a herh ningin dantatnak kan tuah hna lai, tiah an langhter.

Falam khua chung No.1 sianginn um SAC ralkap kahdohnak kong i CNO/CNDF nih cathanh an chuahmi kong ah CNF/CNA nih phung ning in bialehnak an tuahmi an um lo, tiah theih a si.The Chin Post