Tuluk: Ngaknu Pahnih le Pastor Pa

Tuluk communist thonginn cawngtu nih Pastor pa le nungak pahnih hna cu an auh hna i, ngaknu pahnih cu a hmaiah an dirter hna. Pastor pa cu, kap hna law nang cu kan in luater lai, tiah an ti.

An pawngah thongthla dang pakhat cu a dir i a zoh ko hna. Ngaknu pahnih cu a zoh hna i, an i dawh tuk nain an hmai cu a daang dih. An zumhnak an i leet duh lo caah cun thah ding cu an si.
Pastor pa cu khua a ruat i a chimmi cu, “kan pathum in thihnak cun kei ka nun i Pathian rian ka tuan ahcun a tha ko lo maw? tiah a ti hna.

Ngaknu pakhat nih a thawh i, “ Nan kan thah hlanah na sinah lawmhnak bia chim kan duh. Cucu nangmah nih Khrihfa nan kan siter i, tipil zong na kan pek. Bawipa zaanriah zong kan hmang cang i kan i lawm tuk. Pathian nih thluachuah in pe ko seh. Na kan cawnpiakmi cu Khrihfa hi kan sual kho ve ko na rak ti. Cucaah kan kong na ruah tikah Judah bantukin na ngaih chia hlah sehlaw, Peter bantukin vun i ngaichih te hlah. Kan cung i na ruahmi le na tuahmi ah kan thin a hung lo. Kan in ngaihthiam dih. Lunglawm tein kan thi ko lai” tiah an ti.

Pastor pa cungah setan a luh caah nungak pahnih cu a kah hna i an thi. Cu tlawmpal ah ralkap nih amah zong an thah ve.(Ref:The voice of martyrs, p.121)

Kan Bawipa Jesuh nih Johan sinah a chimmi cu, “Na tuahmi kha ka hngalh ko; a kih zong na kik lo, a lum zong na lum lo. A kih zong kik lawlaw, a lum zong lum lawlaw law ka duh. A lum menmen na si i a lum zong na lum lawlaw lo i a kih zong na kih lawlaw fawn lo caah, ka kaa chungin kan chak lai.” (Bia.3: 15-16) tiah kan hmuh.
A tu kan caan hi zeibantuk dirhmun chia kan dir zongah kan Bawipa Jesuh nih fek tein dir hna seh ti a kan duh. Amen. By Rev. Sang Uk Cung (GS, CBA, Kalaymyo).

Be the first to comment

Leave a Reply

Your email address will not be published.


*