Tulio ah, Victoria camh cu Ralhrang hna nih van bom in an den cuahmah

Vawlei ralpi pahnihnak lio ah England ram cu thirthir phangphang in a rak um. Khua a muih cem caan a si tiah atu tiang an chim. Cu lio ah Germany sal si nakcun thih tiang doh a duhmi le daihnak ser i Germany tang ah um a duhmi tiin phu hnih ah hruaitu hna an i ṭhen. An siangpahrang nih an phu hnih in Winston Churchill lawng nih a hruai khawh hna lai ti a hmuh caah an ram hruaitu ah a thim.

Raldohnak rian a hun i awt ka ah an ram tikluk Dunkirk um England ralpak sing thum le France ralkap sing khat reng lo hna cu Germany ralkap nih an kulh hna. England he a ṭang ṭi mi Europe ram hna zong nih a sung an khan cuahmah. Winton Churchill cu umtu awk hngal loin an ram hruaitu thing Neville Chamberlain le Ambassador Viscount Halifax nih an tuah. A sung khan ko usih tiah an an hngek chih. A ral bawi pawl zong nih, kan sungh ding a fian ko caah daihnak lam tu kan kawl piak ko tiah an nawl. A lung a hung dong ruahmah ve i Hilter he bia i ruah ding ah aa tim.

Remdaihnak ser i German kuttang um ding kong a chim lai zan ṭim ah an siangpahrang nih a inn ah a va len. Ahohmanh nih an in ṭanh ti lo zong ah keimah nih kan ṭanh peng. Na pawngkam i reng sang pipi han le na hawie sinah siloin mipi sinah va kal law German kuttang um an duh le duh lo na hngalh deuh lai, tiah ruahnak a cheuh i a lawi.

Churchill cu vawlei tang tlanglawng aa cit mi mipi hna sinah aa va peih ve. Mipi taktak nih German kut tang umnak cun thih an duh deuh zia a fahning kha a va hmuh. Cu thok cun ramrian ṭuantu parliament hna sinah, ” Hika hallkhan chung a ummi kan dihlak kan thih hlan lo Germany kan doh lai, tiah order a chuah.

Cu hnu kum nga a rauh ah Germany cu an tei hna i Europe ram cheukhat zong in an dawi dih hna (D-Day). Dunkirk i aa tap mi England e France ralkap sing 4 le thong sawmthum an khamh khawh hna. Churchill nih: “Ral teinak cu ralṭhatnak lawng in hmuh khawh a si. Ralṭhatnak cu ṭih ko nain a herh caah tuah a hau mi tuah a si,” a ti.

Tulio ah, Victoria camh cu Ralhrang hna nih van bom in an den cuahmah. Thisen a luang. zapi cu kan lau, kan thin a phang. Dunkirk tibual i aa tapmi ralkap hna bang kan ralkap hna cu thaizing ah zeidah a cang lai ti hngal loin heh tiah ral an do cuahmah. England mipi nih an ralkap hna chanhnak ah pumpak tilawng hme tete tiang in an pek.

Dunkirk tibual chuh khawh lo ding in erhtonhmi ralkap hna nih an doh ṭualmal ve. Pathian nih khuadom in a bawh hna. German ral vanlawng nih a hmu kho ti hna lo. Elijah bawmtu Pathian kan ngei. Khrihfa miphun kan si. A donghnak bia ngeitu Pathian kan sinah a um. Nun a liammi kan ralkap hna thisen, Dunkirt tikulh ah a luang mi England ralkap thisen, Miphun luatnak, ralṭhatnak caah bia chim zungzal ko seh!Crd.Chan Thawng Lian

Be the first to comment

Leave a Reply

Your email address will not be published.


*