Trinity theology a pommi le a dirpi mi pawl, bochan mi pawl nih nan palhnak tete a um.

Mizoram lei le Laitlang ah Oneness theology le Trinity theology debate an tuahmi pawl hi ka ngai bel hna lo. Mizoram i a voikhatnak debate an tuahmi lawng ka ngaih/ka zoh. Asinan fb ka zoh pah ah tlawmpal tete ka hmuhmi cu Trinity theology a pommi le a dirpi mi pawl, bochan mi pawl nih nan palhnak tete a um. Aho dah an si i zeizawn dah an palhmi si ti cu ka chim lai lo. Mah nih a sawh duhmi cu Bible caang lawng an theih i Bible background le context pawl an theih thlu lo ti a fiang. Cu lawng hlah, Bible cawnnak ah an theihmi a tlawm deuh ti a lang.

Theih dingmi cu theology siloah doctrine pawl debate kan tuah lai ti ahcun Bible caang lawng theih a za lo. Bible lei hrim ah cawnnak sang deuh a neimi an si a ttha bik lai. Biahalnak tuahmi pawl zong “theological question” lawngte an si a hau. Theological question tuah khawh hi a har taktakmi a si. Bible ka kai lio ah kan saya te nih zarhkhat ah essay tial ding an kan fial pin ah theological question pa 3 lengmang tuahchih ding an kan fial tawn.

Kan tuahmi theological question pawl cu kan professor nih a kan timi cu na tuahmi question hi theological question a si lo, spiritual question silole psychological question a si a kan ti ttheu. Chim duhmi cu theological question tuah khawh hi a har tuk. Atu i Oneness theology le Trinity theology kong i debate tuahmi zongah biahalnak tuahmi pawl zong theological question lawngte deuh an si a hau.

Debate ah a telmi pawl biahalnak tuahmi zonghi theological question ttha ngai um dawh an si lo. Thinhar biahal le neeknak biahal le i tihramnak biahal le zomhtaih biahal le ning cang lo biahal phun pawl tamdeuh dawh an si. Laimi cu theology kong le doctrine kong kan chim kan ceih zongah biahalnak kan tuahmi pawl hi ning cang lo biahal phun deuh lawngte an si.

Debate pakhat tuah i timh ahcun a ttha bikmi cu a hman lo kan timi kong, el kan duhmi kong (subject) kha ttha tein kan rel ve i kan hlat i kan theih khawh chung in theih kan i zuam ve ah a ttha. Tahchunhnak, Oneness theology cu a palh ti chim na duh ahcun Oneness theology kong kha hehtiah na rel ve ta a hau i UPC upa le pastor le member pawl zong na hal hna lai i interview zong na tuah hna lai. Mah bantuk cun timhtuahnak neih ta khawh ah a ttha bik. Mah lawngah Oneness theology a palhnak kha fawi tein na chim khawh lai i Trinity theology hi a hman ko tiah na fianter khawh lai.

Atu i debate i a telmi pawl khi Trinity theology kong ttha tein a fianter khomi le a chim khomi an um lai ka zum lo, trinity theology a thiammi pawl nih an chim ning tein le an ttialning tein. Bible sianginn a kaimi poah nih cun trinity theology kong cu Systematic theology ah cawn a si. Systematic theology course ahcun a tlang piin cawnmi area pawl cu God (theology), Christology, soteriology, anthropology, pneumatology, ecclesiology, le eschatology hna hi an si.

A dang tein Christology course le a dang pawl hi a dang tein cawn dingah an tuahmi a um ve. Bible kaimi poah nih cun mah kong pawl hi cawn dih a si ko nan Trinity theology hi a har tuk i a thuk tuk fawn, a hnok tuk fawn. Asinan BIble thiamsang pawl (theologians) nih tling tein le fiang tein an ttial dih/an chim dih ko hna. Keicu Joe R. Jones nih a ttialmi “A Grammar of Christian Faith” timi cauk volume 2 kha ka cawnmi an si. Mah cauk ah khan tling tein a ttial hna. Cauk dang zong an tor ko hna.Crd-Van Tum

Be the first to comment

Leave a Reply

Your email address will not be published.


*