TRINITY Cawnpiaknak hi a dik a si ahcun Khrih Lamkaltu hna vialte kha Cawnpiaknak dik lo a dirpitu an si tinak a si hnga!
Mi fapa Jesuh Khrih kha Vawlei ah kum thum le a cheu hrong Vancung Pennak Thawngțha a rak chim ti a si. Hi caan lioah hin Lamkaltu hna kha thiang thlarau an co rih lo caah bia thuk ngaingai hi an rak fiang rih lo.
”Cu caan ahcun Thlarau cu pek an si rih lo, zeicahtiah Jesuh cu Sunparnak in thawh ter a si rih lo,” a ti (Johan 7:39 b).
Matthai 28:19-20 “Cucaah khuazakip ah va kal u law miphun vialte kha ka zultu ah va ser hna u; Pa le Fapa le Thiang Thlarau min in tipilnak va pe hna u law, “kan fialmi vialte hna hi an zulh nakhnga va cawnpiak hna u. Cun hihi philh hlah u: nan sinah a zungzal in, caan dongh tiangin ka um lai,” tiah a ti hna.”
Jesuh Khrih cu Thlarau pum in van a kai lai ah Azultu hna sinah Rovuih bia a chim ta mi a si. Asinain Azultu pawl cu lungfiannak taktak thiang thlarau pek an rak si rih lo. Cun hi bia a chim hi a thawhțhan hnu a ni (40) nak ah a si. Azultu hna cu Thiang thlarau bia theihnak lei ahcun Pit chepchup pi khin an rak um lio caan a si. Cun Jesuh nih a rak chimh cia mi hna hmanh kha fiang lo reiruai pi khin an um caah fiantertu thiang thlarau kuat nan si lai tiah a rak ti hna.
Cucaah Azultu hna caah cun ruahchannak lianpi cu a um ko. Cucu zeidah a si? Johan 16:12-13, “ Bia Tampi chimh awk kan ngeih ko rih hna, sihmanhsehlaw atu ah cun nan i cinken khawh cawk ding a si lo. Asinain biatak phuangtu Thlarau cu a rat tikah biatak chungah cun an luhpi hna lai. ‘Keimah nawl a si,’ tiin zeihmanh a chim lai lo, a theihmi le a ra lai ding thil kong tu kha an chimh hna lai. ” a ti.
Azultu hna cu Judah Miphun an si bantuk in an pu pa hna nih Hluang rili an rak tannak in a ni (50) nak Nawlbia pahra tlun ni ”Zarh puai ” an hman ni ah ” THIANG THLARAU ” cu pek an hung si tak tak ko. Hi PENTEKOS ni thawk hin Messianic (Khrih hnu zultu) taktak cu an hung si. Thiang thlarau an cungah a tlung taktak cang. Bawi Jesuh nih Azultu hna sinah bia rovuih a chim ni thawk in a ni (10) nak ni ah bia dik vialte Hngalh ter tu thiang thlarau cu pek an si.
Azultu hna nih an Rabbi Yahusha Messiah nih Bia ro a rak vuih hna ah khan ”Pa le Fap le thiang thlarau min in tipilnak va pe hna ulaw tiah a rak chimh mi hna cu ” Biatak vialte hngalh ter tu thiang thlarau an co ni ah cun ‘ A ra lai ding thil kong an chimh hna lai ‘ a ti mi bia tlinnak ah le a Bia rovuihnak in a ni(10) nak ni ah PETER nih Jesuh Khrih min in Tipil a pek diam ko. Peter nih Jesuh biarovuih mi kha a philh a si hnga maw? Philh hlah e! Thiang thlarau nih cun pei fiang tak tak in a hngalhter leh cang cu. Cucaah Pa le Fapa le Thiang Thlarau min ai awk in ”Yahusha Messiah” min in tipilnak an pek hna.
Lamkaltu 2:38 “Peter nih annih cu a thawh hna i, “Nan dihlak in, pakhat hmanh bau loin, nan sualnak khan i mer tuah u, nan sualnak kha, ngaihthiam nan si nakhnga nan sualnak khan i mer u law Jesuh Khrih min in tipilnak ing tuah u; cun Pathian laksawng Thiang Thlarau kha nan hmuh lai. “a ti. A biachim mi an zumh caah nikhat ah Jesuh Khrih min in sual ngaihchihnak a ngei mi minung (3000) nih tipil an ing huar ko.
TRINITY Cawnpiaknak cu Rom ram Nicean Council meeting hnu in an rak thawk mi ” Trinity Dogma” cu Vawlei cungah RC nih an tlikpi mi Cawnpiaknak a si caah a tu kanmah chan tiangin a hung lar ngaingai mi Cawnpiak nak a si.
TRINITY cu Jesuh Khrih hnu zultu Lamkaltu hna chan lio i Cawnpiaknak cu a si lo. Cun Rev. Dr. Stephen Hre Kio cu interview an tuah lioah a chim mi cu Lamkaltu hna chan ahcun Jesuh Khrih min in tipilnak an pek hna a ti. A ti pei a herh cu Baibal ningin a chim mi a si. Trinity cawnpiaknak hi Baibal Cawnpiaknak Baibal bia karhlei lamh phunkhat a si.(2 Johan 1:9). Credit : Rabbi Ephraim Lian Rum
AV 19/5782
Leave a Reply