Timit Operation hi Lairal ko kha ka lawhter.

Timit Operation hi Lairal ko kha ka lawhter. Lairal kha kanmah Laitlai deuh a simi Hakha, Senthang, Mie,Lautu Hruaitu Pu Thawng Ling le Pu Mang Hnin hruaimi Leitak – Zophei le Mara an rak ifun i mirang ral an rak dohnak a si.

Hakha i a ummi mirang ral kha chim an rak itimhmi a si nain thawngpang a lek caah an chim manh lo i mah le khuatlang cio tu in an rak kham hna. Pu Mang Hnin le a ralkap nih Sawrawitlang le Lungkhar tlang hin an rak bawh hna i voihnih tiang mirang ral an rak khirh khawh hna.
By .Aceu Salai Sang Ceu Lian

Na Tuh Bang In Na Zun Lai!Galati 6:7 Nanmah le nanmah i hleng hlah u; ahohmanh nih Pathian cu an deh kho lo. Mi nih tuhmi cu a zun ko lai.

Tei awk ah a harbikmi kan ral cu kan mah hi kan si, an ti. Mah le mah a tei kho mi a uk khomi hi teitu taktak an si. Minung hi kan mah le kan mah kan i hleng tawn. Kan thluak nih a ttha lo tiah a theih ko zong ah kan pumsa duhnak, lungthin nih a kan tei tawn i kan duhlomi pi zong khi kan tuah ko.

A tthalo ti kan theih ko mi zong khi a poilo ti ah kan i hleng tthan i kan tuah ko. Keimah ko hi ka zul. Lakphak thlum tamtuk din a ttha lo ti ka theih ko nain, nikhat hrai khat tham cu a poi lo cu kai ti le ka din ko. Zuding zong an si ko lai. Kuak zumi, khaini hmawmmi, tikur hmawmmi tbk, an sic io ko lai.

Minung kan nunnak ah kan tuahmi vialte a kan thei dih tu cu Pathian a si. Kan tuhmi bang in zun ding biakhiaktu cu Pathian a si. Pathian hmai in a hohmanh kan it hup kho lo. Pathian cu mah hi cu keimah tuahmi a si lo ti zong ah kan deh kho lai lo. Adam zong nih sualnak a tuh caah harnak a zun ko. Eve zong nih sualnak a tuah caah naungeih hartuar ding kha Pathian nih a chim ko.

Solomon nih, “Dinlonak thlaici kha an tuh ahcun harnak kha na zun lai i na rian theitlai cu fungfek kh a si lai” (Phung. 22:8) a ti. Job 4:8 kan rel tik ah “Elifaz nih, ‘Keimah ka hmuh ning ah cun tthat lonak lei a thuang tu hna leharnak a tuhtu hna nih cun, ci tthiam tthiam cu an zun tawn,’ a ti. Nain a donghnak kan rel tik ah cun a palh. Job hi Pathian nih thluachuah a pek tthan (Job 42:10-17).

Profet Hosea nih, “Nannih nih tthat lonak kha nan tuh i a theitlai kha nan zun 10:13,” a ti. Hi cawnpaiknak hi Baibal chung ah a ummi hrimhrim a si. Lothlomi zong nih kan fian ngaimi a si. Kawm kan tuahnak ah Kawm kan zun ko. Mitsur cingmi nih mitsur an zun ko.

‘Na tuh bang in na zun lai’ ti hi kap hnih in duh a nung ve. Tthat lonak kan tuh tik ah tthat lonak kan zun. Tthatnak kan tuh ahcun tthatnak kan zun ve lai, ti a si hnga. A punsa duhnak loah a tuh ah cun thihnak kha a zun lai: Thlarau lo ah na tuh ahcun, Thlarau nih zungzal nunnak kha a pek lai (6:8).

Nifa kan nunnak ah kan pumsa caah riantuan a herh ve ko lai. Kan thlarau cazong ah rianttuan a herh ve ko. Pumsa ca kan tuan tik ah hohmanh ka ttih hna lo, ti in kan cawl bang in, Thlarau ca zong ah ral ttha tein nun le cawl cu a herh ve. Thlarau caah nun le cawl hi Cathiang rel, thlacam, le kan zumhnak he a pehtlaimi ah tthancho i zuam zong a si.Bil Hmung