Timhcia in rak um cio uh, mangttam tlun cang lai!

Asburg Revival Hmuhsakmi. Asbury Revival cu Feb. 8 in Feb. 24, 2023, Asbury University, Wilmore Kentucky, USA ah rak cang i, kristian vawlei pumpi a hninh. Laimi zong a rak kalmi zeimawzat an um ve. Cun, Laimi lakah revival pom lomi le Thiang Thlarau rianttuannak le cawlcanghnak cohlang lomi vialte cu – Asbury revival an hmur van citter viar hna. Thiang Thlarau nih hlimternak le tthanghphawkternak hi dikmi le um hrimhrimmi si ko tiah kum 21 minung cu theihhngalhnak le hngalhfianternak a van kan pek. Thiang Thlarau rianttuannak a dihdongh cang tiah aukhuangmi le dirpimi caah Asbury revival hi thawng chia ngai si.

Asbury revival nih zeidah a hmuhsakmi si tihi ka ruat chukcho ve ngai. A hmuhsakmi thil hi pathum phun in van ruah khawh si.

1) Thiang Thlarau rianttuannak dihdong cang timi tlaihtleng palhnak a van hmuhsak. Herh ahcun revival hi Pathian umter ko caah, Thiang Thlarau hi soisel le dohdal ding rak si lo. Cakei kaa purh bantuk rak si?

2) Thiang Thlarau mangttam a van hmuhsak. E.g., Lairam ahcun mangttam tlun lai i, mau an par tawn. Mau par ahcun, rawhralnak, harnak, mangttam le thihnak tbk nih a van zulh tawn. Biatak um lonak mangttam hi tlung taktak cang lai tihi hmuhsakmi si, dawh bik si? Mangttam tlung lai i, vawlei hi buaibai curh te lai.

3) Thih-lai kecheih hi a van hmuhsakmi si. E.g., Lairam ahcun sia hna hi van thah tikah, a thi cang rua tiah van ti lioah, voikhat-voihnih hi a tho in nung tthan ding phun in sia nih kehcheihnak tuah lai. Kecheihnak tuah cun tlawmpal ah a thi i, a sa cu can si ve. Vawlei ah revival hi a tlawm chin deuhdeuh, a bik in Zurop le tthangchomi ram ah revival hi um lo bantuk si. Cucaah, Thiang Thlarau rianttuannak cu dong cang tiah zong an aupi phahnak hi si.

Thlarau Mangttam cu ai thawk taktak cang tihi Asbury revival hmuhsak si caah, biatak um lonak ah filnak le hulnak hi van um thluahmah cang lai i; khrihfabu hna hi buai thluahmah van si lai. E.g., suimilam pahnih chung hmanh ai pum huam ti lomi lakah, ziah mangttam cu tlun lai lo; pumhnak ah smartphone ai celhmi; pumhnak ah smartphone in sport zohmi tbk. Van za rih seh! Mangttam hi fakpi in van tlun taktak cang lai caah, Baibal ah kir zokzok hau.

Cun, SoMe ah cangmi; minthang chimmi (tuahmi); sport minthang; hlasa minthang le mirum tbk chimmi le tuahmi nih tulio minung lungthin, ruahnak le nunnak cu a hip in hamh dih cang i, Pathian bia nih hmunhma ngei ti lo. Vawlei hi zoh tikah, thlarau mangttam taktak hi tlun caan a za ko cang – a ruang cu tulio vawlei le minung hi Pathian herh lomi in um, tlonlen le khuasak si cang. Pathian, na bia bang thlarau mangttam cu van tlun taktak cang ko seh!!! Amen.

Ka facebook hawile, kan van dangh hna! Timhcia in rak um cio uh, mangttam tlun cang lai!Crd.Van Nun Lian