Thuamthil kong ah Aidii nih Parborhsung timi thawi a chuah i mah cu midang nih an i copy i an zuar len.

Rel phut le phut lo ka thei lo nain ka ing chuah bia.Caholh/thuamthil /Zaihla/Biazai kongkau i copy le cover ti bantuk kong zai tuk hin huat kan tlai tuk tawn hrim ko.Muci(Art) timi a sunlawih tak mi hna nih cun mi dang nih an thar chuah mi(creat) a upat awk ding hrim a si i, copy le cover tuah cu a nautat hrim awk a si.

Mah zawn ah Kawlram huap minthang Copy hla in an lar tuk kan rak uar tuk cio ko hna khah nain a tu ringawn ah cun a maang a dang ngai cang tiah ka ruah. Bianabia ah lai hla original hla a tuah mi an tor ko nain cover tam deuh a sa mi hna kan sunsak deuh hna. An aw ah original hla a tuah tu satu naak in midang hla cover an sak ah an aw cu a ttha deuh tuk ko hrim kho men, Art ka duh ve timi nih cun tha a pek ko lai nain upatnak cu a pe kho hrim lai lo ti ka zumh.
Hla ttial a zuam mi ka si i, ka hla tuah mi ah vawlei cung mah vial te hla aw lak ah a vai i zawn khang mi tampi lai, cun hla bia tampi lak ah a vai i zawn mi a tam pi ko lai.

Zei a va si hmanh ah hla aw dang, hla bia dang ti awk in sikhawh tawk ka zuam. Mah cu original hla a tuah mi vial te nih kan i zuam len cio mi cu a si. “676 Milem” timi hla ka ttial lio ah, Sang Hnin Lian nih article a ttial mi ah ” A kan lem i milem ah a cang” timi bia kha hlabia ah hman ka duh i, amah pumpak sin ah mah cu bia te cu ka hman lai tiah upatnak he ka hal i a ka sianh hnu ah ka hman.

Cun Kevin Thang biazai “Covo” timi biazai ka duh tuk i hla aw ka bunh lai ka ti i, a sin ah ttha tein nawl ka hal ta, Hla aw he a tlak ning in biazai biafang chap le zuh ka duh caah a sin ah nawl ka hal tthan, mah tiang cu a herh mi si lo tiah zaran nih nan tuak men lai, Mah biazai, mah article an thil lio ah zeitluk thluakfak in an tuah timi ruah piak chih ah cun mahcu man lo i ka hal mi hna hmanh cu ninghngal hmanh a si rih.

Thuamthil kong ah Aidii nih Parborhsung timi thawi a chuah i mah cu midang nih an i copy i an zuar len. Mah cu thawi te vai i cawn cu a poi ma? lai thil thawi zong cu a hram tein zoh cun i cawn cio in pei tah cio a si ko cu tiah ti fawi te. Thawi thar chuah khawhnak ding ah zei tluk khua an ruah, an caan a pek, an hlatthlai ti hna he tuak ah cun i copy ngam ding hmanh si lo(Lai thil dawt tak tak, Muci kong zawnruah taktak).

A um cia hla aw cu zulh i dawi, sak a fawi te nain hla aw thar tuah ve cu a fawi lo.A um cia thawi cu cawn fawi te, nain thawi thar chuahkhawhnak ding cy a fawi lo.

Biaralkah pi ah CDF hna, CNA hna, Dohthlennak kip i tha hei pek ngai ttung i a dangdang lei dohthlennak kong hna ruahchap ve lo mi nih cun Kan dohthlennak zong lunghrinh awk a um ti a hau.Crd-Cung Aung

Be the first to comment

Leave a Reply

Your email address will not be published.


*