Thisen In Nun Pehnak: Mizaw zualhma bawmhnak kan ttuanmi lak ah a harcem le a sunglawi cem a si.

Pathian Liim Cia  Cuanh Thannak
(Report 5):Thisen In Nun Pehnak: Mizaw zualhma bawmhnak kan ttuanmi lak ah a harcem le a sunglawi cem a si. Nau aa rawkmi nu hna, accidents phunphun hna cu Siibawi nih a rannak in operation tuah an hauh caah a caan tanh in thi hlutu kan tawlrel dih.

Blood Bank a rak um lo caah 2004 kum in Pu Cung Hu(Keimah) nih mah riahcaw vaihlam te ifunh in  “Thi Hlutu Group” cu ka rak dirh. Cu hnu cun mizaw thi herh vialte hna hnangam lawng siloin a dam komi tiang zong in an hna a ngam dih.

Furpi naidaw ttotho lak le  zaantim khuamang zong ah Emergency mizaw vialte caah thisen cu a caan tanh in kan rak pek khawh hna.

Bawipa aa lawmh caah nihin tiang ah thisen Lang (6500) man lo tein Kan hlut cang.

A man lo tein timi cu: Mizaw nih thi co man an ipek lo, thi hlutu nih thi hlut man an la lo ii a tawlrel piaktu kanmah nih tawlrel piak man kan laa ve lo tinak khi a si. A mah belte, hi liangluang thisen pek khawhnak ding ah Phaisa tam tukte kan hman.

A luancia kum (5) hrawng ah hin Yangon Private Siizung ah aa thlopmi  Laimi kan mizaw caah thisen Laang khat ah K: 100,000/- an rak kan liamter. A tucu a tam chin men lai.

Chim duhmi cu,  Hakha ah thisen Ka tawlrel piakmi hna, mizaw sin hin rian ttuanman(Thi hmuh piak man) khi hei hal ve ning law Yangon Condo Teihkhan pa hnih tal cu caw kho ding khi ka va si ve hnga ka ti.Laimi cu kan hal zaat kha an ka pek ko hnga, nunnak ding ah cun tiah docawi in teiman thlumi miphun kan si. Phaisa hal cu chim lo, kanmah tu nih thi kongkau ah an herh mi phaisa ka bawmh lei hna.

Hitihin mi ka rak bawmh khawhnak cu:  Ka tlanval zaat hnu tlawmpal ah hin Bawipa nih Korea ah Phaisa kawl kho ding in rian a va ka ttuanter. 1996 kum hrawng ah hin Laimi ramdang kal kan rak tlawm taktak. Hakha ah thla khat MMK: 400-500/- hrawng te khi ka rak  ihlawh khawh lio ah, Korea ka phak cun thlakhat ah MMK: 600,000/- hrawng ka rak khon khawh. Kum (7) hrawng Korea ah Phaisa Ka kawl. Ka caah cun rel cawk lo tluk ti awk  khin ka thei. Fuso Fighter hmanlung motor khi Ting 25 lawng a rak si.

Phaisa tam lakte ka vun hmuh ka  tonghtham khan cun, Pathian sin ah” Bawipa mi sifak mizaw harsa bawmhnak in kan BIAK lai” ka ti colh. Bawipa cu Bia ka kamh bantuk in Hakha ka phak in ka “BIAK” colh ve.

Mah belte, Ka thinlung chung ah uahnak in ka khat.”Phaisa hlut Ka cohlang lo” ka ti. “Keimah tein Ka tuah khawh” ka hun ti. Cu dukdak ah Bawipa nih ram kaupi a ka chap. Bawmh awk an hung karh. Ka tei ti lo. Cu hnu ah khin bawmtu  hawikom tthattha cu Bawipa nih a hun ka pek tthan. Bawipa thinsau zia khi ka ti  ka molmok a hun fim cun…”Bawipa, nangmah le na vancung mi  nih nan ttuan” ka ti cang…Amen..

Hi thisen bawmhnak cu Khuate caa lawng ah si hin lo in, khuapi zong nih kan i tuah khawh hlei ve lo caah ka sin ah an rak phan cio dih.

Khua kip le Sangkip caah thisen kan pekmi, mizaw a zat le thisen Laang zeizat ti kha vun kan bih piak hmanh uh. Mizaw um lonak le theipar co lo khua a um hnga maw..?Hrelhmi khua nan um sual maw..?

A minung in tuak ah cun a thong leng i Nunnak cu  Bawipa nih Minung Thisen hmang in a sauh piak hna..

Hi minung nunnak chanh chuahnak riansung (Taksa Thinlung Thlarau damnak)  kan ttuanmi te hi nangmah bawmhnak thawng in kan dir kho zungzal lai. Kan peh khawh lai. Nangmah bawmh kan herh zungzal lai.

Khua min bunh in siseh, sang min in siseh na “thlan” rak thawh ve. Dawtnak leiba kan cop lo, kan in dawtnak kha midang aa thlop kho lomi tu hei cham ve tthan hna titu kha kan sawm mi cu a si.

Pathian nih thluachuah in pe seh.(Cung Hu) 09409305298Date:Jan 14, 2023Ka hmanthlak:1996 Korea.”Sifak Bawmhnak in kan BIAK lai”.Bawipa nih a tlinter ko..Amen!!!

Be the first to comment

Leave a Reply

Your email address will not be published.


*