Thihnak in a Luat Nain Ningzah nih A Don

Japan miphun Hosono Masabumi timi pa hi April 14, 1912 lio Titanic tilawng pi vurtlang ai pah sual i ti chung a pil lio ah khan a luat mi pa a si. Mi khamhtu lawng cun heh tiah nu le hngakchia cu an thiar hna lio ah nu pawl nih tinco hnga dingmi thutnak cu a ningcangloin a rak i cuh chom (A cheu nih nu ah ka ruat hna seh a ti caah nu thil in ai thuam a timi zong an um) i cu ti cun a nunnak cu a him ve.

Thihnak in luat hraat cu tawn khat te cu ai lawm tuk nain, ningzah nak nih a rak don colh ve i a thih hnu pi tiangin ‘Miralchia, mahzawnlawngruat pa’ tiah nehsawhmi pa ah ai cang. A miphun hawi Japan pawl lebang nih cun miralchia pa, mahzawnlawngruat pa, nangmah te zongin nai thah awk si ti tiangin an rak nehsawh. A thih hnu pi kum tampi a liam hnu tiang hmanh ah a fa le a tu le pawl hi an pu an pa nih a rak tuahmi thil ruangah ningzah nih a dawi peng rih ko hna.

Tulio kan ram le kan miphun nih sahraang tlukin a sualmi Min Aung Hlaing le a zultu pawl kan doh hna nak ah hin mi tam tuk nih nunnak an pek cang, inn le lo an khangh, tuar khawh in khawh lo tiangin mi an hrem. Kan thinlung nih a tuar, kan chawva nih a tuar, kan caan kan pek. Hi lio ah ralchia pa Hosono bantuk in i pheet chem riangmang in kan hmai ka a a ummi dir onh dingmi zaam taak in um cu zoh chia takmi tuanbia kan tial a si ko lai.

Atu kan dohthlennak ah hin cun thih herh nak zawn ah thih ngam lo zong hi ningzak, pek herhnak zawn ah pek sian lo zong ningzak, tuar herhnak zawn ah tuar ngam lo zong ningzak, ningzah tuar herhnak zawn ah zah tuar ngam lo tiang hmanh hi ningzak kan si lio a si. Keimah ka him ah a za a timi hna cu Hosono bang kan techin fapar chan tiang tuanbia ningzak nih a kan dawi te ding khi a si ko. Tuanbia dawh tial cio i zuam hna usih.

Bible chung i Esther tuanbia hi kan caah cawntlaak a si.

ESTHER 4:13-14 Cun Mordekai nih annih cu hi bantuk Esther cu va chimh awkah bia lehnak a pek hna: “Judah mi a dang vialte hna nakin kei cu siangpahrang inn chungah hin ka um caah ka luat deuh nga tiah i ruat hlah. Zeicahtiah hi bantuk caan i dai tein na um ko ahcun, Judah mi hna caah hin himnak le luatnak cu hmun dang le ka dang in a chuak áš­hiamáš­hiam ko lai, sihmanhsehlaw nangmah le na pa innchungkhar hna tu hi nan thi lai. Hi bantuk caan caah hin dahkaw pennak chung i na phak hi a hei si ko hnga, aho nih dah a hngalh?” tiah a ti.Crd.Lian Hram

Be the first to comment

Leave a Reply

Your email address will not be published.


*