Ka Lai biafang hman an dik dek maw? Bo Naga bia ka theih hnu in mah hi bia “သေမထူး နေမထူး” nih khua a ka ruahter ngai.
Raapbaw pawl nih uknak an lak hoi tikah hin cun “သေမထူး နေမထူး” pei kan si ko cu. MAH cu kan doh ko lai a ti duhnak a si.
Kawl pawl hi biafang an hmanmi tete le teinak ding phunphai i an von ihrocer thulhthalh ahkhin, a ngaitu hna thinlung cu an tok kho ngai.
Nain, Kawlram mi tam deuh hi cu chimthiam pa/nu thli le an bia-nal ah kan izaa tawn. A zeimaw ve khi chimthiam ngai kan si lo zongah kan voikhat lungthawhnak (emotion) khin, midang thinlung tok lak ai ceer kho an um ve fawn rih.
Cuti an von iti le cangka belte khin uartu an von ngei tuk hna i, mah hnu khan cun, pial hram an ithawk ṭhan lengmang ve.
Pan Pan tepawl nihkhan MAH kha “သေမထူး နေမထူး မင်းအောင်လှိုင်” ti phunphai in an rak pamh hmasa. Bo Naga bia belte nihhin pa deuh thinlung cu a tawh ngai hna lai dah ka ti.
Moe Thee Zun hei ti phunphai hna kha an rak ropui kho tuk ve. Laimi anih anih timi pipi zong nih heh maw tiah uar an rak icuh.
Kawl pawl hi harsatnak le phaisa tom karlak ithim ding phun caanrem nih a van phanh hna tik bel khin, an rak chimning bantuk hmanh si lo. A bingtalet bakin anmah hawi le kom lila zong a rawi viar ding phun khin an um.
Kawlram chungah hin Tuluk le Kala milu khi tlangcung nakcun an tam deuh lai dah. Chin sin lebang cun a let in an milu tam deuh lai.
Tuluk le Kala nih Kawlzia cu an theih tuk cang hna caah si lai. An ramkhel kong ah khin an teltumpi duh bak hna lo. Kawl awnh paoh ah an awn ve lo. Kawl khuan paoh ah an khuang in an itum lo.
Kawl hi cu anmah tein khuang hna seh, idoh hna seh, ibaoh hna seh, iseh hna seh. Khiti anmah le anmah an iseh kar ah caanṭha a laa thiam pa/nu khi a fiim cem si ko.
Kawlram dohthleng phu lakah, caan rau lote i minthang bik le ṭih bikmi ah ai chuah khomi cu Htun Myat Naing a si, nan ti cio ko lai. Kawlzia a theih hna caah a si.
Suhci taw muai phun in ai laa lo. MAH tildur zong cu a va cawi hlei fawn lo.
Chin, Kachin le Karen tbk phunphai belte hi MAH kha Sehtan a si an ti ahcun, Suhci khi Vanmi a si lai ti phun nan ituak cia. Politics ah cun mah cucu a rak si rua lo.
MAH le a ralkap kan doh hmasa hna lai, kan tei hnu ah Suhci he kan duhmi Federal kan ser lai tiah mi tampi nih an ituak.
Ralkap uknak tang MAH nakin Suhci uknak tang MAH phun khi a let in ṭihnung an si te lai. Mipi thimmi cozah tang (ukmi) ralkap phu na doh ahcun, international zong nih “tapung, damiah, terrorrists” ti na si lai i ramdang thluachuah pakhat hmanh hmuh khawhnak lam um lo.
Tikah, zeidah nai thim lai. (A ruah awk na thei bal lai lo)
Kawl an buai tuk lio ahkhin a zohtu si awk a si. Mei a tuat khotu si thiam ahcun an buainak mei-alh hlio chinchin dingin tuatpiak ding tu khi si.
An iphomh, an inawn cikcek hnu ah, Tlangcungmi nihcun mah le ram chung te khin Kawl raap vialte cu an cii hmih pet ding phun khi, theory cun ai rem bik ding a si hnga.
Kawl an bao paoh ah bao ve, an aak paoh le aak ve, funghreu an itlaih le hei itlaih ve… Kawlram ah a paw le kan pawtter ve hau ti ruahnak he “emotionally motivated revolution phun tuah ve lam khi cu, miphun caah santlaihnak nakin chiahchuahnak le ṭumchuknak a chuahpi chinchin men ko lai dah.
Sinain, Kawl aak le bao ning icawn sawh si loin, an dirhmun ingiat ziar, mah chung i hram fehter rak izuam ziar, zeidah kan miphun le ram (Kawlram ka ti lo mu) ca i thisen le nunnak pek ka sian vemi hi a si ti ruahnak he nikhat sml 24 a ummi chungah sml 16 hrawng rianṭuan khawh a si ahcun, Chin miphun hi phundang ngai in ai tungmer kho ding kan si men ko hnga.
Tutiang rii ah cun camping le crusade dawh laar cem ko hih. Camping minta le crusade mintami si uar zong kan tam i…
Zeitin dek si hnga… Ai laarmi profet phunphun zong cu an chuak lulh ve ko lai. Zumh kan tlak lo tuk hna hen cu mu.
Thlisau kan dangh ve thotho hna.
Crd. Salai C Alexander
Leave a Reply