Thih Dar Thantlang Khua , Lungtial Sang um mi, Pu Sang Kung a Kan Liam tak.

Thih Dar Thantlang Khua , Lungtial Sang um mi, Pu Sang Kung a Kan Liam tak.

Thih Dar 5.10. 2022 Thantlang Khua , Lungtial Sang um mi, Pu Sang Kung ( kum -56 )cu Thantlang in Leitak khua ah Ralzam in an i dor.Amah hi thinlung lei dam lo nak a ngei i , 24.9.2022 ni in a tlau . Khuapi te in an kawl hnu ah 28.9.2022 ni Chunah Leitak khua pawng tiva kam ah a ruak in an hmuh .28.9.2022 niah Leitak khua ah a ruak cu vui a si .

Fapa Pakhat te le a nu a roh tak hna . Leitak khua hi Phone line le internet line a that lo caah a tulawng ah thawng fiang kan rak thanh khawh .Tantak mi chungkhar nan dihlak nan ngaihchiat nak kan in tuarpi hna .Pathian nih nan ngaihchiat nak  in hnem ko hna seh. Crd-Ram Khar

Paul Bang Kan Hngalh Ve Awk
Rom 8:28 Pathian nih hin, amah a dawmi hna caah le amah nih aa tinhmi ning in a kawhmi hna caah cun, zeizong vialte hi a ttha lei ah a serpiak ko hna ti kha kan hngalh.

Tuzing ka rel mi Baibal hi rel lengmang mi a si. Chim lengmang mi zong a si. Paul nih a zumhnak a phunnak tampi hi kan hmuh lengmang. Cu lak ah tuzing kan relmi hi Paul nih a mah sining in siseh, midang sining a hmuhmi chung zong in siseh a zumhnak a phuanmi a si, Baibal cang donghnak te ah khin ‘Kan Hngalh’ ti a um. Kan timi chung ah hin Paul zong ai tel. Nangmah zong nih na zumh ve ah cun nai tel ve ko lai.

Paul sining tlawm tein ka vun langhter lai. Mihremtu a sinak kong hi cu um ko seh. Hremmi le hartuarmi a sinak kong tam deuh in langhter ka duh. Mitcawtnak a tong. Paul Jesuh nih a auh lio ah hin a tlu. Ceunih a mit caw lak in a tuah. Khua a hmu kho lo. Nithum chung khua hmu kho loin a um i Ananias nih thla a campiak hnu lawng ah khua a hmu kho than (cf. Lamkaltu 9).

That an timh lengmang. Damaskas khua i thawngttha a chimnak zong ah thah an timh i zan ah khua kulhnak a pemnak in kaural bawm chung ah an khumh i leng ah an chuahter (cf. Lam.9:25). Jerusalem a phan i Grik holh hmang mi hna he bia an i e li a tei hna thah an timh (9:29). Listra khua ah Paul kha lung in an cheh i a thi cang rua ti ah khua leng ah an hnuh (cf. Lam. 14:19).

Thong ah an thlak. Filipi thong ah Paul le Silas kha an thlak hna (Lam. 16). Thong an thlaknak chung ah Pathian ai phuang i an i tinhmi thawngttha kha thonguk tu bawi le a chungkhar kha an chimh khawh hna. Khamhnak hmuhnak ding caah tipil zong Jesuh zumh an cawnpiak hna i tipil zong an pek hna. Rom thong zong ah an thlak hna. Siangpahrang sin ah Pathian kong a chim khawh caah Paul a lung aa lawm.

Malta Tikulh ah rul nih a chuk. Paul le a hawi le Rom i an kal lio ah Rili cung ah saupi harnak an tong. Malta ti kulh an phak tikah meiphu an tinh piak hna i an to. Cu lio ahcun Paul cu thinghreu kha a khawm. A vun tinh. Mei nih a vun linh tik ah a chung in rul a chauk i Paul kut ah aa thali ko. Tikulh mi hna nih khuazing nih nun ter a duh lo caah a si an ti. A thi ding in an ruah. Rul cu mei chung ah a thin i a thi. Paul tu cu a thi lo. Tikulhmi hna nih cun “Hi pa hi pathian a si ko lai” an ti.

Paul nih a mah kong harnak a tonmi a chimmi zong 2Korin 11 chung ah kan hmuh mi tampi a um. Voi 39 tuk timi kha Judah mi sin in voi nga ka in, Rom mi nih voi thum an ka tuk, voi khat lung chek ka ing… ti kha a chimmi a um.

Paul nih Pathian rian a ttuan ruang ah a inmi harnak le sining tampi lak ah ka vunlanghter. Hi vialte hna hi tuzing kan rel mi “Pathian nih hin, amah a dawmi hna caah le amah nih aa tinhmi ning in a kawhmi hna caah cun, zeizong vialte hi a ttha lei ah a serpiak ko hna ti kha kan hngalh.” tiah a chimmi tlintertu an si.

Paul cu Pathian a dawmi a si. Pathian nih a rianttuan ding ah a kawhmi a si. A tonmi vialte hi a caah a ttha lei kap ah a ka serpiak ko, ti a langhtermi zumhnak a si. Nang zong Pathian dawmi na si. Amah nih an auhmi na si. Na caah Pathian nih na tonmi hi a ttha lei kap ah an serpiak duh ve ko.Bil Hmung