Thawngpang tha tuk Si. Thantaunggyi Le Myaing Peng Kahdohnak Ah SAC Ralkap 13 An Thi

Thawngpang tha tuk Si. Thantaunggyi Le Myaing Peng Kahdohnak Ah SAC Ralkap 13 An Thi

Karen ramkulh, Thantaunggyi peng Kyekataw khuathar in Shanlaypin khua lei ah rallam a sialmi SAC ralkap cu, February ni 16 zanlei suimilam 6:00PM hrawng ah bomb puahhnawh an ton caah 5 an thi, tiah theih a si.

Kyekataw khuathar in Shanlaypin khua lei ah rallam a sialmi SAC ralkap cu bomb in puahhnawh an ton caah 5 an thi. Pah Kah Phah lei in a thimi le aa hliammi an um lo, tiah tualchung mi pakhat nih a chim.

Cu pin ah Sagaing ramṭhen, Pale peng Inkyinsu khua in riahcaw phurtu SAC ralkap leilawng 20 hrawng cu Inmahti pyusawhti sakhan ah an riah lio February ni 15 ah hriamngan in kan kah hna, tiah Pale Joker phu nih an langhter.

Cu ṭhiamṭhiam in February ni 17 zinglei suimilam 9:00AM ah Magway ramṭhen, Myaing thlanglei ah rallam a sialmi SAC ralkap cu bomb in kan puahhnawh hna caah 8 nak tlawm lo an thi, tiah Tapyitaw Pah Kah Phah hruaitu Saya Chan nih a chim.

“Myaing thlanglei ah sentari kan cawng i cu thawngpang cu ralkap nih an theih tikah kulh ding in an kan rat hnawh. Cucu a hlankan in kan theih cia ve caah lamhruang in bomb kan hmanh dih hnu ah kan i thawn. Bomb kan hmanhmi a puah caah ralkap 8 an thi i hi nakin a thimi an tam deuh kho,” tiah a chim chap.

Cu kahdohnak ah Tapyitaw Pah Kah Phah, Myaing Pah Khah Phah Battalion 1, Companny 3, Royal Seven Revolution Force, Angiamay Guerrilla le DORE phu hna i bawm in an kah hna, tiah theih a si.The Chin Post