Thantlang Te Kha Mu

2005 April kha Thantlang ka rak hmuh hmasabik a si. Kan khua sianginn ka kai lio ah Thantlang a nuamhnak kong an rak chim lengmang i hmuh lai ka rak i ngaih bak. Ke in nihnih lamkal a si mi cu nikhat ah kan phan. Hmuh ka rak duh tuknak nih a ka tei tuk si ko lai teh, tuante ah kan phan. A zei dang nakin Pu Khen Lal te inn i Video zoh kai ngaih bik.

Ka voikhat phaknak si kaw, ka pa bak nih Video zohnak ah a rak ka kalpi. Cu zan an piah ding mi cu Sign Board ah ka van hmuh. Vuak muicawl minthang Van Damme, tiah cafang lianpi in ai taar. Khuate fa kai hngalhnak ah TV zong cu rak hmu bal hlah, Video zong rak zoh bal hlah, ka khuaruah a rak har bak. Kan khua kir ti lo hmanh ka rak ngamh. Video a dih hnu leng kan hung chuak i khuatung kan cul. Sianginn khar lio si kaw, lamkam cabuai thil zuar kip hi a but bak in rak but a si.

Sianginn kai a hung cu. Khuacaan nih a kalpi mi fur nih a hun kan tlakthuat. Nawncet lak le vaanvat lak ah Thantlang ka van fuh than. A voihnihnak ka kal si, nain kai ngaih tuk thiam. Amahbalte, kanmah hlan sianginn kai cia kan ule nih na tlau te lai an rak ka ti lengmang i ka curcuduk. Tutan cu sianginn kai ruah a si caah Boarding School ah ka thilripi he ka taang colh.

A thaizing cu B. E. H ah min vai pek hau ti si. Myanmar School Uniform (Angki raang le hni hring) hruk a hau. Hri hring fenh ka thiam ti lo. Ka hawipa nih taisawm sawmhchih mei a ka ti i kai sawmhchih mei. Ka voihnihnak Thantlang phak ah sianginn van kai colh cu a rak fawi ruam lo. Tlau lai rak thihphaih hlei ah chungkhat inn zong hngalh lo, khuami inn zong hngalh lo cu si kaw, B.E.H le ka umnak Boarding School kar lawng ka rak kal kho.

Harnak tampi a rak um nain lawmhnak tete ka ton mi nih harnak a ka philhter caan a tampi ve. Zingka arkhuang cirik lamkam changreu thlum ei hmanh kha a rak nuam bak. Voikhat zing bang cu ei tam kan rak i zuam i King Star Boarding um kan hawipa nih pa 20 hrawng a thuat rua ka ti (a ei man liampiak pin ah tangka kan rak chap).

Zunhla a rak laar lio si kaw, Bil Sung, P. Thawng Bawi, Van Siang Mang le Dawt Hlei Hniang te pawl Thantlang Town Hall ah an sa lai ti si ko. Minung kan rak tam tuk ah a nam bak in kan rak i nam. Mitung niam kan ti cu Dawt Hlei Hniang ka rak hmu kho lo i Vanzaang ka hawipa Ca Lian nih a rak ka cawi. Ka lungdi a riam dom.

Christmas kan hung naih deuh. Boarding School Uniform (angkia leng) cah mi a hung tlung. Khuapi sianginn kai ka hngar cem mi hna cu A Sawng angki leng rak si kaw, ka rak i lunghmui tuk cuh. Boarding School Uniform a phak hnu cu Bethlehem Orphanage (Rev. No Mang Ngaktah) Dum kal ding lawng ceihcum a si cang.

Zarhteni zing Sml. 11 hrawng ah Bus pathum kan sawng hmai ah an hung dir. Nih le kheh, kui le laam bu he kan hung phan. Len phu hrim a si. Ai dawh hrim ko ka ti. Ka rak i lunghmui bak. Cimvuai nawn in kan len hnu ah kan hung tlung. Kan kallei nakin kan tlunlei ko ah kan i nuam deuh hlah maw ka ti. Kan kallei i thianghlim tein suknak kan Sawng angki sen curhpi cu hmanthlak hnu cun a hnawmh zong poi lo phun in kan hlirhnak le zonak ah lei phudip kai dih. Kan phak bak in zaan caan hmannak tuaktaan ah kan i nam. Ar-hmul phawina, Voksa-zaam hremna, hlasak cawngna, fangmu thimna, Christmas laksawng thlen ding a cawna ti’n kan rak i tuai seek. Mah zan Christmas laksawng a petu balte kum chuah hlan ah Dollar ram in an van cah diam ai!

3 December 2005, zing arkhuang in Lahva kuang ah minung pali kan hung choi. Hnianghrawmnak hmun kan helh lai tiah. Kha ni ngelce Boarding School dang cio zong rak kal ve hna kaw, kan i naih tuk ne lai tiah Buhva lei ah hmun rem kan kawl. Ninu a hung kai vutmat. Dapti an hung til thluahmah. A rau loh! Lahva kuang le Buhva kuang cu nihkheh thawng nih a tlirh bak in tlirh. Kan sayapa nih Zawng tidin nawl a cawnter mi hna ko nih a kan nuamhter.

Fungkah kan hawipa bang cu ai ngal bak. A nepnalo ah “Kawlram ration (rawl) cu Vok rawl peknak tiang lawng nguh,” a thuat ko. Christmas thla cu si kaw, ram lak zong ah Christmas hla, khuachung zong ah Christmas hla. Kha lio kee bak in Thantlang tlawn le umkal lio hmanh ah Thantlang khuachung cu ti khah in kan khat. Kan sayapa bang nih cun, Thantlang a nuamh bik caan cu zanlei Sml. 3 in 7 kar a si a rak ti bal. Khuapi ah khuate, khuate ah khua a si nain a rak nuam lawlaw khi.

Cu tluk in a rak nuam mi khua cu, 18 September 2021 in hmun king ah a hung cang. Ralhrang nih an khangh i lenmin cim lo phailen kan khuazung cu tahhla lawh a hung si. Kan khuasaknak hmun cu vutcaam hmun ah, kan biaknak hmun zong vutcaam le meihol hmun ah an cang i, fim kan cawnnak hna cu hlingso lakah zuva ngamnak a si cang. Hniang kan hrawmnak tiva kuang hrawn hna le tlangcung chohlei, kehthei hrawnnak fingtlang hna zong neh buai kai in king dimdiam an si cang.

Meital puah thawng dah ti lo, minung awan theih khawh mi a um ti lo. Minung tlonlen lonak hmun bang, kha tluk nuam le dawh in remhhlei kan khuazung ralhrang rual nih khangh dih ko cu mu! Zeitik caan khom khirh in cuul than um hmanh seh, hlan kan khuazung philh um kho lai lo. Mitthlam cuanh zawn ah lungthin fah a zual ko e. Maw kan Thantlang khua…Crd-Salai C Twin Twin

Be the first to comment

Leave a Reply

Your email address will not be published.


*