Thantlang Serthannak.Thantlang serthannak hi atu te in thate rak timhtuah cia a hau. Ral tei hmasa a biapi nain tei hnu lawng I kan thok ahcun a tlai tuk lai. Hakha a rak cim. Hmunthar ah thial an si. Khi hmunthar khi puicimh tong Hakha mi an ttanrual ca ah an co. Cozah bawmhnak in sak a si. Thate in city plan suai ta sisehlaw khua dawhtuk a si kho ding a si. A tu cu remh awk a tha tilo. Fimchimtu ah cang seh.
Zeibantuk cozah hmanh nih, khua hlumtu lungtlinnak tello in, anmah timhtuahnak bak in khua dawh ah an ser lailo. Kanmah kan bia pi. Thil hmukho le mithiam hna hmang in khuasernak committee ser a herh. Cu a dirkamh tu Khuatlang bu fek neih a herh. Innlo neitu le Thantlang khuasa hna nih hmailei can saupi ca ruat in khuakhang tu hna khuakhannak cohlan a herh.
Cu khuakhannak cu a ra laimi cozah nih hnatlakpi in kalpi a herh. Cuti a si ahcun aa dawhtuk mi khua ah kan ser khawh lai. Thantlang mi nih hawi hlei in tuanvo kan ngei – Ral tei pin ah Thantlang ser a si. Pathian dawtnak in a tu lio ah ramdang ah engineering a awng cangmi le a cawnglio mi tampi kan nei hna. Khuatlaknak lei a thiammi zong an um. Business le accounting lei cawngsang, bank lei thiammi tiin mithiam tampi kan nei cang hna. Cu hna nih thate in an kan kalpi khawh lai. Thiamnak leikap in rinhtlak an um. Lungrual le khuakhan thiam lawng a hau.
Thantlang cu a luancia kum 9-10 chung ah fakpi in innlo a thang. Ramleng phanmi hna thawng in a si. Innlo rianh ah fakpi in kan rak I hne. A tu cu a ciam dih. Atu ralteinak ding ah fakbik in thazaang le chaw a pe than tu cu Thantlang (peng) mi kan si thiamthiam. Hihnu khuasernak a thar in van rianh than ding cu thil fawi hrimhrim a silo. Sihmanhsehlaw ahohmanh nih an kan ser piak lailo. Kanmah nih kan timh I kan ser a herh.
Mah hmun cio ah mahte cio in innsak sikoseh ti ahcun inn ai sak than kho tilo mi le a kir hmanh a kir than kho tilo mi an um len lai caah an hmunhma kha midang kut an phan lai. Cucu ruah ngam a si lo. Lungfah a zual tuk lai. Kan kanghmi nak hmanh in lungfak chin ding khi a si. A zammi vialte an kir khawhnak ding le innlo an ngeih dih khawh thannak ding pin ah a tha deuhmi le aa dawh deuhmi khua serthannak khuakhan a hau. Khuakhan kan thiamlo ahcun remhthan khawh a si thai ti lailo.
Mahkhua si ti lo in mikhua, khual (kawl) khua a si te kho tuk: Sakremh rian ruang ah mikip an ra lai. Dawr phunphun an hong kan tuah hnawh lai. Company tampi an lut lai. Innsak thiam le hlawhfa tampi an ra lai. Kum 7-8 men ah ai lim kho lailo. Can sau an um tik ah kir duh tilo in innlo hnget he an um thai lai. Laimi nak in chaw kawl thiam deuh hna lai kaw kan neihmi anmah kut ah a phan dih lai. Kan hmun he kan minung he khual bantuk ah kan cang kho.
Lungrual te in khuakhan kan thiam ahcun, khuadawh taktak le khuapi lian I serkhawhnak can tha a si ve. A tawinak in, khua chung lam vialte kauh le remh an hau. Inn karlak lam zong tha te in kauh an hau. Zapi ca hmun: mall (market) lianmi pa hnih-thum, sangkip ah motor chiahnak hmun (car parking), lentecelhnak inn (stadium) 2 tal tbt umlo awk a thalo. Inn nganpi pakhat ah zung vialte fonh khawh dih a si lai. Biakinn hmun hna zong siarem deuh in sersiam an tha. Cuti lam kauh le zapi ca hmun sersiam ding ahcun innhmun a hnursuan dih lai caah sungh ter thailo in an covo ding fakpi in ruahpiak hrimhrim an hau lai.
Cu caah kan inn sakning ding thlen a hau. Inn bing cio sitilo in chungkhar 20-30 tiang um khawhnak apartment (taihkhan) inn nganmi in thlen ahcun rianrang deuh in inn ai sa kho lai. Thilri a herhmi tlawmdeuh a dih lai. Phaisa tlo deuh in inn tamdeuh tung, a tha deuh tungmi kan sak khawh lai.
Hmunhma bi deuh ah minung tamdeuh kan i tlum lai. Cuti ai remh ahcun khua kauh chap lo hmanh ah a tu hmunhma nih khin minung 100,000 hmanh a tlum khawh lai. Lam a kau in a tha lai, zapi hmunhma tampi kan nei kho lai. Khuachung ah hmun lawng tete a um khawh lai caah pardum (mini park) le dinhnak tete a um kho lai. Khua ai dawh lai tlonlen a nuam deuh lai. Kan harnak tampi a remh lai. Ti le mei a tha deuh lai. Chungkhar khuasak nun ai ruang deuh lai, a thangcho deuh lai.
Zei phaisa dah kan hman lai? Zeitindah kan tawlrel lai? Hihi a biapi taktak dingmi cu a si. Bawmhnak phunphun a um te ko lai vasikaw, cu pin ah innsak aa timmi nih kan thawh lai. Kan fonh lai I company ah a cang colh lai. Cu kanmah dirhmi company lila ahcun riantuan in kan I hlawh kho lai. Kan phaisa lila kha kanmah chung ah aa mer lai I mitampi cawmnak a si lai.
Atu ralzam lio i Thantlang mi a rak zohkhenh tu khuate mi vialte kha an ra lai. Lo thlawhnak in innsaknak I hlawh kha a hlawk deuh lai caah an hong I hlawh lai. Kum 5-6 um hnu ah kir rai siti hlah. Thlantlang cu a minung hrimhrim in kan karh lai. Khua a kau deuh lai. Rian a tam deuh lai. Chap ding a tampi rih … van chap cio u. Lungrual te i.Crd.M Thawng Kam
Leave a Reply