Mizoram Saiha Khua Mi Pathum Thah Khanghmi Kongkau ah Fiang Deuh In Tial Mi .Ka Nu C.Biaksuii, Pu Bablu Talukdar le Pu Lalthafamkima thah an tonnak kong ah thil fiang
A thattu hna minung pahnih Aung Ling(CDF-mindat) le Zaw Oo(CDF-mindat) hi an hawile pahnih Aung Thang (CDF-mindat) le Ko Kyat(PDF-Myiang ) tiin February a zarhkhatnak 2023 ah Biaksuii dawr ah an ra i thil zeimaw zat an cawk hnu ah hriamnam cawk dingin kan ra i nan inn ah kan i tthum kho lai maw tiah Biaksuii cu an hal (Zaw Oo hi Biaksuii dawr ah thil a rak caw tawn mi a si).
Biaksuii te inn ah an (4) ning tein an i tthum. Rawl zong tha tein Biaksui te nupa nih an chuan piak hna. Ni 6 an caam hnu ah, Aung Ling le Zaw Oo nih phaisa hi kanmah kut ah chiah cu a him lo caah zaangfahnak tein nangmah nih kan fim piak law tiah Biaksuii cu Rs. 5,800,000 (Fifty eight lakh Rupees/ ting sawmnga le ting riat) an pek.
Biaksuii sinah phaisa an chiahnak ni 4 hrawng a rauh hnu ah hriamnam a cahpiaktu Siami(Mizo nu) le a hawile pahnih, Aung Ling le Zaw Oo cu Biaksuii te inn ah an ra i, hriamnam kan cahmi a phanh cang caah phaisa na kan fim piakmi kan pe cang tiah an ti. Siami le a hawile pahnih, Aung Ling le Zaw Oo, le Biaksuii tiin phaisa cu tling cikcek tein an rel hnu ah Siami nih phaisa cu hriamnam umnak hmun ah a kal pi. (Phaisa an rel lio ah a tling tiin hngalhpitu Biaksuii a hawile pathum zong an um). Hriamnam a umnak hmun ah Siami nih phaisa a va phanh pi hnu ah Rs. 550,000 (ting nga le thong sawmnga) a bau tiah Biaksuii cu Siami nih phone in a rak chonh than, tling tein nan rel i nan chuahpi hnu ah cun nangmah mawh a si, keimah cu hna ka hnawh ti hlah uh tiah Biaksuii nih a ti.
Phaisa cu a tlin lo caah hriamnam cu lak than loin Siami, Aung Ling le Zaw Oo cu Biaksuii te inn ah an ra than i phaisa cu tha tein an rel than tikah Rs.550,000 cu a bau. Siami nih Rs.550,000 cu keimah kut ah a tlaumi a si caah keimah nih ka liam lai tiah a ti hna. Atang mi Rs.5,250,000 cu Aung Ling le Zaw Oo an pek than hna. Aung Ling Le Zaw Oo cu atangmi Rs.5,250,000 an lak hnu zong ah Biaksuii te inn ah an riak rih, zan 2 an riah hnu ah Aung Thang (CDF-mindat) le Ko Kyat(PDF-Myiang ) hi Burma ah an tlung chung. Aung Ling le Zaw Oo zong zan 2 an riah chap hnu ah hmun dang ah an i tthial ve.
Aung Ling le Zaw Oo cu Biaksuii te inn ah an riah ti lo hnu zong ah Biaksuii te dawr ah an ra than lengmang i phaisa a tlaumi Rs. 550,000 cu Siami kan hal piak tiin Biaksuii cu hna an va hnawh lengmang. Aung Ling le Zaw Oo nih um thiam loin Biaksuii cu an va tuah lengmang caah Biaksuii nih phaisa rak kan chiah piak law nan ka ti i kan chiah piak hna, rak kan pe than cang law nan ka ti i tling tein kan pek than cang hna, keimah kut ah a tlau lomi phaisa kong ah hna ka hnawh lengmang hlah uh tiin a sik pah hna.
March 17, 2023(Friday) ah Zaw Oo cu Biaksuii dawr ah a ra than i, Burma ram ah phaisa va lak a hau i, lampi ah hman ding Burma phaisa ting khat in ka cawi tiah Biaksuii cu a va ti. Zaw Oo cu Biaksuii nih MMK 100,000( ting khat) a pek i a kal.
March 18, 2023(Saturday) ah Aung Ling cu Biaksuii dawr ah a ra than i nizan i Zaw Oo nih Burma ram ah a va lakmi phaisa, MMK 320,000,000 (ting thong thum le zahnih) kha Zaw Oo nih amah lawng in India ram lei ah a van luhpi ngam lo caah thaizing hi Ainak le Ngalang ramri, Bawinu tiva ah va don a hau i keimah lawng in ka kal ahcun India ralkap le palik nih an kan tlaih sual lai, zaangfahnak tein nangmah nih ka zulh ta law tiah Biaksuii cu zaangfah a va hal.
Pi Biaksuii, Pu Bablu Talukdar le Pu Lalthafamkima cu Aung Ling phaisa va lakpi dingin March 19 2023 (Sunday) zinglei sml 4am hrawngah Siaha in Motor in an i thawh. Zaanlei khua muih hlan ah an umnak Siaha khua rak phanh than an duh caah tuan tein an kal hi a si.(Pi Biaksuii a hawipa Pu Bablu hi Siaha DC zung ah cozah rian a tuanmi a si, Lalthafamkima hi mawtaw mawngtu le mawtaw ngeitu a si).
Aung Ling hi motor hnu lei ah a thu i Bablu le Biaksuii hi Motor mawngtu, Kimte pawngah an thu. 8:40am hrawng ah Biaksuii nih Siaha um a pasal cu Ainak kan phan dengmang cang , thla kan cam piak tiah ph in a rak chonh(Mah hi Biaksuii le a pasal a hnu bik ph an i chonhnak a si). Ainak khua i kuva a zuarmi nu nih Biaksuii le a hawile nih Zing sml 9am hrawng ah kuva/kuinya an ka cawk i bia tlawmpal kan i ruah hna hnu ah Ainak le Ngalang ramri Bawinu tiva lei ah an kal tiah a ti( Mah hi Biaksuii le a hawile pahnih a hnu bik an thawngpang kan theihnak a si).
Pi Biaksuii le a hawile pahnih ruak cu an tlaunak, ni 4 a rauh hnu (nithumni/Wednesday )zaan tim ah Ngalang khuami nih Ngalang khua le bawinu tiva karlak ah an hmuh hna (Motor lampi in km 3 hrawng a hlaatnak hmun ah an ruak hi an hmuh hna).
An ruak hi lung in an den dih hna hnu ah mei in khangh hna seh law a lo, an lu ruh hmanh hmuh ding a taang tuk lo, Motor mawngtu Pu Kimte a ruak an khangh lio ahhin datsi/petrol nih a dih tak hna i a si lai dah, Pu Kimte ruak kan zoh tikah a mit an tuamnak le a kaa an huhnak puan neh hmuh khawh a si. Pu Kimte ruak hi atai in a cunglei hnarcheu hmuh khawh a si( a mit pakhat le a hnakhaw pakhat cu fiang tein hmuh khawh asi). Mei in an khangh dih hna hnu ah a taangmi an ruh zong cu lung le thinghnah car an khuh hna. Biaksuii le Kimte ruak hi hmun khat ah an thuh i Pu Bablu ruak hi pe 12 hrawng a hlat hmun ah an thuh ve.
Aung Ling le Zaw Oo nih Biaksuii le a hawile pahnih an thahnak hna aruang asi lai tiah ka zumhmi pawl;
1. Aung Ling le Zaw Oo nih hriamnam cawknak ding phaisa, Rs. Ting 58 hi Myiang-PDF pawl sin in an lak.
2. Aung Ling le Zaw Oo nih Myiang-PDF sin in an lakmi phaisa hi fir an duh caah timh ciammam tein Biaksuii hi rap ah an fawih.
3. Aung Ling Le Zaw Oo nih an hawile pahnih Aung Thang (CDF-mindat) le Ko Kyat (PDF-Myiang ) Burma ram ah an tlunter chung hna ning ruah tikah Rs. Ting 58 hi anmah tein fir an duh caah a si timi hngalh khawh a si.
4. Biaksuii sinah phaisa an pek lio ah, Myiang-PDF pawl sinah kuat ding ah tiin a thli tein hman an rak thlak cia cang lai.
5. Hriamnam cawknak ding phaisa cu Biaksuii kan pek i Biaksuii nih nihin tiang ah hriamnam zong a kan pe lo i phaisa zong a kan khirh lo tiin Myiang-PDF pawl sinah Aung Ling le Zaw Oo nih lih bia an chim.
6. Mah ruang ah cun Biaksuii hi Ainak le Ngalang ramri ah kan rak ratpi lai i nannih nih nan duh poah in nan tuah lai tiah Aung Ling Le Zaw Oo nih Myiang-PDF pawl an ti hna lai tiah ka zumh.
7. Aung Ling le Zaw Oo nih timhtuahnak he Biaksuii hi an va fuh panh. Ningzah hngal loin Biaksuii te inn ah an riak i rawl an ei lio ahhin atu bantuk in Biaksuii an thah te lai ding hi an timhtuah dih cang tinak a si.
Acung lei ah ka langhtermi aruang pawl a dik hrimhrim lai tiah ka chim ngamnak cu;
Biaksuii nih Aung Ling le Zaw Oo hi phaisa bat hna seh law, anmah he Ainak le Ngalang ramri tiang a kal ngam nemmam lai lo.
Biaksuii le a hawile pahnih an thah hna nak a ruang hi Siami nih a firmi Rs.550000 ruang ah a si lo. Aruang cu Ainak le Ngalang ramri ah Biaksuii le a hawile an va kal lio ah Biaksuii nih aa awihmi a sui-tthi(1) le a zaal ah a chiahmi sui-tthi(1), Platinum- tthi(1 )le a sui kutdong-hrolh(5) le a sui ban-hrolh(5) pawl i an man hi a tlawm bik Rs 700,000 (ting sarih) a si. Mah hlei ah Biaksuii nih a phaisa bawm ah Rs. 60,000 (thong sawmruk) hrawng aa ken rih.
Biaksuii hi 2000 kum thawk in a pasal le a fale he New Siaha ah dawr tuah in thiang hlim tein aa cawmmi an si. Siaha ah kum 22 khua an sak chungah ka nu, Biaksuii nih mizei minung hmanh phaisa a hleng bal hna lo timi cu Siaha mipi, Palik le a fale nih fiang tuk in kan hngalhmi a si. Mah ruang ahcun dawtnak lungthin he, ral tha tein Burma ramri tiang CDF pawl a zulh ngam hna nak a si.
December 21, 2000 kum thawk in Pathian dawtnak thawng in Maraland Khualipi Siaha khua i Khua lai bik sang, New Siaha ah thil puan dawr tuah in nun duh dim tein khua asa mi an si.( Biaksuii dawr hi tulio Siaha thil puan dawr a ngan bikmi pa 3 lakah aa tel ve lai)
Mithattu pahnih,Aung Ling le Zaw Oo hna hi tuan tein nan tlaih khawh hna lo sual ahcun Biaksuii le a hawile pahnih thah an ton bantuk in kan lai miphun hawi dang zong nih thah an tong ve sual lai caah, tih a nung tukmi minung an si.
Anmah paw caah phaisa fir in, sualnak ngei lo Biaksuii le a hawile a leirawi in a thattu hna, Aung Ling le Zaw Oo hi nan kan tlaihpiak nak lai kan in nawlpat hna.
Mithattu pawl nih an rak hman tawnmi an phone numbers:
Zaw Oo (CDF-Mindat) : +95 9441354435, +91 8798567124
Aung Ling (CDF-Mindat) : +91 8798797853Ko Kyat (PDF-Myiang) : +95 9456912245
Biaksuii le a hawile a thattu hna cungah Siaha mipi le Palik an thin hung tuk. An thah hna timi an hngalh ni in nihin tiang chun he zan he kan inn ah an ra i an thinhunnak le mithattu hna tlaih an herhnak kong an kan chimh lengmang. Burma minung kan ram ah duh poah in luh chuah kan in sianh hna hi Mizoram ummi India minung kan him ti lo caah Mizoram le Chin State ramri vialte kan khar dih lai tiah an kan ti lengmang.
Aung Ling le Zaw Oo hi tuan tein nan tlaih khawh hna lo ahcun Chin State le Mizoram i pehtlaihnak a rawh dih lai pin ah Mizoram ah khua a sa mi Myanmar Refugees nih an tuar khawhmi a si caah, Aung Ling le Zaw Oo tlaih khawhnak dingah a lam kip in nan kan bawmhnak lai kan in nawl chih hna.
Tutan thah-nawn-nak ahhin a tlawm bik minung pa 5 cu an i tel zumh a si. CDF-Mindat kan si aa timi Zaw Oo le Aung Ling hi CDF-mindat nih cun kan chungtel an si ti lo, Mindat-CDF in an chuak cang an ti. CDF-Mindat in an chuah cang zong ah Mindat miphun hrimhrim an si timi 100 ah 100 in kan hngalh hna caah, nan miphun hawi nih an tuahmi Lai-nawn-nak ah Mindat-CDF zong ttuanvo nan ngei.
Cun, Tutan Lai-Nawn-Nak hi Ngalang Khua Pawng, Zophei ram ah a cangmi a si. Lai miphun nih bochanmi Zophei-CDF nan um ko buin, nan umnak ram ah a tu bantuk in thil kan ton tikah Zophei-CDF cung zong ah kan ngaih a chia i kan lung a fak. Mi thattu Aung Ling le Zaw Oo tlaih khawhnak ding ah Zophei-CDF nih nan kan tawlrel pi ve nak lai kan in sawm duh fawn hna.
Biaksuii hi a nun lio ah CDF kip cungah dawtnak a ngei tuk mi asi ti cu a dawr a phan bal mi CDF kip nih an hngalh. A dawr ah a rami CDF poah thil thenh loin le lakphakti din ta loin a kalter bal hna lo. Mah tluk in CDF pawl a dawtu hna, Kan Nu Biaksuii kha atu bantuk in nanmah CDF/PDF lila nih dawtnak hngalh thiam loin nan thah tikah a fale le cinglarualchan kan ngaih a chia tuk.
Cattialtu: Baby Tiallensungi (+91 9362386126) Bawi Lawm Sang (+91 9971441757 )Crd: BS Fale
Leave a Reply