Temtuarnak lei ah kan unau asi vemi Rohingya pawl hi zaangfaak ngai cu an si ko.

Temtuarnak lei ah kan unau asi vemi Rohingya pawl hi zaangfaak ngai cu an si ko. Tu tan an thil tonmi hi an mawh bak lo ti awk si. A hlei in luatnak kawl ah nunnak tiang a liammi nu le hngakchia ko hna hi ngaihchia khun asi.

Tlaihkhumhnak (immigration detention center) camp um hi a tla bal lo le a um bal lomi nih cun zeitlukindah a har ti hi kan i fiang lai lo. Covid lokdown i zarhkhat hrawnghrang te kan mah innchung lila kan i erh hmanh ah thih kan i tim va si kaw…tii le rawl hmanh tha tein ei thiam lonak le ih khawh lonak hmun i a thla thla le a kum kum i va um khi zeitlukindah a va har hnga. Nu le hngakchia ca ko ah a har chinchin rih lai.

Hlan ahcun humhimnak a kawlmi (asylum seeker) si ruang ah tlaihkhih a tong i camp (immigration camp) ah chiah a tongmi cu UNHCR nih rak zuan hnawh a rak si tawn nain August 2019 hnu cun Malaysia cozah nih UNHCR cu tonnak nawl a pe duh ti lo. Cutikah tlaih a tong i camp ah kuatmi ralzaam (refugee) le humhimnak kawlmi (asylum seeker) caah cun luatnak lam a um ti lo. Mah le ram cio i Embassy nih tlunnak tawlrelpiak lawng a tang cang.

Kan mah Chinmi (Laimi) chung zong in camp ah a kum in tla cangmi an um len rih. UNHCR nih le tawlrel khawh lo, Myanmar Embassy nih tawlrel i tlunter ti ah le a tu lio ram boruak he aa ningcang fawn lo. Camp ummi hna caah a poi ti pin chim awk um lo.

Malaysia cu ralzaam cohlannak le zohkhenhnak (1951 Geneva Refugee Convention) min a thu duh lomi asi caah an phunglam (Malaysian Immigration Act 1959/63) ning in cun ralzaam hi phungninglo mipem (illegal immigrant) ah ruah asi. Cucaah UNHCR card/catlap neih zong ah tlaikhawh peng asi. Riantuan hrimhrim  ahcun riantuan ruangah tlaih asi theo tawn. UNHCR card a neimi tlaih a tongmi zong a tam deuh cu riantuan ruangah asibik.

Ukrain rammi ralzaam hna Europe ram pawl nih an hei dawt hna ning le an hei zohkhenh dan hna a that ning ummm. Ram thangcho cia lung put le thangcho liomi lungput cu aa dang deuh hrim ko.
Credit-Ceumi lian

Be the first to comment

Leave a Reply

Your email address will not be published.


*