Ta-dawng-sa hna zong khi phaisa an ngei ahcun Laimi nih Bill Gates tluk kan tihzah theu hna

Messi puai hngah pah ah ka vun zai than ta ko lai, ‘Tumte hi Laimi biaceihtu bawi zik ah maw ai ruah’ tiah nan ka thuat zong ah a poi lo, Zai Huam Thang Tumte tiin min nan ka pek zong ah ka cohlang cia. Kan miphun lakah lih hrawkhrol nih hmunhma a lak tuk tawnmi ka duh lo caah huat i huah in miphun siaherhnak he ka zai tawn hi a si.

England sianginn kai ka kal hlan 2013 ah Yangon um Bible sianginn ah English ka rak chimh bal hlei ah The Hakha Post cazual ka rak zuar tawn i Bible siangngakchia tampi he kan i thei. Bia kan i ruah ah ’aho dah a rum bik hnga Laimi lakah’ timi hi an chim pah tawn.

‘Ka ngeihmi phaisa in motor cawk sisehlaw kan sianginn le main road kar ai tlum lai lo’ tiah an sayakyi nih a rum ning ai cua tawn nak kong cu pakhat nih uangthlar ngai in a chim theu. An inn le main road kar ah cun a tlawm bik motor 200 cu ai tlum lai. Dollar in tuak ahcun Kawl mintami nu Smile nih US ah inn dawh a cawkmi phaisa nakin khin a tam deuh lai. Multi-millionaire ti awk khi a si.

‘Si tak ee! Nan sayakyi cu zei sipuazi dah a tuah chih i mah tluk cun a rum khawh ning’ tiah ka rak hal. ‘Bible sianginn nganpi a tuah ko cu ta, sipuazi a tuah chihmi a um lo, sianginn ah ramdangmi zong an ra lengmang si’ tiah aka leh.

Aw! ramdang donors hna sin ah bawmhnak an hal hna nak thawng in phaisa a ngeimi (biachia deuh in chim ahcun tadawngsa/kutdok) hna zong hi phaisa te an vun thlir khawh cang ahcun khua khua tuaktan kho tlawmnak Laimi lakah ‘mirum’ timi min in an lal khawh ko hi teh ka rak ti len.

Phaisa ngei poah tihzah khi sal lungput cu a si. Zeitluk an rum timi nakin zeitindah an rum timi a biapi. Diamond zuarnak in a rummi Pu Lian Cung Nung, Starfish Education ngeitu, Business Pluss ngeitu, US i Chin Brothers ngeitu Pu Than Hre le sushi dawr in a rummi pawl khi mirum tiah auh tlak an si.

Midang kawl ciami phaisa kha thutnak hmun in kut a dokmi (a bik in Bible sianginn ngeitu, ngaktah zohkhenhtu etc.) pawl khi cu mirum ti tlak an si lo, an i cua lem lo ahcun doh len awk zong an si fawn lo. Kan miphun caah donor sin an ngahmi phaisa hmang in an thahnemnak tampi a um ve ko.

Biaknak, harsa bawmhnak humanitarian le dohthlennak taw-hlaing-zii a tuahmi nih an rum ahcun zoh a chia, fim ahcun ningzah ngai awk khi a si. Nain, Laimi lakah cun hika field in phaisa ngei ai chuahmi hna khi kan tihzah khun hna, thluak ngeilo ek ceh kan tam caah a si.Crd-Salai Lungthli Tum