Supreme Court nih tuchun ah nau hrawh cu a phung a si lo” tiah biachahnak an tuah i kum 59 chung nau hrawhnak nawl cu an thah i, a khup thal an leh diam. Cucaah conservative pawl, pro life le Evangelical khrihfa tampi cu an lunglawhter hna. Asinain pro choice, liberal pawl le democrats pawl cu an thin phawh hna. Biden nih US caah ngaihchiatnak ni” a si tiah a chim lio i, President Donald Trump nih cun Pathian nih biachahnak a tuahmi a si, ka chan chungah kan hlawhltin mi le teinak ngan bik kan hmuhmi a si” tiah tuchun ah a chim. Rev. Franklin Graham nih tutan Supreme Court biachahnak cu ka chan chungah thil roling taktak a si tiah a chim ve.
Supreme Court nih biachahnak an tuahmi an phuan hlan ah a thli tein a zuhter caah nau hrawh a duh lomi Supreme Court Justice a simi, Brett Kavanaugh cu nau hrawh a duhmi pa nih an inn ah thah ding in a timh nain palek nih an tlaih manh i, atu hi taza an cuai lio a si. Nau hrawh a duh lomi hna Prolife le nau hrawh a khammi hna an zung tampi cu nau hrawh duhmi nih kan hnu zarh hnih chungah tampi an hrawh piak hna.
Mah biachahnak nih a tanglei state 22 cu duh paoh in nau hrawh khawhnak nawl an ngei ti lai lo, Restriction tuah an si cang lai. Mah state hna cu Alabama, Arizona, Arkansas, Georgia, Idaho, Iowa, Kentucky, Louisiana, Michigan, Mississippi, Missouri, North Dakota, Ohio, Oklahoma, South Carolina, South Dakota, Tennessee, Texas, Utah, West Virginia, Wisconsin le Wyoming.
Florida, Indiana, Montana le Nebraska state cu nau hrawh khawh si ti lo ding in tuah timh colh a si. Texas Attorney General Ken Paxton nih nau hrawhnak nawl hrawh ding in thawnthanhnak a tuah colh. West Virginia ah nau hrawhnak clinic an khar piak colh hna. Wisconsin state i nau hrawhnak a tuahmi, Planned Parenthood zungah schedule a tuahmi vialte an cancel piak colh hna.
1973 kum i Roe Vs Wade tazacuainak ah Supreme Court nih nau hrawhnak a phung ah an rak ser i, kum 49 a luan ciami chungah nau sem million 63 thah an tong. US ram pumpi ah nau thah nau hrawhnak hmun sekhan cu state pakhat ah a tlawn bik pakhat cio tal cu a um dih ti a si. Asinain tutan biachahnak nih state tampi a rengh chin hna lai. An rengh ciami state ahcun nau hrawh khawh le nau thah khawh a si ti lai lo.
Mah biachahnak nih November midterm election a hnursuang lai maw? timi ahcun tutan caan karlak thimnak cu nau hrawh kong nain gas man, thilman kai le inflation kong hi biapi deuh ah mipi nih an chiah lai tiah zumh deuh a si.Crd-Salai Lairamthang
Leave a Reply