Salai Ceu Thang Ram Le Miphun Caah A Nunnak Liam

27 September zinglei suimilaam 7:30 am ah Chin ramkulh, Matupi pengkomh zung le Ngalai khua kar ralhraang le Chinland Defense Force Matupi kahdohnak ah, Chinland Defense Force Matupi Battalion 2 in, Salai Ceu Thang nih ram le miphun caah a nunnak a pek. Hi kahdohnak ah ralhraang lei in 4 an thi.Crd-The independent post

Chin Miphun Cu Kan Rum Tuk
An Pathian ah Bawipa a simi miphun cu lunglawmmi miphun an si, Bawipa nih a mi ah a thimmi hna cu lunglawmmi an si.(Salm 33:12)

Khrih ah dawtmi ka miphun hawile hna nan umnak ram le hmunhma cio in nan dam țheo lai tiah Khrih thawngin zumhnak ka ngei. Fb ka hawile vialte nan dihlak a langtlang in nan kut kaan tlaih hna.

Kannih Chin miphun (Lai miphun) hi zeizong te a sertu a nungmi Pathian a zumtu kan simi hi kan i miak taktak. Kan phaknak hmun paoh ah hmun khatte ah a bubu in Pathian kan thangțhat khawh peng hi a nuam in a țha hringhran. Zeitluk lunglawmh awk dah a si…

Miphun dang zumlotu pawl bantukin zumlotu rak si ve u sih law zei ko khi dah kan hei lawh hnga mu ti ruah ahcun hmulthi hna a ling urmal. Kannih miphun cu mi tlawmte kan si i zumlotu khi rak si u sih law atu bantukin hin kan phanhnak ram le hmun kip ah pakhat le pakhat i suathlam le i tonpumhnak hi a um kho hnga lo. Cucaah ka miphun an um ve ti hmanh kan i hngal hna hnga lo i kan tlawm chinchap he lam ka tlau lai ti kan i hngal ko nain kan tlau men ko hna hnga.

Zumlotu khi rak si u sih law mah um in kan um cio hnga i, i țhithruai nak le mibu rianțuannak leiah zei khi dek kan hei lawh hnga mu ti ka ruat tawn. Sihmanhsameh law Bawipa nih a mi ah a thimmi miphun le a dawtmi miphun kan si lawng hmanh si loin kan Pathian ah Bawipa, a nungmi Pathian a zumtu kan rak simi hi lunglawmmi miphun kan sinak cu a si.

Chin miphun hi holh leiah cun a rum taktakmi miphun kan si rih fawn. Holh phun khat thiam hmanh hi Pathian thluachuah a si. Kannih Chin miphun cu holh tam taktak a ngeimi miphun kan simi hi Pathian thluachuah a si i kan rum taktaknak pakhat a si.

Miraang le kawl hi holh phun khat lawng a ngeimi an si ruangah an si sifak tuk kan ti khawh hna. Annih cu holh phun khat lawng an ngeih ruangah an sifak tuk. Sihmanhseh law kannih Chin miphun cu a rum taktakmi miphun kan si. Zeicahtiah holh phun tampi a ngeimi miphun kan si. Pathian nih Chin miphun hi zeitluk in dah a kan dawt ti hi ruat hmanh u. Pathian nih a kan dawt lawng hmanh si loin Pathian nih holh phun kip thluachuah tampi a pekmi a rum taktakmi miphun kan si.

Chin miphun cu kan holh phun a tam tuk le kan lung ai rual khawh lonak a si. Hi hnu zongah kan lung ai rual kho lai lo tiah an chim tawn. Hihi a dik lomi ruahnak a si i a pialmi ruahnak a si. Cucaah cun Chin miphun nih holh phun tampi kan ngeihmi hi lungthin ruahnak a kan țhencheutertu si hin loin hi vialte holh phun kan ngeihmi hi Pathian thluachuah a si ti kha hngal in lungthin khat ruahnak khat he hmun khat ah dir ți in kan țan ținak dingah cang hram ko seh.

Chin miphun cu kan rum tuk, zeicahtiah holh phun tampi a ngeimi miphun kan si.

Dinnak kha a cat lomi tiva bantukin luanter camcin ko u (Amos 5:24).Salai K. Biak Lian Thawng

Be the first to comment

Leave a Reply

Your email address will not be published.


*