SAC Nih Meeting An Tuahmi Biathli A Puan Caah Record Department In Palik Bawi Bik Le A Kuttang Mi Tlaih An Tong

NUG ၊ CRPH le PDF hrawh dingin Minister of the Interior Soe Htuat hruainak in meeting an tuahmi biathli cu, leng ah a chuah caah record department in hruaitu palik bawi bik Aung Htey Myint le a kuttang mi officer cheukhat hna tlaih an tong, tiah theih a si.

SAC nih an tuahmi meeting biachah vialte cu Khit Thit Media nih January 15 an rak phozar caah atu bantuin tlaih an tong i biahalnak an tuah hna hi a si, tiah theih a si.

Record department in palik bawi bik Aung Htey Myint le a kuttang hna cu meeting biathli a ṭialtu an si i ramṭhen le ramkulh ministry ah a kuatu an si.

“SAC nih Meeting an tuahmi biathli vialte cu kan phozar dih caah kan phozar zan in ṭuanvo ngeitu record department in palik bawi bik le a kuttang hna cu an tlaih hna i bia an hal hna. Meeting an tuah lio i a kai vemi SAC ralbawi hna zong an phone an chuh dih hna. 2023 ah an tuah ding plan vialte phozar a si caah an thil tuah a nuar ngaingai cang lai,” tiah Khit Thit Media nih an langhter.

Cu meeting ah Minister of the Interior, Soe Htuat telh in department kip fonh officer 55 an kai. Meeting biathil vialte Khit Thit Media sinah a phuangtu hi meeting a kaimi chungin an si lai, tiah zumh a si ko nain an hngal kho hna lo, tiah theih a si.

A luancia kum ah PDF cu ṭih an nung tuk tiah Magway ramṭhen Cheif Minister Tin Lwin nih a rak chimmi audio file zong Khit Thit Media nih an rak phozar caah Magway ramṭhen Scretary Deputy Director General Win Shing zong SAC nih a rian in an rak phuah cang, tiah theih a si.

Cu pinah 2022 Febuary 13 ah Min Aung Hlaing telh in SAC ralbawi hna meeting(Informal) an rak tuahmi biathli zong Khit Thit Media nih an rak phozar caah officer le zung rianṭuantu cheukhat zong dan an rak tat hna, tiah theih a si.

Cu ṭhiamṭhiam in SAC ralkap uknak a duh lotu hna nih dai tein duhlonak an langhtermi kham dingin Soe Htuat nih, a rak chimmi audio file zong Khit Thit Media nih, an rak langhter caah SAC ralbawi hna le zung cheukhat in nawlngeitu hna an phone vialte an rak chuh hna i, checkhlatnak an rak tuah hna, tiah theih a si.The Chin Post

Be the first to comment

Leave a Reply

Your email address will not be published.


*