SAC Nih Chungkhar Cazin An Lakmi Ah Pumtlinglo Minung Hna Zong An I Tel

Chin ramkulh, Hakha ah SAC nih chungkhar cazin an lak cuahmah i ralkap le palik tampi nih humhimnak an lakpiak hna, tiah theih a si.

January 9 thawk in Hakha ah SAC nih chungkhar cazin an lak i ralkap le palik tampi nih humhimnak an lapiak hna. Khua thar sang lei in an i thawk i sang ṭhen in an vak, tiah tualchung mi pakhat nih a chim.

Tualchung mi pakhat nih, “SAC ralkap le palik tampi nih humhimnak an lakpiak hna i, zung rianṭuantu hna nih chungkhar cazin an lak. Ramdang lei a um cangmi hna zong an lak hna pinah hawi tluk lomi, pumtling lo tiang in cazin an lakmi ah an khumh hna,” tiah The Chin Post ah a chim

Hramhram in chungkhar cazin a kan hal i SAC nih thimnak tuahtimhmi cazin ah an kan khumh dih. Pek kan duh hna lo zong ah an kan hal chih i kan pek hna. Ramdang a um cangmi hna le pumtling lo hna zong cazin an khumhmi hna hi cu a poi tuk hringhran ko.

Thimnak an tuah laimi zong ah vote kan pe hna lai lo nain vote a pemi mi cazin ah an kan khumh ṭhiamṭhiam lai. Mizapi lungrual tein kan ṭan i kan tei zok zok a hau, tiah tualchung mi pakhat nih a chim.

SAC nih Hakha dawrhlun sang ah chungkhar cazin an rak lak lioah Chin hriamtlai phu nih an rak kah hna caah palik pakhat a thi i 4 hliamhma an rak pu cang.The Chin Post