Russia nih Ukraine khuapi an lak ciami ah cozah an ser hna i mipi cu “hi hmun hi a zungzal in Russia nih a uk cang lai; ttihphan awk zeihmanh um lo, hnangam taktak in um u.

Hnangamnak na hmuh lai.Russia nih Ukraine khuapi an lak ciami ah cozah an ser hna i mipi cu “hi hmun hi a zungzal in Russia nih a uk cang lai; ttihphan awk zeihmanh um lo, hnangam taktak in um u. Kanmah cozah tangah rian tuan ko u. Nan upa pawl zong kanmah nih pension kan pek hna lai. Russia venhimnak thladem tang i nan um cang caah, Ukraine cozah nih miphun rawiphiar tu tiah dantat ma ttih sual lai ucih, an in tong kho hna lai lo” tiah biakamnak fek taktak an pek hna.

Asinain zarh khat a rauh ah, Ukriane nih fak taktak in an kah ciammam hna i “zungzal in kan in umpi hna lai” tiah bia a kamhtu hna Russia ralkap cu lo pher an tli dih.

Atu kha lio i Russia aa bochan sualmi le an cozah tangah rianttuanmi pawl vialte kha ttihphannak in an khat i a cheu cu Russia ram ah an zam ve lawlaw ti a si.

Russia cu US chim lo ahcun vawleicung ralkap tthawng bik an si, ttih ngaimi an si.

Nain an biakam bochan awk le zumhawk taktak an tlak ve hrimhrim lo; zungzal ca an biakam cu zarh khat hmanh a deih lo!

Russia hmanh cu tluk in bochan awk an tlak lo ahcun, vawlei ah a kan venghim tu ding i bochan awktlak mi dang an um hlei ti lo, tihi a fiang ko.

Cu tluk i bochan awktlak an um bak lo lio ahcun, a biakam a let bal hrimhrim lomi bochan awktlak Pathian a um kan hngalh ko nain kan i bochan duh lo; hnu kan chit i bochan ding dang kan kawl taak peng.

Matt. 23:37 ah Jesuh nih “Maw Jerusalem, arpi nih a thlazung in a fale a hnuh hna bantuk khin huh kan duh peng nain nangmah nih keimah huhnak chung um cu na duh lo ee” tiah a timi he hin kan dirhmun aa khat ngai..

Na nupi rawl chumh a thiam tuk ve ko bu in, nang nih na nupi rawl chumhmi ei duh loin nan innpa nu rawl chumhmi rumro na zoh ahcun nan nu caah zeitluk in dah a har lai?

Hi bochan tlak, huppheng, kilveng khotu Pathian nih a thlazung tangah huh, kilven le zohkhenh a kan timh peng ko nain kan duh lo, kaa dangah kan pial taak, kan vah taak, i kan chuah taak peng.

Kan pupa phunthluk ah “thladem tang Ni linh tuar” timi a um.

A sullam cu i nuamhnak caah a herhmi vialte cu kan ngeih dih ko nain kan i nuam lo, tinak khi a si..

Hnangamnak le lawmhnak Bawipa cu kan hngalh ko, kan sin zongah a um ko nain a hnangamnak le lawmhnak chung i luh kan duh lo caah, Hnangamnak Bawipa kehram ah lungrethei le beidong in khua kan sa i Lawmhnak Bawipa kehram ah kan ttap tawn..

Hnangamhnak Bawipa venhimnak chung luh hi duh usihlaw, lut usih. Hnangam nun kan ta a si colh lai.Crd-Hram Bik Lian

Be the first to comment

Leave a Reply

Your email address will not be published.


*