Russia He I Bawm In Nuclear Hriamnam Kan Ser Lai — Zaw Min Htun

Russia He I Bawm In Nuclear Hriamnam Kan Ser Lai — Zaw Min Htun

SAC chimphuannak nawlngeitu Zaw Min Htun nih, Russia he i bawm in Nuclear hriamnam ser ding in kan i zuam cuahmah. Nuclear hriamnam sernak a hmunhma zong zohfelnak le chekhlatnak kan tuah, tiah a chim.

Min Aung Hlaing le Mr. Alexey Likhachev nih Nuclear hriamnam he aa pehtlaimi zung cu a luancia February ni 6 ah Yangon ah hunnak an ngei, tiah theih a si.

Myanmar le Russia ram cu Nuclear hriamnam serchuah ti lo ding le hman lo ding in min sen kan thut cang. Asinain Nuclear cu daihnak in kan hman lai i Electric Power le cinthlaknak lei ṭhanchonak ah kan hman lai, tiah an chim.

SAC nih, Nuclear hriamnam serchuah kan i timhmi kongkau ah ṭha tein kherhhlainak kan tuah lai. Nuclear hriamnam sernak a hmunhma zong pawngkam a himnak hmun ah kan zoh lai, tiah an langhter.

“Hi thil tuah an timhmi hi a hlan tein an rak i ruahcia cangmi, an saduhthah le an chunmang kha a tak in ṭuanchuah an duh caah tuah an timhmi a si ko,” tiah ramkhel lei tuaktantu Than Soe Naing nih cun a chim.The Chin Post

Pale Ah Sentari A Congtu SAC Ralkap Kah An Ton Caah 4 An Thi.Sagaing ramṭhen, Pale khuachung ah sentari congh ding in a kalmi SAC ralkap bomb puahhnawh an ton caah 4 an thi, tiah Daungnet Naysi Machia Guerrilla in ṭuanvo ngeitu nih a chim.

February ni 13 zing suimilam 9:00AM hrawng ah Pale khuachung ah sentari congh ding in a kalmi SAC ralkap kah an ton caah 4 an thi, tiah theih a si.

“Sentari congh ding in a kalmi uico ralkap 7 cu bomb in kan puahhnawh hna caah 4 an thi. Kanmah lei in a thimi le aa hliammi kan um lo,” tiah Naysi Machia Guerrila in ṭuanvo ngeitu nih a chim.

Cu ṭhiamṭhiam in Shwebo peng ah pyusawhti 1 cu bomb aa lamhsual caah a thi, tiah Bo Kyiayaing-Shwebo in ṭuanvo ngeitu nih a chim.

February ni 13 zing suimilam 7:45AM hrawng ah Shwebo peng Nyaungkaing khua ah a ummi pyusawhti Myo Hlaing cu, SAC ralkap nih umhmun an khuarnak Ziphyukone khua lei a kal lioah PDF nih bomb an hmanhmi aa lamhsual caah a thi, tiah theih a si.

Bo Kyiayaing-Shwebo, Bo Japan-Shwebo, Taungthukyi- Shwebo, Mah Tadaung-Depeyin le Taikney 2 nih an hmanhmi bomb cu pyusawhti pa nih aa lamhsual caah a thih hi a si, tiah theih a si.The Chin Post