Rev. Dr. Hrang Zel kan innah a rak kan leng. S.Korea ah a ummi a si i, NCCF civui ah phungchim dingin an sawmmi a si.

Rev. Dr. Hrang Zel.Zahan kha Rev. Dr. Hrang Zel kan innah a rak kan leng. S.Korea ah a ummi a si i, NCCF civui ah phungchim dingin an sawmmi a si. A nupi zong Korea nu a si i, ‘’Zingṭha nu’’ tiin a auh. Aa hmu bal le aa thei bal kan si lo nain, ka cauk ‘’Lai Thluak Lai Mit Lai Thinlung’’ kha a sin a phan ve i a ka tlaihchan ngai, ka tlaihchan ngai ve. A pa belte hi ka rak hmuh balmi le ka rak theih balmi a si. Ka pa cu Sa Mang a si a ka ti le cangka, a luan cia kum 40 lio hrawng i Pu Sa Mang(tleicia) ka rak hmuh balnak le ka rak theih balnak kha ka mitthlam ah video chung i Kawl ‘’zat laan’’ piah bantuk a hong cuang vuaimai.

Falam ah A kum ka cing ti lo. A luan cia 1976-77 hrawng si dawh a si. Myohne pakhat in zungkip cozah rianṭuan minung pa 10 cio hrawngin myohne pakua chung ummi cozah rianṭuan pawl Falam ah ‘’aloh tamaa zizaa tinṭaan’’ thlathum chung kan rak kai. Myanmah Socialist Lansin Party chan lio a si i, Pu Sa Mang(tleicia) hi Hakha Myohne Party Unit ah ‘’aloh tamaa’’ lei lutlai a si caah Falam tinṭaan tawlreltu pakhat ah aa tel ve.

Thantlang Myohne.Thantlang in minung pa zeizat set dah kan rak kai timi ka cing ti lo. Nain, Tedim minung pathum U Aung Win(Pi Tum Vang pasal), Pa Dal le Pa Khup hi Thantlang ummi an si caah Thantlang myohne in an rak kai ve. Falam Bank hmai i palek umnak inn senpi ahkhan a myohne, a myohne in an rak kan ihter.

Thantlang myohne le Tedim myohne kan buai.Zankhat cu Thantlang in a rami Tedim kan hawile pathum le Tedim in a rami pawl zu an ding ṭi. Zei bia dah an  ruah i, zeidah an i el timi ka cing ti lo. Zan kan ih hnu sml 10:00 hrawngah Tedim pahnih Gin Suan timi pa le a hawipa(a min ka philh, bawlung chuih thiam a si) hreitlung le namtong he Thantlang myohne kan ihnak ah an rak kan fuh.

Thantlang pawl chuak u, kan i that lai ti a si ko. Leklak, Thantlang in a rami Tedim kan hawile pathum an zam colh. Zam dih u an kan ti ta rih. Cu le cangka midang zong an zam dih ve. Kei cu puanbu kaa khuh i ka zam lo. Ka puan an kan hawhpiak. Thih na ngamh maw an ka ti. Ka ihnak zel ṭuang hreitlung in an tuk. Kaakhat zong ka holh lo. Holh lo cang cun zei ngaingai an ka ti ve lo i an kan ṭin tak.

U Tu( Pu Kam Tu) kaa rawih A thaizan ah U Tu( Pu Kam Tu) ka chimh. Pu Kam Tu(tleicia) hi Tlangpi a si nain Falam ah khua a sa. Boxing thongh thiam, bawlung chuih thiam a si. Kei hi Falam ah kum hnih sianginn ka rak kai bal caah U Tu he kan rak i thei cang. U Tu nih thaizan kan i tong lai a ka ti. Thantlang myohne an um sawhsawh lai lo timi an theih caah sayate he Tedim pawl he an hnakhaw lawng an tun cang. An phing dih.

A thaizan cu U Tu he a hawile pahnih(an min ka chim lai lo)he zu kan ding. Tinṭaan a kaimi rawl ei caan bakah kan va fuh ve hna. Tedim pawl chuak u, kan i that taktak cang hna lai kan ti bak ve cang hna. Tidem he Tedim lo he an rawl kheng kan hlonhpiak hna. An tihang kan thletpiak hna. Culio Teddim le Thantlang karlak upa pawl nih remnak an ser len lio hi Rev. Dr. Hrang Zel pa Pu Sa Mang ṭhate in ka hmuh i, bia zong ṭhate in kan rak i ruah bal. Inlam a rak kan fanhtu minung pahnih kha ”tin taan” in an dawi hna.

1978 ah Tonzang kaa ṭhial i, mah lio hreitlung le namtong he a rak kan fuhtu Gin Suan Kha ‘’saihpiozi’’ zungah a rak ṭuanmi a si ve i, a komh zong kan i kom ngaingai. Atu cu a rian in a chuak i, Baibal sianginn a kai hnuah Pastor a ṭuan an ti.Crd-Perh Kalh Thawng

Be the first to comment

Leave a Reply

Your email address will not be published.


*