Rev.Dr.Cung Lian Hup CNF USA Regional Committee Office ah (08/12/2022) ni ah a rak kan leng.

Rev.Dr.Cung Lian Hup CNF USA Regional Committee Office ah (08/12/2022) ni ah a rak kan leng. A rak kan len lawng si loin CNF le kan miphun caah thlacamnak a kan tuah pi. Kan ni lawm hringhran.

A mah hi Chinland Club (CC) member ttha tak tak a si. Kum fatin phaisa a tho zungzal mi ramdawtu tak tak Pathian rian ttuan tu a si. CNF nih kan tuah mi Lucky Draw tiket zong CNF bawmh duh ah tam pi a kan cawk. Ka pauh ti ruahnak he si lo in mi dang cio bang ram dawtnak le CNF an kan ttanh ruang ah an kan cawk khi a si. Va tthat ah a mah nih Computer pakhat zong a pauh ve. Kan chimh i aa tin pi pah.

A mah bantuk in Pathian rianttuantu kan pa le tampi nih ramdawtnak tak tak an ngeih chih ruang ah kan mi phun kan raltei nak ah ruahchannak ttha CNF nih kan ngei chin chin. Kan u Nancy pa kan ni lawm.. Crd-Daniel Sakhong

Sersiamtu Lungput!2Korin 8:1 “Kan hngalh cio ko,” an ti bang khan hngalhnak kan ngei cio taktak ko. Sihmanhsehlaw cu bantuk hngalhnak nih cun mi cu an lung a puamter tawn hna; dawtnak bel nih a ser siam hna.

“Thil pakhat kan hngalh lomi kong a hngalmi kan hal hna tik ah can tlawm pal cu hruh kan chang, kan co. Kan hngalh lomi hal lo in kan um peng ahcun kan chan chung hruh kan co,” an ti. Kan hngalh lomi hal hi a ttha. Hngalhnak kauhnak le fiannak a si. Kan hngal na loin a hngal bantuk in kan um peng ahcun kan hrut chin lengmang. Hal thiam zong a biapi. Jesuh chan lio ah mizaw nih an herhmi bak te an hal tawn i a tuahpiak hna. Mit caw nih khua hmuh ka duh a ti. Ke bei nih kal a duh a ti.

Paul nih bawlnak sa kong a chim. Mi cakuat a relmi lak ah hin “Kan hngalh cio ko” ti ah lungpum mi hna u dawh an si. Paul hi an soisel nak tete a chim tawn. Biachim ngai ngai ah cun zei tthaipi a si lo, ca kuat ciammam ah cun a ti ti awk a ttha lo, nan ka ti mi keimah Paul nih, ti hna a ca kuat ah a ttial (2Kon 10:10). Paul hi a chan lio minung tampi nih zei ah an rel tuk lo. Nizan ah kan ttial bang in Cuarpar tannak kong a ttial mi le bang cu an thin a khenh hna, i thah an duh.

‘Ka hngalh’ ti ah a ruat mi hna hi cawnpiak khawh an si ti lo. A ngaih zong an zuam ti lo. An ngaih hmanh ah an lungchung i a um cia mi kha an zumh tuk cang caah an zumhnak cu an i thleng kho ngaingai ti lo. Tukar hrawng ka lung ah a chuakmi cu ‘Trinity le Oneness’ discussion hna hi a si. Kan hngalh cang ti ah kan ruahmi, minung kum 40 hna a tling cang ve mi cu fian pupter awk cu ka ruat kho set lo. Kan palh ah cun kan palh ning in i thih pi ko u sih. Ai thihpi mi zong an um ko cang, ti a fawi te ko. Sizong a si men lai ka ruah.

Lungpum hi tthat dawh a si lo. Keimah hi na lung a pum an ka ti tawn. Sibawi nih si an ka pek. Ka ttih ngai. Lungpum pakhat zong hi an ka benh tawn. Keimah nih ka theih khawh tawk ah mah hi cu a dik ko ti ka ruah mi pin ah i thial hi ka duh lo. An chim mi ka ruat i a ka palh ka ti ahcun an sin ttantthan le an duhnak tuah ve hi ka zaang a thu lo. Kai awt tthan tawn ko.

Dawtnak bel nih a ser siam hna. Dawtnak kong hi Paul nih a chim lengmang mi a si. Dawtnak nih minung a kan remter. Dawtnak nih minung a ttha in a kan hmuhter. Dawtnak nih rianttuan tti khawhnak a kan ngeihter. Dawtnak nih sining tampi hi a sersiam. Ram dawtu hna dawtnak nih ram a sersiam i a chung ummi lawmhnak a si. Dawtnak hi lungpum nak nih a hrawh khawh ve mi cu a si. Lungpum tuk ruang ah dawtnak tuahsernak kha zeirel loin tlabulbal in khuasak a chuak ve. Dawtnak nih a sersiam khawhmi hna hi lungnem mi an si. Hngalhnak lawng rinh loin lungnemnak ngeih chih a biapi ngai.

Dawtnak in tuahmi nih dawtmi hna kha a sersiam hna. Ka hngalh ve ko ti lungpumnak nih rawhnak a chuahpi. Khrihfabu zong ah bawlnak sa ei ruang ah zumtu a der thawmmi hna tluknak cha cun sa zei hmanh ka ei ti lai lo, ti hi Paul lungput a si. Moses lungput zong a si( Exodus 32:32).