Zumhnak fiilaw phun cun, Jesuh thattu khi nangmah zong na si kho ko. Keimah zong ka si ve ko lai. A tlaangpi i Khrihfa nih kan theihning ah cun Governor (siangpahrang) Pilate nih a thah an ti.
Theologian cheukhat bel nih Farasi pawl le anmah Judah miphun lila nih an thah, an ti ko lai.
Jesuh vailamtahnak tlang i a rak kaipitu, a rak hremtu le thattu ralkap pawl i an lu bik cu ralbawi Major Marcellus a rak si.
Jesuh cu misual le mifir damiah bantuk in hreeng cungah, a zapei kap hnih le a ke ah thir in khenh chih; a thih tiang thlai dingin Judah miphun pawl nih Pilate sinah an rak hal.
Pilate nih a sualnak ka hmu lo. Cucaah kei ka thiang a ti i a kut aa ṭawl. Cu hnu ah Farasi le Sadusii pawl duhning, Israel mipi duhning in Jesuh thahnawn dingah cun Judea ram a va phan thar, ramri ralbawi Major Marcellus cungah rian an rak khinh.
Cu Marcellus hringtu a pa cu Rome pennak i minthang vuanci pafim Lucius Gallio si i, cu pa cu tuchan holh cun, republican senator a rak si.
Kumrelnak AD ai thawkka hrawngah Khrihfa an rak um rih lo. Naa belte in Rome hrawnghrang ahkhin biaknak an rak ngei hna. Mifim bawi deuh nih an biakmi phun khi nihin i Roman Catholic kan timi pawl biaknak phun he an rak ilo dedeng.
Gallio te chungkhar cu mifim an si. An fapa Marcellus zong paza, a farnu Lucia Gallio zong nu zaraan sawh si ve lo.
Rome nih a rak penmi ram kaupi (vawlei pumpi an ti iti; China le India an rak phanh bal lo caah) cu vawlei pumpi a rak si ve.
Cu lak i Gallio te chungkhar hna khi cu a saang bak i a zik bawi phun an rak si ve tinak si ko.
Marcellus hrim a muisam ai zaa. A fiim fawn i zawnruahnak ngei tlangval ṭha taktak a rak si. Rome siangpahrang minthang Tiberius i a tunu Diana he an rak iduh.
Marcellus cu Tiberius tupa mi rureu, thluak tlamtling lo Caligula he an rak i-rem lo. Cu ruang ah a kiken bik le a huai an tinak Judah ramri Minami ah an rak kuatnak cu si.
A darling Diana cu kaltaak in Judea ram ramri ummi Minami ralkap buuk ahkhin lu bik si dingin an rak ṭhial.
Cuti cun, Jesuh thattu ding i ṭuanvo ngeitu bik ah a vai ichuah beh.Jesuh cu hreeng cung cun, “Ka pa, ka pa…” tiah a hraam. “Zei kan tuah ti an ihngal lo. Ngaithiam ko hna tiah a pa Pathian sinah nawlnak biachim in a hraam.
“Ngaithiam ko hna” a timi khi culiote i Jesuh thah ding i a so rak paw tukmi Judah miphun pawl maw a ti hna, amah thattu ding i rian khinhmi Rome ralkap Marcellus te phu cu dah ti hngalh si lo.
Jesuh hram thawng an theih cun, wine a rii tuk cangmi Rome ralkap pawl nih a thi rih lo khih an ti i a hnak ah fei in an hei chunh.
Marcellus caah vanṭhatnak maw si, vanchiatnak dah si hnga. Jesuh puansen hodah aa lak lai tiah umharphen phun khin, ralkap sawhsawh pawl nih camcawhfung zuhnak an tuah. An ralbawi Marcellus zong cu an zuhter ve.
Marcellus nih a poh ai. Marcellus nihcun Jesuh puansen cu a tongh hmanh a tawng duh lo. A salpa Greek miphun Demetrius a kenter.
Cu zaan ah cun Rome ralkap pawl cu rawldanghnak le zudinnak an ngei. Jesuh puansen hodah a co kho tiah a rii tuk cangmi ralbawi pakhat nih a hon hrih hna.
Jesuh puansen luklak cu Rome ralkap nih zei ah an rak relmi si lo. Thi ai hei ineh tung rih.
An riit lung in “Judah pawl siangpahrang pa puansen cu a sunglawi tuk” ti phun khin neeknak ah cu ralbawi pakhat nih bia a chuahpi cu si. Marcellus nih Minami ralkap camp i a rian a va chawnmi pa si caah Marcellus cu siarhlei a duh.
Zapi nih “Judah siangpahrang Jesuh puansen cu Marcellus nih ihruk seh” tiah an au i an kut an thlir.
Zapi an au cang tikah cun, Marcellus nih al awk ṭha ti lo.
Mah khan Marcellus nih michia hnawmtaam pawl miphun i an puan ti phun khin aa hruk duh lomi Jesuh puansen cu zapi hmai ah ihruk aa von itiim…
An von ihruk i, a riit ngai ve cang tikah aa hruk kho huaha lo. A salpa Demetrius kha ka hruk tiah nawl a pek i a von ihruk ciammam…
Marcellus cu tuchan dat kan timi dah, electric leih bang khin an concadok i a thirh thluahmah.
“Mah puan-angki hin a rannak in ka phoih. Cun atu mei ah va khaang colh” tiah a salpa Demetrius cu nawl a pek.
Cuticun, Marcellus cu molh phun in a rak um i…A hnu i a darling Diana he.An rak thih ning belte cu…???Na thei bal ve dik maw? RBZ100 ah kong tling sau-tawi ngai in ka rak thai bal.Crd-Salai C Alexander
Leave a Reply