Rel huam mi caah siseh..”Potugal Pumpululh Chuih thiam CR7 te nupa an i Hnemhnak Biathlum” 2022 FiFA world cup, Qatar City

By Chavy Tha Tin Kulh 11 December 2022 10 December 2022, kawlram suimilam 9:30 pm ah Portugal le Maraco an i cil. Zoh a dawh hrinhran. Qatar khua lipi cerhmun ah a kal kho lomi zawng TV hmai asi lo ah phone hmai ah thut i zoh dih asi.

Mipi nih Portugal hi a ram tanh in an tanh cu asi lem lo. An ram ah pumpululh chuih thiam vawlei a hip tu Christiano Ronaldo (CR7) a um caah mi tampi nih an tanhnak asi lai dah. CR7 nih mipi a hip dih hna ti ko uh sin a tawinak in.

Mah puai hi Potugal caah siseh, Maraco caah siseh a biapi tuk mi puai asi. An thih le an nun ri a khiahpiak tu hna puai asi. A sungmi cu a thaizing ah zingka te in puanthuah i zial i dei maw dei lo ah arkhuang in tlun ti ko lo cu Qatar khua lipi ah cam hnawhchan ding a um ti lo.

Kei zawng kawlram buairuang ah TV in ka zoh kho lo nain ka ih khun cungte in Samsung galaxy phone chia nawnte in ka rak zoh ve. Internet line nih le a chia. A caan ah a tang, a caan ah ka line a thi tawn. Thitha hmanh in ka zoh kho lo. A pit lengmang. A caan ahcun ka thin a hngtuk tawn i ka phone chiate cu ka hlawnh dengmang tawn.

First round an chuih ah ball position ahcun Putugal nih a lawmh ngaingai hna. Nain first round a dih lai ah Maraco lei nih kawlkhat an thun sual ai.  Tlawmpal ah first round a dih. Potugal lei tang pawl cu ka hing viar. Kan hmai a chia rup.

Nain mah ti hin kan i hnem. Christiano Ronaldo, CR7 a chuih lo caah asi. Second round ah a lut lai i a cham hna lai tiah lungkilte in kan i hnem. Second round cu mitku fe le fe lo in ka hngak teomeo ko. An vun chuih ciam mam cu ruah ning bantuk asi ai lo. Puai dih tiang an cham kho ti hna lo ai. An sungruang mang ko.

Christiano Ronaldo, CR7 a celh back ve lo. A mitthli kurkur a biangki ah a luang. A tap bak ve ko. A mawh lo. Si cio u sehlaw kan tap cio ve hnga. Christiano Ronaldo, CR7 caah cun a donghnak FIFA world cup a chuih asi cang lai. Cu i pakhatnak hmuh lo i tlun ding cu a caah a fak ko. A ngaihchiat zawngah a mawh lo.

Cu lak lio ah mi cheu nih Christiano Ronaldo, CR7 an mawh chiat. Nain uar a umtuk mi an nu, Georgina Rodriguez nih Portugal an sung, a dawtmi a va ngaihchiat lio ah mah ti hin a Facebook page ah ca a tial. Uar a umtuk ka ti. Cawn a phu fawn tiah Ka ruah. Mifim, mi pical ciammam tiah ka thangthat.

A timi cu;“Christiano Ronaldo, CR7 hi millions in duhtu a ngeih ahcun kei zawng hi mah hna lak ah kaa tel ve. Mi pakhat te lawng duhtu ngeih sehlaw cu mi pakhat te cu kei hi ka si hnga.

Duhtu pakhat te hmanh ngeih hlah sehlaw, a sullam cu keimah hi a thimi, a rak um ti lomi ka si caah asi lai.

Vawilei pi nih Christiano Ronaldo, CR7 hi an doh asi ahcun cucu keimah hi an ka doh asi ko.

Sichiat ah siseh, sithat ah siseh, a mah lei ah ka tang zungzal ko Lai. A mah he ka umti zungzal ko lai,” tiah ati.

Mah biahi a thaisung asi mi Georgina Rodriguez nih a va a ngaihchiat tuk lio caan ah a chimmi bia dawh asi.

Be the first to comment

Leave a Reply

Your email address will not be published.


*