Ram Daihnak He Kan I Hlat Ko Tiah SAC Chairman Nih Cohlan

Ram Daihnak He Kan I Hlat Ko Tiah SAC Chairman Nih Cohlan
Ram daihnak ṭha tein kan dirh kho rih lo tiah a ruang langhter in thla 6 caan sauhnak a chaptu SAC chairman nih February ni 20, Chin National Day ah ram daihnak he kan i hlat rih ko tiah a chim.

2023, February ni 20 a voi 75nak Chin Miphun Ni ah SAC chairman nih atu bantukin a chim hi a si.

SAC nih a kakip in rampi ṭhanchonak ding ah i zuam a si ko nain, ramdang ramngan hna nih kan ram a rawhnak ding in an tawlrel caah kan rampi cu daihnak ding he aa hlat ko tiah SAC chairman Min Aung Hlaing nih a chim.

Chin ramkulh cu kokek khua dawh le nunphung he dai tein a ummi a si nain, atu ah cun thilsual tuahnak le phungning loin cawlcanghnak a tuah ruang ah rampi caah ṭihnung ngaimi dirhmun ah a cang tiah a chim.

SAC nih uknak a laak hnu ah Chin ramkulh Mindat peng nih 2021, April thla in Lai meithal i tlaih in SAC ralkap dohnak an rak thawk. Cu hnu ah Chin ramkulh chung peng kip cio in CDF phu dirh in SAC ralkap cu rak doh a si.

SAC nih Chin ramkulh pengkulh 9 chung ah Mindat peng cu 2021, ah ralkap uknak tang um ding in thawngthanhnak a rak tuah hnu ah Thantlang peng, Hakha peng, Kanpetlet peng, Matupi peng, Tedim peng, Tonzang peng le Falam peng ah cun 2023 ah ralkap uknak tang um ding in a thanh.RFA

Hnahthial Ralhrial Chinmi Nih Chin Miphun Ni Hmang.Mizoram ramkulh Hnahthial khuachung ah ralhrial in aa dormi Chinmi hna nih nihin February ni 20 ah Chin Miphun Ni hlunghlai ngaiin an hmang kho tiah theih a si.

Nihin Chin Miphun Ni kong he pehtlai in minung 80 tluk nih ram le miphun ca ah nunnak pemi hna upat peknak le ram le miphun ca ah nunthap in ral a dotu le rian a ṭuantu vialte hna ca ah thlacamnak kan ngei kho tiah hruaitu pakhat nih a chim.

Atu dohthlennak kong he pehtlai in zarh hnih ah voi 1 hi ram le miphun ca ah thlacamnak kan tuah tawn tiah hruaitu pakhat nih a chim chap.The Chin Post