Ralhrang ruangah Tinam khua le a pawngkam khua pawl caah a har ko. Anmah khuami hmurka.

By. Tukhal(Amin kan thuh chung. A himnak ding ah) Ralhrang hi 2022, March 16 ni ah Hakha khua in an i thawh. Hakha Nipi khua hi meng 7 a si. Nipi khua hi inn hnih an bauh i Zokhua lei ah an lan. Nipi le Zokhua hi meng 16 a si. Zokhua le Nipi kar hi ralhrang hi lam an zul ti lo. Lam thum in an kal. Hi ka hrawng hin CDF he an i kap lengmang.

Meng hleiruk hi ni nga an rau. Kap hnih an i kahnak ah a thimi le aa hliammi theih khawh a si lo nain kan theih khawhmi cu CDF lei hi a thi mi le aa hliam mi an um lo. Zokhua cu ralhrang nih an neihtuk cang caah himnak an i tuahmi ah khua mi vialte cu an zaam dih. CDF nih an chimmi cu ralhrang hi an thawng, an thiam, an hriam a tha. Kan nih kan hriam he cun aa dang tuk ti hi a si. Kan meithal thawng an theih ah hin an kan ngamh tuk an ti. Asinain tihnak cu an ngei bak lo. Zokhua an luh ah hin khua mi an zaamnak hmun leitu in ralhrang hi an lut i an lau an tih ngaingai.

Cu zan bak ah cun Zokhua khuami vialte cu an khua in meng hra a hlatnak Ruavan khua ah an mah khua mi motor in an zam dih. Ruavan zong an zam nain Zokhua a va zam mi zawnruah ah mi no an chuak i thaithawh rawl vok an thah i an khan piak hna. Cu hnu ah meng li a hlatnak Tinam khua ah an i thial. Tinam zanriah vok an thah i an ei hnu ah Hrawngvun khua ah an riak. Cun a cheu Cinkhua nih an lak i a cheu Tiphul lam lei in Hakha ah an i dor hna.
Ralhrang cu Zokhua ah an riak. Baptist Biak inn pi ah an riak i Meheh pa hleikhat le ar tampi an i thah i Biak inn cu sa thahnak market bantuk khi a si ko. Zokhua inn an boh mi hi an khua inn dihlak ti awk a si. Inntampi meithal in an kah i canphio cu an pem liangluang. Zei vial an lak ti cu theih khawh a si ti lo.

Zokhua in Ruavan lei ah an kal i lampi ah CDF he an i kap. Ruavan khua hi inn an bohmi a tam. Vawlei chung phummi zong an leh dih. Ruavan cun an i thawh i Tinam lei ah an kal. Tinam le Ruavan kar ah CDF he an i kap than. A thi mi le aa hliam mi theih khawh cu a si lo. Tinam hi 2022, March 25 ni an phan. 26 le27 an cam. Inn kip te ah an riak i chawva le thilri cu an leh dih. Ar cu an tleih khawhmi poh an thah i inn kip ah ar hmul lawng te a si ko. Khua mi cu an zaam dih. 2022, March 28 ni kha Tinam in an chuak i an chuak lai te ah khua laifang inn an duah takvi inn kua a kaang.

A tu hi Tinam in meng li a hlatnak Lamtuk ah an lan. Lamtuk in 28 March kha lungcawi lei ah an lan i Hakhabin meng 42 a hlatnak hmun ah CDF nih an kah than i a tu zong hi mah ka cun an um ko. Lamtuk zong an zaam dih. Zokhua, Ruavan, Tinam, Lamtuk, Lungcawi, Malsawm, hi an zam dih. Hakha ah a zam mi hi Zokhua hnarcheu an si. A dang cu ramlak ah buk an suan i an i dor cio hna. A dam lo mi zong an um ken tar zong an um.
Nu le ngakchia ca ko ah hin a har tuk. Nau pawi lio zong an um. Khua sik le thal khua caan aa thlen lio te si kaw cumpi tlangrai a um fawn. Thal ruah a sur pah i an har ngai ko.

Be the first to comment

Leave a Reply

Your email address will not be published.


*