R.I.P Lal Ro Tluang Ṭah Hla

Ṭah hla lawh caan a phan hoi cang Khuazing kan thlacamnak khawi hen?

Miphun caah kan arfi le thlapa
Diahmah tein khuadawm nih dolh hna Ni khua caan a pian zawn ah
Langh ṭhan belte a um fawn lai lo

Liam rih hlah tiin thloh len zongah Anbiak le hna theih um fawn ti lo Pasal ṭha liam hlah kan ti zongah Vanmi rual nih an kan tei fawn Hruai hna mu, pasal ṭha kha Khi va ral ram lei ah hruai hna

Khua nan kilh tawnnak Lairam ah
Par bang en caan um lai lo
Rua bang in tuai ṭhan in
Cerlian bang chuah ṭhan le
Fikruk rual bang langh ṭhan khi
Um fawn ti ṭung lai lo

Miphun ca ko ah maw
Hriam hliam hma fak khun na tuar
Domhtlaih manh nih tong manh lo
Thawk cang ram rian lim hlan ah
Dar bang na kuai a fah cu
Chungkhar khuami miphun
Lung awi ni a um ṭung lai lo

Ṭah hla thong sawm nga in
In hloi len hmanh ahkhin
Kan in sian lonak bia nih tlinh lo
crd-Nunu Biazai

BAWIPA Hi Pathian A Si!D euteronomy 6:4-5 “Thei hmanh, Maw Israel: BAWIPA hi kan Pathian a si, BAWIPA lawnglawng hi; BAWIPA na Pathian cu na lungthin dihlak le na ruahnak dihlak le na thazaang dihlak in na dawt lai.”

Khrihfa innchungkhar ahhin a biapi mi thil tampi a um. Tuzing ah chim ka duhmi cu chungkhar ah Pathian zumhnak fek ngeih khawh ding i zuam a herh, ti hi a si. Chungkhar cu cawnnak sianginn hmaisa bik a si kan ti bang in zumhnak zong an cawn thoknak le hram a thlaknak a si.

Baibal ca chung kan rel tikah chungkhar ah cawnpiak hi a biapi taktakmi a si a langhter. Tuzing kan relmi hi Pathian kan zumhnak kong ah chim ka duh. Thaizing ah cawnpiaknak kong kha chim te u sih. Pathian pakhat lawng a si ti zumh hi a biapi taktak. Hngakchiat lio tein ‘BAWIPA hi Pathian a si’ ti zumh cu a biapi ko.

Mah bantuk in zumhnak ngeih khawhnak ding cu chungkhar in a thok ding a si. Khrihfa nih kan zumhmi Pathian cu Pakhat lawng lawng a si. Pathian cu Jesuh Khrih in ai phuang i kan lak ah khua a ruang sa. Pathian fapa cu Vailam ah an tah. Nithum hnu ah a thot than. A thawhtthan hnu ah Thiang Thlarau in Zumtu hna sinah a phung. Zumtu hna tthawnnak petu a si. Zumtu hna hnangamnak petu a si. Lam hmuhsaktu a si.

Pathian kan zumhnak ahhin kan lungthin dihlak in kan zumh ding a si. Lungcheu bang lawng in zumh hi a um ve ko. Lunghrinnak ngeih mi khi lungcheu bang lawng in zumh cu a si. Pathian sin ah thla kan cam. Kan thlacamnak cu kan zumh ruang ah a si. Kan thlacam mi hi Pathian nih a kan leh hrimhrim ko. Tuan te ah a kan lehmi a um. Tlai deuh ah a kan lehmi a um. Kan ca ttha lo a si caah a kan leh lo mi zong a um ko. Thlacam tikah lungthin dihlak in cam ding cu a biapi taktak.

Pathian kan zumh tikah kan ruahnak dihlak a uk tu le a kan hruaitu a si a herh. Pathian kan zumhnak hi ruahnak dihlak a si khawhnak ding ahcun a mah ah kan i hngat bak kha a herh ko. Pathian kan zumhnak ah ruahnak dang kan ngeih ahcun kan zumhnak ah kan i biatak kho lai lo. Ruahnak tling le pical kan ngeih ahcun kan ttuannak ah kan i biatak kho lai. Lungdongh le hnulei kir kha kan ngei lai lo. Jesuh nih Pathian rianttuan a ot tuang in a hnu lei ah a kirtthan mi hna cu Leithun ot i hnulei zoh pengmi bantuk an si. Pathian pennak caah santlaihnak an ngei lo a ti (cf. Luka 9:62).

Pathian kan biaknak ah thazaang diklak pek zong hi a biapi. Pathian caah rianttuan tik ah harnak tampi a um ko. A herhmi zong tampi a um fawn. Thazaang chuah bakin ttuan a herh mi a um. Tangka thazaang in ttuan a herhmi zong a um. Pathian ram a kauh khawhnak ding caah hin ttuan ding rian tampi a um. Khrihfabu nih a ttuanmi rian ah thazaang dihlak chuah in ttuan le i pumpek kha a herh ve ko. Zialphel in ttuanawk a ttha lomi a si.

Pathian pakhat lawng a um. BAWIPA hi Pathian a si. Laimi kan ca zong ah BAWIPA hi kan Pathian a si. Kan nunnak a kan thlengtu le kan khupthla a kan lettu a si. Kan lungthin dihlak, kan ruahnak dihlak le kan thazaang dihlak in a rian kan ttuan ding. Kan dawt ding a si. Bil Hmung

Be the first to comment

Leave a Reply

Your email address will not be published.


*