Pu Ngun Sang Aung CM rian a chawngtu ding hi Lt.Colonel Dr Vung Suang Thang a si

Pu Ngun Sang Aung CM rian a chawngtu ding hi Lt.Colonel Dr Vung Suang Thang a si i, anih hi kawl ralkap in pension mi a si i, Yangon ah um in a hnuah cun All Chin Society hna ahkhan a rak active ngai bal tiah theih si.

Pu Ngun Sang Aung hi amah nih i dinhnak a hal mi siloin ralhrang lungkua Naypyidaw lei nih an dinhter mi si tiah theih a si.Crd-Salai William HC

Khuazei in dah thil ti khawh ṭhawnnak hi a rat?Khrihfa a simi nih kan nunnak ah kan philh tawn lengmang thil hna chungin pakhat a simi cu “Thil ti khawh ṭhawnnak” kan ngeihmi hi khawizei in dah a rat timi hi a si.

A bik in hruaitu le a ṭhangcho cuahmah mi nih kan philh khun tawn. Baibal nih thil ti khawh ṭhawnnak (abilities) hna hi khawizei indah a rat timi fiang tein a kan cawnpiak mi kan ifian lo tikah cu nih cun kan nun a hrawh tawn i sunghzatlaknak, ningzah mualphonak, le lungthin lei temhintuarnak tbk hi kan tong ṭheu tawn. Cucaah zumtu nih kan theih zungzal ding le kan philh lo ding a biapimi cu khawizei in dah thil ti khawh ṭhawnnak hi a rat tihi a si. Baibal nih a kan cawnpiakmi hi rak zoh ve hmanh.

Deut. 8:18 Nan pupa hna sinah chiatser in a tuahmi biakamnak, atu ah a fek rihmi kha, tlinter awkah, chawva hmuh khawhnak ṭhawnnak an petu hna cu Bawipa nan Pathian kha a si tiah i cinken ko u.

Exodus 31:1-3 Bawipa nih Moses cu a thawh i,“Judah phun chung mi Hur fapa Uri i fapa Bazalel kha ka thim cang. Thil dawh tein ser khawhnak dingah thiamnak le thil ti khawhnak le hngalhnak a ngeih nakhnga Pathian thlarau in ka khahter cang.

Johan 15:5 Mitsur ruang cu keimah hi ka si i a nge cu nanmah hi nan si. Ahohmanh ka chungah a um i kei zong a chungah ka um ahcun, amah cu thei tampi a tlai khomi cu a si; zeicahtiah keimah loin nan tuah khawhmi zeihmanh a um lo.

1 Korin 4:7 Midang nakin cungnung deuh ah aho nih dah an ser? Pathian pek a si lomi na ngeihmi zeital a um maw? Cucaah cun nan hmuhmi cu a lakin hei hmu hlah u law cu bang, zeitindah nan i porhlawt khawh?

Hi a cunglei langhtermi Baibal cacaang hna nih a kan cawnpiakmi cu kan nunnak ah thil ti khawh ṭhawnnak kan ngeihmi hna hi Bawipa sinin kan hmuhmi laksawng hna an si. Cu thil hna cu kanmah min ṭhatnak caah siloin Bawipa fialmi rian kan ilim khawhnak ding caah pekmi hna an si.

Khat lei in kan chim ahcun Pathian sunparnak caah amah Pathian nih a kan pekmi laksawng hna an si. Cucaah minung porhlawtnak caah siloin Bawipa thawngin Bawipa caah pekmi thil ti khawh ṭhawnnak an si timi cu philh lo tein kan nunnak ah hman thiam izuam cio hna usih. Cu tikah kan nun lamthluan hi a dam i Bawipa sunparnak ca kan tuah ṭuanmi thil hna zong amah Pathian sunparnak langhtertu ding caah a hmunmi theipar ah an cang tawn.

Cucaah thil ti khawh ṭhawnnak kan timi hi ṭhawnnak vialte ngeitu Pathian nih zeitluk in dah minung nangmah le keimah hmangin zeitluk dah langhter aa timh timi cungah aa hngatmi a si. Hi zawn ah hin Pathian hi zeitluk in dah na zumh timi lawngah siloin Pathian nih zeitluk in dah an zumh ve timi hi a rak biapi mi a si.

Careltu dihlak cungah kaa lawm. Bawipa nih a bia hmang in thluachuahnak in pe ko hna seh.
Danny Bawibikthawng