Malaysia cu rampumpi thimnak (GE15) Nov 19, 2022 ah an tuah i piang ko in teitu um lomi dirhmun (Hung Parliament) ah an chuak. Aruang cu an Federal Parliament ah țhutdan 222 aum i atlawmbik 112 ahmutu party lawng kha teitu an si nain tutan cu tambik ahmutu Pakatan Harapan (PH) hmanh nih 81 lawng an hmuh i second ah Perikataan Nasional (PN) nih 73 lawng an hmuh.
Cucaah party fa tete kha PH le PN nih kanmah lei ah țang uh tiah heh an sawm veve hna nain an sawm kho veve hna lo i adonghnak ah an ram phunghram ningin (Federal Constitution) siangpahrang biachahnak tuah piak hau dirhmun an phan. Siangpahrang nih MPs tling thar mi pawl (Abik in third ahmu mi BN party) MPs pawl hi pakhat hnu pakhat ton in biahalnak tiang atuah hna. Cu hnu ahcun State Sultan cio asimi Sultan 9 kha siangpahrang nih a auh hna i (Conference of Rulers Meeting) an tuah hnu ah tutan thimnak ah MPs țhutdan tambik in atlingmi PH chairman Anwar Ibrahim cu Malaysia ram tuanbia ah avoi (10) Prime Minister rian akhinh.
Anwar Ibrahim hi 1998 i Deputy Prime Minister ațuan lio ah Dr. Mahathir nih Israel pawl he pehtlaihnak na ngei, pa le pa sualpinak (Sodomy) na tuah ti pawl in sual aphawt i DPM in aphuah pin ah thong athlak. Cun thong achuah hnu in ngol loin Malaysia ram le mipi nih thlennak kan herh “Reformasi” ti au pi in Pakatan Keadilan Rakyat (PKR) timi party adirh i heh tiah Malaysia ram a uktu UMNO hruaimi BN cozah kha mipi arak doh pi hna.
Cuticun kum 20 chung BN cozah cu adoh pi hna hnu ah 2018 ah khan Dr. Mahathir lila he PH Coalition party ah țangți țhan in UMNO hruaimi BN cozah cu an thlaak khawh hna nain Dr. Mahathir nih PM ațuan i Anwar siloin anupi Wan Azizah tu kha DPM rian an khinh. Cuticun PH cozah nihcun Kum 2 an vun kalpi ah Dr. Mahathir hi athli tein Anwar nih PM in thlaak atimh an ti i anmah PH cozah chung cun atu i PN party min in adirmi Muhyiddin Yassin te pawl phu khi an kuai țhan caah PH cozah cu kum 2 ah an tlu țhan. Anwar hi Malaysia politician ahcun voi tambik thong an thlaak i hremnak zong atuarmi asi. 1947 chuak asi i kum (75) asi ve cang.
PH cozah tluk hnu in 2020 ah Perikataan Nasional (PR) in Muhyiddin Yassin nih PM avun țuan i kum khat ah an party an ciangkuang ve hoi lo caah PN party chung țhiamțhiam in Ismail Sabri nih PM rian avun tlaih i tukum ah rampumpi thimnak an vun tuah țhan hi asi. Tutan ah hin UMNO hruaimi BN party pawl cu MP 30 lawng an tling i UMNO chan adong cang ti zong in an ti phah cang hna. BN party chairman asimi Ahmad Zahid Hamidi nihcun PN he rian țuanți nak incun PH he țuanți kha duh deuh ve.
Siangpahrang nih fial bantuk in Unity Government ka ser colh lai, Minister (vuanci) pawl lahkhah ka țhumh lai, minister tamtuk zong ahau lo, ramchung mipi le Sarawak, Sabah pawl he hmunkhat te ah rian ka țuan lai tiah Anwar nih achim colh ve. Second hmu mi PR pawl he an i tluk ngai caah tutan Anwar Ibrahim hruai ding mi cozah zong hi sau an nguh te hoi hnga maw tiah ka lung cu an hring dom.
Asinain Malaysia ramchung ah Malay, India, Chinese, Sabah, Sarawak timi thleidannak um loin miphun pakhat, uknak pakhat timi a dirpi pengtu Anwar Ibrahim nih Prime Minister rian ahmuh cu lomhpi aphu ngai ngai. Thong an thlaak le an hrem atamning zoh ah Malaysia Aungsan Suu Kyi bantuk asi ve. Abik in PH party MPs pawl cu keimah he hrim 2000-2004 kar hrawng ah arak i kom mi, an tuarnak, an i zuamnak vialte ka mithmuh asimi hna, kha lio NGO mino tete kha atu ah Federal MPs atlingmi an tamtuk caah ahlei in ka lawm khun.Ka lawm.Victor Khen Sang Nov 24, 2022
Leave a Reply