Russia he ral atu cuahmah mi, Ukraine President Volodymyr Zelensky cu tuchun ah US a rak phan. White House ah President Biden nih HERO don in an rak don. White House ah biaruahnak an ngeih hnu ah thawnglatu minung 40 renglo hmai ah Press Conference an tuah. Tuzan ah Congress ah biachimnak a ngei rih lai.
President Biden nih a chimmi cu “Russia President Putin nih a tinhmi tlamtling lai lo. US nih kan ngeihmi thazang um ek in Ukraine kan bawmh lai. Ceunak nih hmuihnak a tthawl lai. Ukraine ram a hmunh chung kan bawmh hna lai” tiah biakamhnak a tuah.
US nih Ukraine ralkap caah a bawmhmi phaisa hi $19.3 billion a si cang. Atu Zelensky a rat ah hin $ 2 Billion pek chap an timh rih. Zei dangdang bawmhnak a pekmi he cun a tam lengluang.
US Patriot Air Defence timi van ralvennak system zong a pek cang hna lai. Mah van ralvennak hi a tha bakmi a si caah Ukraine van ralvennak caah tam tuk a bawmh lai ti a si. Russia nih a kahmi missile le rocket 90% renglo cu a kham khawh lai tiah zumh a si. Cu lawng si rih lo, AGM-88 HARM timi missiles le HIMARS timi bom zong pek a timh. Security Assistance caah a dang tein US $ 850 millions a chap rih lai.
Biden cozah nih Kawlram cu an thinlung ngaingai ah an chia lo ti a fiang. Senate le house I majority an si lio ah zei paoh tuah kho a si nain a tuah lo. Kum pi kum 2 cu Kawlram caah pakpalawng a si.
Biden cozah nih tuchun tiangah Kawlram caah bawmhnak an tuahmi a um rih lo. Kan ram cazoh nih US ah bank ah an chiahmi $2billions hmah atu tiang a kan pe duh lo. House le Senate nih an nawr tuk caah NDAA timi upadi chungah bawmhnak zeimawzet an telhmi lawng a si rih. US cozah nih Ukraine a bawmhmi he tahchunh ahcun Kawlram a bawmhmi hi cu a kam fawhnak tluk hmanh a si rih lo.Crd-Salai Lairamthang
Leave a Reply