Pheh lo tein, pafa nakcun nu nih cun nu le pa dawt deuh le zohkhenh an thiam deuh ko cu mu.

Part 2 A fa a vun chuah bakin, nurse nu nih “Aiii, nute a si” a vun ti ko ah hin a nu cu aa lawm khun. Pheh lo tein, pafa nakcun nu nih cun nu le pa dawt deuh le zohkhenh an thiam deuh ko cu mu. Atu kan chan, ram leng in ram chung nu le pa cawm le zohkhenh zong ah fanu ngeitu nu le pa hi dawh an i lawm deuh tuk ko cu mu.

A fanu thla thum hrawng a vun si cun duh a nunning hi inn pa chakthlang zong nih pom le cawi an i cuh cang. A nu cu a fanu hmailei kong ruah ah zan le mui tiang rian a tuan tawn. Chun i a riantuannak nih zan ah hrum lengmang in a umter tawn. A bat tuk celh lo ah hin “thaizing cu kaa din rih lai” a ti nain khua a vun dei cun “ho hlei dah bawmhtu ka ngei, ka fanu caah cun a nu keimah lawng pei ka um cu, ka hnek chih a hau ko” tiah riantuan ah a kal than tawn.

A si, ka nu le ka pa an țhawng tuk ka rak ti tawnmi kha an țhawn caah si loin fanu fapa kong ruah ah nu le pa hi an rak i hnek hramhram bia a si kha a fiang tuk.

A fanu te cu tanghra a vun kai, hawi dang bang boarder (asawng) ah a chiah kho lo caah Cusin (tuition) tu a kaiter. A fanu te zong cu a nu nih i zohthla tuk ding khin a nunzia aa dawh. A hmutu paoh nih hi bantuk fanu fim hi ngeih ko ahcun lakfa hrin zong a poi lo ti tiangin a dinfelnak kong cu an i ceih len. Aa zuam tuk, aa zuam ngamsam. Asinain vanchiat cu, tanghra a sungh ai. An nufa in nguingui thlakin an țap. Zei nih a chuah hnawh ti hna lo. Sau nawnpi an țap hnu khin “Ka fa, na ngaih chia hlah, fak deuh chinchin in rian ka tuan lai i hmai kum cu Asawng ah kan chiah lai, nangmah tanghra awn lo cu a si kho lo” tiah a fanu cu a vun hnem than.

“Ka nu, tanghra nolh țhan nakcha cun, ram dang ah ka kalter ve ko ca, atu cu ka pi zong a tar tuk cang. Nangmah zong hlan bantukin na țhawng ti lo, kum 60 lei pei na naih cang hih. Pathian nih lam a ka hruai lai i ram thumnak hna ka phan ahcun kan caah a tha deuh lai” a ti vun ve. A fanu tanghra awng seh ti a duh tuk ko buin ram dang kal ding cu a hnatlakpi.

Chungkhar ah zeihmanh a um lo cang cun ram dang kalnak ding zong cu lungretheih a si hoi cang. Chungkhat deuh le hawi kom hna sinah docawi in aa thawh. Cham țhannak kong an ruat ah an cawi ngam tuk cio lo. Tlawmpal a vun chuahpimi le a ngeihchun suițhi a zuarmi fonh in kalnak khim fangfang khi an hmuh.

Fanu fangkhat te nih vun kaltak ding cu a pi siseh, a nu siseh a celh te an celh lo. Khua hauka in an vun thlah, siang lo bu te cun hmailei tintuk khuasaknak kong ruah ah mitthli le hnapdup he an rak i țhen. Nute zong a celh hin loh, a langpar khin “ka nu, ka nu, mangtha tuk u mu, ka pi, mangtha tuk mu” tiah a mithli he a liam hlan tiang a vun auh hnawh peng hna.

Malaysia a phan, mi dingfel hrat cu a pi le a nu zong a thlum-al te an ei kho ve cang. An i lawm tuk. Fanu fim ngeih cu a rak sunglawi hrimhrim ko. “Ka nu, rian zong fak tukin țuan ti hlah, ka dam ahcun ka pi le nangmah cu kan cawm kho tuk hna lai, ka pi zong kha a thlum-al a duhmi te rak cawkpiak mu” a vun ti.

Khuami le innpa chaktlang zong nih hin “cu tluk fanu dinfel le fim cu, atu le atu te pei phone a vun chawn ko hna hih” tiah an i ceih len tawn. A nunzia aa dawh tuk, a dingfel tuk ti cu vawlei killi, US tiang in an vun theih. A rau lo, US um an khua tlangval pa nih a vun hal colh. An van a țha, Malaysia ah sau um lo tein US a phan colh ve. This is America, …Part 3 a ra te lai.Crd-Biak Mawng

Be the first to comment

Leave a Reply

Your email address will not be published.


*